¹ Igalisha ni ewẹghẹ!, ọgwho ọ gwhumhi vhẹ? Ni o kyia khi ukpẹloe vhẹ li a la tanọ Ikiristi manọ ọgbagala? ² Rhẹmhi ẹẹ khi mhi mhila vhẹ, rhọ te ikpa ikanya ushi lli vha te mhọli Ayẹmhẹ Ishinẹgba laa khi rharhi ina khi vha lama shi emeni vha suọ? ³ Idẹkẹ vha nwemaa kyia? Rhẹmhi vha te Ayẹmhẹ Ishinẹgba gbasẹ vha ke kwu ọlia shi ẹlamhijegbe? ⁴ Oyọ khi rhẹmhi vha mẹ ẹchọ erhebe shi apfuẹ, ni o kyia khi ingmaghyie kyia? ⁵ Iyọ, ọni ọ rhi Ayẹmhẹ na vhẹ ni ọ gbe ikanya etọgbe iteteva vhẹ, ikpa ishi li ọ mẹẹ te gbe wẹ la khi ikpa imyie Ijesu suọ? ⁶ Abhi Abulahamu, “ọ rhọ lama shi Ishinẹgba vhọ a lolo ọli nali shi igwabhagbe.” ⁷ Abagwhoyọ, yẹsẹ khi eni e lama shi vhọ, imyi Abulahamu li e ke kyia. ⁸ Oni ingmemhi Ishinẹgba o kpọ lee mẹ khi Ishinẹgba ọ la lẹẹ rhi Ijẹtasi le ekhẹ te ikpa imyie Ijesu suọ. A she kpọ ngme oni ingmemhi Ishinẹgba khasẹ Ebulahamu shi ekẹ: Ni a rhọ ẹẹ li, “Rhọ te ikpa ẹ li a te laa zẹ ọte ni agbọ kwu.” ⁹ Iyọ, Ebulahamu ọọ lama shi vhọ, a zẹ ọte nali, iyọ ọni ọ ke li lama shi vhọ ọ li mhọli ivọsẹna abhi Ebulahamu. ¹⁰ Eni e rhi egbe nya ikanya ushi epfua li oo rha khali wẹ. rharhi khi oo laa akẹkẹshekẹ, “Epfua lẹ khi uwi eni e vha rhẹ khali emeni a kẹkẹ shi oni ebe ushi, ali khi e rhọ khyiẹ wẹwẹ kwu. ¹¹ Nena ọ rhọ khasẹ gboo khi Ishinẹgba ọ vha te ikpa ushi rhi ekhẹ ni ọgbọkhọgbọ, rharhi khi ọgwhabhagbe irhọshiọ li ọọ rha nyele.” ¹² Ushi o vha te ikpa irhọshiọ bhẹ, ama ọni ọ laa rhi ishi gbe ishi li ọ rhọ laa nyele. ¹³ Ikiristi li ọ tsumhi eyẹ vhi epfua ushi le ọ rhi egbe ọ kyili ọni ọ pfua ni eyẹ. Rharhi khi a kẹkẹ ọli shi ekẹ, khi ''Epfua khi uwi ọni ọgbọ ni a tanọ manọ ukhomhi ọgbagala.” ¹⁴ Emeni e ze lẹẹ khi ivhọsẹna Ebulahamu o kẹ bhẹ bhuli eni Ijẹtasi le elemhi Ijesu Ikiristi, khi eyẹ kẹ myie ishobọ oni Ayẹmhẹ te ikpa imyie Ijesu suọ. ¹⁵ Inyọgwho, ingmemhi otsonagbọ mhi rhọ ngme ona. Ọgbọ ali ọgbọ e kha mhuẹ alamanegbe khi o she gaa gba na wẹ, a vha ke gwe mẹ ọni ọ laa va vhọ. ¹⁶ Ebulahamu ali omyi ọli li a shi obọ na, ọ vha ẹẹ li, “Imyi ọli,” nebu, ama ukwhumhogwho, omyi ẹ,” ni ọ kyili Ikiristi. ¹⁷ Nena mhi ẹẹ vhẹ, oni ushi, ni a she shi ikpe egbhọ ishie asha ene ali uye ali igbe neni o chigbe bhẹ, o vha la alamanegbe ni Ishinẹgba o kpọ rhọ shi ekẹ vhi oshimhi. ¹⁸ Rharhi o kha kyila khi ikpa ushi li alevhukwhu o te bhẹ lọ, o vha kha gwe te ikpa ishobọ bhẹ. Ama te ikpa ishobọ li Ishinẹgba ọ te ji ọli abọa ni Ebulahamu. ¹⁹ Elọ e mẹ zẹ khi a rhi ushi bhẹ? Rharhi ingmobe li a te rhi ushi bhẹ, apfishi ẹrhẹghẹ ni ọni ukpamhi Abulahamu ọ rhọ laa bhẹ bhuli eni ọ shi obọ na. Izemhi li a rhọ shi ushi te ikpa ighyiukọ rhọ te obọ ọni ọ la iteteva Ishinẹgba ali iọgbọ, ²⁰ Ọni ọ mugha itetevha iọgbọ ali ọgbọ ọ vhaa mugha ni ukwhumhogwo, ama Ishinẹgba ukwhumhọgwho li ọ kyila. ²¹ Rhẹmhi oni ushi o ke va oni ishobọ Ishinẹgba vhi oshimhi? A gaa khi iyọ pẹẹ! Rharhi ushi ni a rhọ bhẹ o kha dobẹ rhi inyele bhẹ lọ, ikpa ishi li igwabhagbe o kha ke te bhẹ. ²² Ama Ibabo oo ngme khi izemhi ingmobe o she pfi gwese agbọ kwu, khi imyiesuọ ni Ishinẹgba ọ khi lẹ te ikpa Ijesu Ikirsiti shi obọ, ni ọ shi khi lẹ laa tsumhi eyẹ te ikpa irhọshiọ ni o te obọ Ijesu Ikiristi bhẹ, rhẹmhi ọ khi lẹ kẹ rhi ọli ni eni e lama shi ọli vhọ ²³ Ama neni imyie Ikiristi suọ o bhẹ, igwhumha eni ishi li eyẹ kpọ kyia apfishi ni irhọkhasẹ Ijesu o ke rhọ bhẹ. ²⁴ Iyọ oni ushi li o ke rhi odẹ khasẹ eyẹ neni Ikiristi ọ bhale, ishọyọ eyẹ kẹ te ikpa irhọshiọ le ẹkhẹ. ²⁵ Nenaa abhi irhọshiọ o ke rhọ bhẹ ena, a vha ke gwe khọli a khasẹ eyẹ nena. ²⁶ Rharhi khi imyi Ishinẹgba vha ke kyila te ikpa imyie Ijesu Ikiristi suọ. ²⁷ Vhẹvhẹ kwu ni vha te ikpa Ikiristi batazi vha she rhi Ikiristi kwuegbe. ²⁸ A vha ke gwe mẹ Iju wẹ khi Igiriki, wẹ khi igwhumha, wẹ khi ọpfọẹgbe, wẹ khi ọkpọtso wẹ khi ọmọse, rharhi ọgwho vhẹvhẹ kwu vha ke kyila elemhi Ijesu Ikiristi. ²⁹ Vha kha kyili uwi Ikiristi iyọ imyi Ebulahamu vha ke kyila, eni e le ukwhu abhi a li shi oni obọ.