Ikhomhi 11 Ikọritiasi ¹ OO gwhẹ mhẹ khi vha nu mhẹ rhi egbe myie elemhi ewẹghẹ. Ama vha she kpọ le nu mhẹ rhi egbe myie nee! ² Rharhi ingmemhi vhẹ ọa zẹ mhẹ ofu. Abhi mhi li shi obọ izuode ọkpotso ọgwho ali ọmọse ọgwho. Iyọ mhi li shi obọ na vhẹ khi mhi laa rhẹ vhẹ bhuli Ikiristi ukhomhi ipfuasẹ abhi ọmọmoshi ni ọ vha yẹsẹ ọmọse nee. ³ Ama ulishi o vha nwu mhẹ khi, abhi ẹnyẹ ọ li ghagha Ivu, khi isamhi vhẹ o dobẹ a nwu isamhi idu vhẹ lieliẹ vhi ọnwegbe ni vha mhọli ni Ikiristi. ⁴ Rharhi khi vha kpẹsẹ abọ myie iọgbọ ni e bhẹ laa ngme ingmemhi Ijesu ọvhese ni ọ degbea shi ọni a kpọ gwu khasẹ vhẹ. Ọa liyọ khi vha mhọli ayẹmhẹ ọda ni o degbea shi oni vha kpọ mhọli. ọa liyọ vha myie ingmemhi Ishinẹgba ni o degbea shi oni vha kpọ lama shi! ⁵ Imha sa khi o kwu mhẹ dala eni ighyiusomhi ni a kẹẹ. ⁶ O kha rhẹ kyila khi imha rhẹ ye owẹna ingme ingmemhi, imha kyili ọni ọ vha ye owẹna iyẹsẹ. Odẹ khi odẹ kwu ali obodẹ ẹtsẹkẹ kwu eyẹ she kweghyiea khasẹ vhẹ abhi o li la vhọ. ⁷ Onobe li o ke kyia khi mhi rhọ chichi egbe mhẹ kpiale khi vha kẹ kyili ena yasẹ vhi ekẹ? Rharhi apfuẹ mhi ngme oni ingmemhi ona a khasẹ vhẹ. ⁸ Irhẹmhi myie ika evhese ẹtsẹkẹ ni e mhuẹ mhi rha khyiẹlẹ uwẹ vhẹ na vhẹ. ⁹ Abhi mhi rhọ nu vhẹ la na mhi rhẹrhẹ mhọli ọtomhẹ, imha kphakpha ọnyiẹ vhẹ. Rharhi khi emena mhi nono inyọgwho eyẹ egwho ni e te Imẹsidonia bhẹ li e rhi emena mhi nono kwu ghyi mhẹ. Abhabhi o rhẹrhẹ li mhẹ egbe mhi she wẹna abhi a vha lia kphakpha ọgbọ, iyọ mhi lia kee khyiẹlẹ ọ. ¹⁰ Abhi ingmaghyie Ikiristi o li nu mhẹ la, imha laa pfiesọa vhi inyanọ mhẹ abodẹ Achaya. ¹¹ Elọ e zẹ? Rharhi khi imha mẹ mhọli ighọli vhẹ lọ? Ishinẹgba ọ yẹsẹ khi mhi mhuẹ. ¹² Ama emena mhia khyiẹlẹ, mhi kyhie lia kee khyiẹlẹ khi mhi ke rhi imhasha ni eni ea nono imhasha ni e rha nyanọ khi rhẹmhi wẹwe liabhi eyẹ. ¹³ Iọgbọ eyọyọ ighyiusomhi ighagha li e kyila ni ea gbe ikanya ighagha. Irhẹmhi e rhi egbe wẹ kyili ighyiusomhi Ikiristi. ¹⁴ Ona o vha kyili ingme ogbọ , okyhio ọ kpọ li rhi egbe ọli kyili aghyiukọ ufulọ. ¹⁵ O vha kyili emeni ọa nya ọgbọ aloa ni egamhẹ okhyio e rhọ rhi egbe wẹ mela egamhẹ ipfuasẹa. Ee laa khọkhọ khi ikanya aghyie wẹwẹ ea gbe eyọ. ¹⁶ Mhi gwe ẹẹ vhẹ: imhẹli ọgbọ khọkhọ khi adẹkẹ mhi kyia. Ama u kha ke ẹẹ khi adẹkẹ mhi kyia, rhue mhẹ abhi adẹkẹ khi mhi nyanọ sui. ¹⁷ inyanọ na mhia ngme ena a khi Ọnọmhuẹyẹ li ọ ngme ọ, ama mhi ngme abhi adẹkẹ. ¹⁸ Abhi agbọ ebubu e ke rha nyanọ, mhi lia nyanọ. ¹⁹ Rharhi khi vhaa rhi oghẹlẹ nu adẹkẹ la, ọtsẹgbhẹ vha kyila eyọ! ²⁰ Vha kpẹsẹ abọ myie ọgbọ ni ọ nwuno vhẹ shi ogba igwhumha, ọ kha rhẹ pfi okemhi shi vhẹ iteteva, ọ kha rhẹ li vhẹ a le, khi ọ rhẹ lase vhẹ alo. ²¹ Omama eyẹ li o kyia khi eyẹ rhọ liyọ. Ama ọgbọ kha rhẹ lia nyanọ---Mhi kee ngme abhi adẹkẹ waa---mhi li laa nyanọ. ²² E kha kyili Iburu, Iburu mhi li kyila. E kha kyili Izulẹ, Izulẹ mhi li kyila. O kha ke kyila khi ẹdẹli Ebulahamu li e kyia, lẹ mhi li kyia. ²³ E kha kyili egamhẹ Ikiristi e vha kyila da mhẹ, (Mhi kha ngme vha ẹẹ khi imha mhuẹ ẹgbhẹ.) Mhi da wẹ. Mhi gaa gbe ikanya da wẹ, shi uwi ilo ogba igwhumha, Mhi lo da wẹ. Shi uwi igbemhi rhẹmhi a gbe mhẹ dọsẹ, shi obodẹ imẹ ekhẹna egwhi nebu. ²⁴ Iọgbọ Ijusi e rhi itele “Ọgwho o vha la egbhọ eva gbe mhẹ.” ²⁵ Itesẹ li a rhi itele gbe mhẹ. A tono mhẹ echẹ utogwho. Itesẹ li ọkọ okẹ o kwu mhẹ luẹ nee. Mhi she gbhẹ edato esọ okẹ ẹliyọsẹ ogwho ali ẹlogota ogwho. ²⁶ Utotona mhi rhẹ ye asha, mhi la okẹna ekẹ, okhẹna igyiaguda, okhẹna iọgbọ mhẹ, okhẹna iọgbọ Ijẹtasi, okhẹna ẹvhue nefu, okhẹna apata, okhẹna ekẹ nefu, ali eni e myiesuọ ighagha ²⁷ Mhi she nwemaa gbe ikanya ni e ze elemhi ọnwunu, ẹliyọsẹ ebubu ovhesẹ o vha nwu mhẹ, okyiamhi ali okyiamẹ o gbee mhẹ, azumhi utotona, ukhomhi ibanọa ali ulili. ²⁸ A kha rhẹ rhi obọ gbe ẹtsẹkẹ kwu shi, ogbẹlẹ kwu lẹ mhi rhẹẹ mhọli ọkpokpomhẹ rharhi ọnwegbe na mhi mhuẹ ni eni ika. ²⁹ Mhi kha mẹ ọni olọsẹ, o ke li lọsẹ mhẹ. Mhi kha mẹ ọni a lẹlẹ delo ingmobe, egbe e vhala mhẹ a nali. ³⁰ Mhi kha laa nyanọ, mhii nwemaa rhi asha ni o te lọsẹ mhẹ a khasẹ. ³¹ Ọni Ishinẹgba ali Ita Ọnọmhuẹyẹ Ijesu, ọni aa chichi ẹlẹnagbọagbọ, ọ yẹsẹ khi imha pfi olẹmhi. ³² Elemhi ẹvhue Idamaskọsi, igọvinọ ni ọ gbe akanya rhẹ khali oghyie Arẹtasi ọ nono abhi lẹ li khẹ ẹvholi Idamasikọsi khi lẹ kẹ vhẹ mhẹ nwu. ³³ Ama irhẹmhi a rhẹ mhẹ shi elemhi ugwhughwu te iwido ni o la ochika kpiale, lẹ mhi rhọ dobẹ na pfue ọ vhi obọ le.