¹ Abhi o ke rhọ gbe ikpe igbe ali ene Mhi gwe rhi Ibanabasi ali Itatọsi mẹ egbe je Ijerusalemu. Ishele na mhi shele je Ijerusalẹmu Ishinẹgba li ọ rhọ khase mhẹ khi mhi kee lẹ. ² Mhi gwu khasẹ wẹ oni usomhi na mhi rha tsabọ vhi iteteva Ijẹtasi. (Ama eni abhi mhi mẹ khi e nwuẹloe rhẹmhi nu wẹ ngme kẹẹ). Rhẹmhi mhia khyiẹlẹ ena khi unamhi mhẹ, ọa liyọ ona mhi kpọ na nee, o ke kyili apfuẹ. ³ Ama o kha rhẹ kyili itatọsi, ni ọ nu mhẹ la, ni ọ kyili Igiriki, a vha rhi izemhi nwu ọli fẹli. ⁴ Oni ingme ona oo lase rharhi eni ẹẹ khi wẹwẹ e myie Ishinẹgba suọ ni e kyili iọgbọ ighagha ni e bẹna ẹẹ bhẹ laa dọ eyẹ ẹloe ni ẹẹ khi wẹwẹ e kẹ mẹ asha ni wẹwẹ e te laa rhi ushi nwu eyẹ obọ. Rhẹmhi ea nono khi wẹwẹ e rhi eyẹ kyili igwhumha shi ingmemhi ishi. ⁵ O kha rhẹ kyia ọkwulukwu ogwho, Eyẹ vha rhi egbe na wẹ nwu le, ishọyọ khi oni igmaghyie ni o la oni usomhi o ke nwu lieliẹ neni o rhamhi vhẹ egbe. ⁶ Ama eni ẹẹ khi wẹwẹ li e kpeda e vha mhuẹ emeni e li na mhẹ. Ememeni e rhẹ lu egbe wẹ o vha kyili ẹtsẹkẹ shi mhẹ ẹloe. Ọgbọ ọ vha kpaghyiẹ Ishinẹgba obọ. ⁷ Onochi, e she mẹ khi mhi she rhue oni akanya irhi oni usomhi tsabọ khasẹ eni a fẹli. Abhi Ipitẹ ọ ke le li rhi oni usomhi tsabọ khasẹ eni a fẹli eyọ. ⁸ Rharhi, ọni Ishinẹgba ni ọ rhi Ipitẹ ẹẹ gbe ikhanya abhi aghyiusomhi ni eni a fẹli eyọ, iyọ li ọ li rhẹ mhẹ a gbe ikanya ni Ijẹtasi ena. ⁹ Abhi Ijemhisi, Ikefasi, ali Ijọni, ni a yẹsẹ abhi eni e kpholo oni uka shele, ee yẹsẹ izemhi ni a rhọ na mhẹ, e nwu gboghyiẹ mhẹ ali Ibanabasi. Rhẹmhi e khyiẹlẹ ona khi eyẹ kẹ bhuli eni Ijẹtasi, khi wẹwẹ e kẹ bhuli eni a fẹ. ¹⁰ E gwe li nono khi eyẹ sato enanya, Mhii li dua khi mhi li khyiẹlẹ ẹtsẹkẹ oyọyọ. ¹¹ Abhi Ikẹfasi ọ rhọ bhẹ vhi Atiọki, Mhi nu ọ ngme vhi ukpẹloli ọ rharhi khi ọ vha gwabha kyia. ¹² Neni iọgbọ egwho e te obhoni Ijemhisi ọ la bhẹ, rhẹmhi Ikẹfasi ọ nu Ijẹtasi le emenale. Ama abhi eni iọgbọ ena e ke rhọ bhẹ, rhẹmhi ọ pfi eni Ijẹtasi shi ayọ vu. Rharhi khi ulishi eni iọgbọ ni e nono ofẹli. ¹³ Ijusi ni e kpọẹ e nwu gboghyiẹ Ikẹfasi shi oni akẹmẹmhẹ. Emeni a ke mẹ vhọ khi Ibanabasi rhẹmhi ọ ke li degboghyiẹ oni akẹmẹmhẹ ni ee khyiẹlẹ. ¹⁴ Ama abhi mhi ke rhọ mẹ khi e vha rhẹẹ khali ingmaghyie ni o la oni ingmemhi Ishinẹgba, lẹ mhi ke rhọ nu Ikẹfasi ngme ukpẹloli wẹwẹ kwu, “U kha kyili Ijusi u ke nyele abhi Ijẹtasi e lia nyele, see u ke lia li ẹẹ li Ijẹtasi khi e nwumaa nyele abhi Ijusi. ¹⁵ Eyẹ ni a vyia abhi Ijusi ni eyẹ vha kyili Ijẹtasi ni elingmobe,” ¹⁶ Vha yẹsẹ khi a vha mẹ ọgbọ ni ọ le ekhẹ rhọ te ikpa irhishigbe. Onochi, rhọ te ikpa imyie Ijesu suọ li eyẹ te le ekhẹ. Rhẹmhi eyẹ bhẹ bhuli Ijesu le khi eyẹ kẹ le ekhẹ te ikpa imyie Ijesu suọ a khi irhishigbe. Rharhi khi a khi ẹẹ li khi irhishigbe lọ a vha kha mẹ ọni ọ le ekhẹ pẹẹ ¹⁷ Ama o kha kyia eyẹ a nono khi eyẹ gwabha gbe rhọ khali Ishinẹgba te ikpa irhọshiọ vhi elemhi Ikiristi rhẹmhi eyẹ ke te ayọ lue rharhi khi eyẹ rhi ẹloe gbe ushia. Rhẹmhi oyọ o ke ngme khi rhẹmhi Ikiristi ọ ke rhi eyẹ li ingmobe eyọ? A gaa khi iyọ pẹẹ! ¹⁸ Rharhi khi mhi kha gwe nwu ma ushi vhọ ni a she kpọ nye dọsẹ, rhẹmhi rhi egbe mhẹ khasẹ abhi ọgbushia. ¹⁹ Rharhi khi abhi mhi rhẹ dua khi mhi rhi ushi gbe, oo pfuse mhẹa. Iyọ mhi gwhua rhọ khali ushi, lẹ mhi ke rhẹ khi imha gwe khyiẹlẹ emeni ushi o nono, khi mhi kẹ dobẹ nyele abhi Ishinẹgba ọ nono. ²⁰ Mhi she nu Ikiristi tanọ agbọ mhẹ ni ojọ manọ ọgbagala. A khi mhẹmhẹ mhi ke gwe nyele, Ikiristi li ọ ke nyele elemhi mhẹ. Inyele na mhi ke nyele elemhijegbe mhẹ irhọshiọ mhi ke rhọ nyele elemhi Omyi Ishinẹgba, ni ọ mhuẹ ighọli mhẹ ni ọ gwe rhi egbe ọli na mhẹ. ²¹ A khi rhẹmhi rhi ẹloe gbe ivhẹlẹmhi Ishinẹgba. Rharhi a khi ẹẹ khi irhi ushi gbe li o rhi eyẹ gwabha gbe rhọ khali Ishinẹgba lọ. Ikiristi ọ vha kha ke gwe mhọli emeni ọ gwhua ẹẹ shi.