¹ Iyọ eyẹ nwemaa pfi ẹgbue shi emeni eyẹ suọ, khi eyẹẹ ke de vhọ pfia. ² O kha kyia khi usomhi ni a te unu ighyiukọ ngme khi ingmaghyie li o kyia, khi egbeushia ali eni e vha ẹẹ suọ esọ khi a laa rhi ẹchọ ni o gọ lu wẹ na wẹẹ, ³ See eyẹ li la na pfuẹ ni eye rhi ẹloe gbe ukpokpomhi imyiepfuese onana? --Imyiepfuese ni o kyia khi obọ Ishinẹgba li eyẹ kyiatsolo te suọ ọli, eni e suọ wẹ e myie ọtsẹ shi vhọ. ⁴ Ishinẹgba ọọ li rhi ishẹfẹ ali inyaloa ali ikanya izemhi ọli myie ọtsẹ shi vhọ, rhọ te ikpa isomhopfa Ayẹmhẹ ni o Pfuasẹ ni ọ kemhi abhi o li ghọli ọli. ⁵ Rharhi ọ vha ẹẹ li khi ighyiukọ ọli e laa kee mhasẹ ni agbọ ni oa bhẹ, ni eyẹ a ngme ena. ⁶ ọgbọ ọ la asha ngme ọọ li, “Elọ ọgbọ kyila, ni ọ lina nwu ẹ gbe ena? Omyi Ọmọse, ni u pfi ẹgbue shi egbe? ⁷ U rhi ọgbọ kpọkẹ suii ni eni ighyiukọ; u rhi ikiki ali ojima gwese ọli ukhomhi. ⁸ U rhi ẹtsẹkẹ kwu kpọkẹ ni ẹkoawẹ ọli.” Rharhi khi Ishinẹgba ọ she rhi ẹtsẹkẹ kpọkẹ ni ọgbọ. aa mẹ ẹtsẹkẹ ni e kpọẹ ni Ishinẹgba ọ vha rhọ kpọkẹ ni ọgbọ. Ama nena eyẹ vha mẹ nee khi ẹtsẹkẹ e she kpọkẹ nali. ⁹ Ama, eyẹ mẹ ọni ẹẹ khi a rhọ kpọkẹ suii ni eni ighyiukọ--Ijesu, ni ọ te rharhi ẹchọ ni ọ mẹ ali egwhuli ni ọ gwhu, a she rhi arhu ojima gwese ọli. Iyọ, rharhi izemhi Ishinẹgba, Ijesu ọ she gwhu ni agbọ kwu. ¹⁰ Oo dea khi Ishinẹgba, rharhi khi ẹtsẹkẹ kwu e te rharhi lẹ la vhọ, e la vhọ nali, ọ rhi eni ivhiẹ ni emọse bhẹ vhi ikiki, ọ rhi Ijesu kyili ọni ọ rhi odẹ imyiepfuese khasẹ wẹ khi imyiepfuese wẹ o gba pfuse rhọ te ikpa ẹchọ ni ọ mẹ. ¹¹ Ijesu ali eni ọ rhọ shi ipfuasẹ Ita ọgwho li e mhọli. Li o zẹ khi omama o vha nwu Ijesu khi ọ rhọ lu wẹ inyọgwho lẹ ni ikpotso ali emọse. ¹² Ọọ li, “Mhi laa rhi eva ẹ tsabo khasẹ inyọgwho mhẹ, mhi laa rhẹ to uwolo elemhi igbaa.” ¹³ Ọọ ke gwe ẹẹ li, “Mhi laa rhi egbe nya ẹ.” Abagwhoyọ, “Ghe, ghe, mhi nu eni Ishinẹgba ọ rhọ na mhẹ la ana” ¹⁴ Iyọ, abhi o ke rhọ kyila khi ẹlamhijegbe li e zẹ, Ijesu ọ li liyọ, khi ọ kẹ te ikpa egwhuli rhi ọni ọ mhuẹ izemhi egwhuli mela apfuẹa, okyio laa ngme ena. ¹⁵ Rhẹmhi ọ liyọ khyiẹlẹ ọ khi lẹ kẹ dobẹ tsumhi eni e te rharhi ulishi egwhi rhi egbe wẹ kyili igwhumha. ¹⁶ A khi eni ighyiukọ li ọ bhale a kpaghyiẹ. Ama ẹdẹli Ebulahamu li ọ bhale a kpaghyiẹ. ¹⁷ Ona li o zẹ ni o rhọ dea ni ọ kha rhọ liabhi inyọgwho ọli odẹ kwu, ishọyọ khi ọ kyili ọbolẹ nọfu ni ọ mhuẹ ivhẹlemhi ni a rhi egbe a nya khi ọ rhọ rhi ẹloe kee kwhu ẹtsẹkẹ Ishinẹgba, khi a kẹ dobẹ gbe ingmobe eni iọgbọ kwa. ¹⁸ Rharhi khi Ijesu lẹ obọ ọli ọ she mẹ ẹchọ, a nwu ọli fẹẹ, ọ dobẹ a kpaghyiẹ ena nwu fẹẹ.