Ikhomhi 12 Ikitiasi ni ozeva
1
Mhi nwemaa na eta ọmọse, ama elele o vha rhẹ la vhọ. Ama mhi laa ngme irhọkhasẹ na mhi mẹ vhi obọ Ọnọmhọli khasẹ vhẹ.
2
Mhi yẹsẹ ọmọse ogwho ni ọ myie Ikiristi suọ ikpe igbe ali ene ni e dosẹ---ni ọọ la ijegbe ni ọ vha la ijegbe, imha yẹsẹ, Ishinẹgba lọgwho li ọ le yẹsẹ---a rhue ọli shele je idane.
3
Abagwhoyọ mhi yẹsẹ khi ọni ọmọse ọna---ni ọọ zẹ ijegbe ni ọ vha zẹ ijegbe, imha yẹsẹ, Ishinẹgba lọgwho li ọ le yẹsẹ---
4
A rhue ọli shele je aleghyie ọ suọ esọ ni e pfuasẹ dọsẹ ni ọgbọ vha lẹẹ jilẹ rhi unu je.
5
Mhi laa rhi ọgbọ ọyọyọ na eta ọmọse. Ama uwi obọ mhẹ imha laa rhi egbe mhẹ na eta ọmọse, sẹkẹnẹ obodẹ ọlọsẹmhẹ mhẹ mhi lee rhọ na eta ọmọse.
6
Mhi kha nono khi mhi na eta ọmọse, imha zẹ idẹkẹ, rharhi khi egbegbingme mhia ngme. Ama mhi laa chi ineta ọmọse le, ishọyọ khi ọgbọ kee rhue mhẹ yagha dala emeni e mẹ mhẹ vhi egbe ali emeni e te unu mhẹ suọ.
7
Mhi gwe laa chi inyanọ le rharhi eni ivhali idudumhi irhọkhasẹ eyọ. Iyọ, khi mhi ke rhi ichichiegbe tsua ipfua ekẹ, A rhi ugba tsọ sọ mhẹ ijegbe, aghyiusomhi okyio ọ kẹ lia kphakpha mhẹ, khi mhi ke kee chichegbe.
8
Itesẹ mhi lema Ọnọmhuẹyẹ shi vhọ nee, khi ọ rhue mhẹ lẹ vhi egbea.
9
Ọọ mhẹ, “Ivhẹlẹmhi mhẹ o somhi ẹ, rharhi elemhi ọlọsẹmhẹ ọli izemhi o te a gba.” Onochi mhi rhi ọlọsẹmhẹ mhẹ a chichegbe, khi izemhi Ikiristi o kẹ la mhẹ vhi egbe.
10
Elemhiyọ, Ikiristi ọ kwhese mhẹ, o kyili elemhi ọlọsẹmhẹ, elemhi eka, elemhi ingme, elemhi izẹ okwhẹ kpẹsẹ mhẹ o kha rhẹ lọsẹ mhẹ, mhi ze.
11
Mhi she kyili ọwẹghẹ! vhẹvhẹ vha rhẹ mhẹ kyia yọ, mhẹmhẹ ni vha khẹ chichi. Rharhi khi imha kyili ọgbọ apfuẹ obodẹ eni ẹẹ khi wẹwẹ khi eni ighyiusomhi nefu nẹẹ, imha rhẹ mhọli emena mhi kyia.
12
Ikanya ọnyaloa ni e rhi ọgbọ khasẹ khi aghyiusomhi Ishinẹgba li ọ kyia, a gaa rhi irhobọnwidu gbe wẹ vhi iteteva vhẹ.
13
See a ke li rhi ẹloe gbe vhẹ dala ika ni e kpọẹ, rharhi khi imha rhi ingmemhi okpaghyiẹ kpokpo vhẹ lọ? Vha yele oni igbegọ ona na mhẹ shiọ!
15
Ghe, ghee! mhia bhẹ bhuli vhẹ le otozesẹ. Imha laa kyili itsua na vhẹ, rharhi khi a khi ẹtsẹkẹ vhẹ li ọa gwhẹ mhẹ. Vhẹvhẹ mhi nono. Rharhi a khi ivhiẹ li e rhi ẹtsẹkẹ a ni ita ali inyọ wẹ. Ama, ita ali inyọ li e rhi ẹtsẹkẹ a ni eni ivhiẹ.
14
O rhi egbe nwu mhẹ khi ayẹmhẹ vhẹ o rhọ rhue mhẹ ẹtsẹkẹ. Rhẹmhi ke mẹẹ laa mhọli ighọli vhẹ, vha ke rhi ẹloe a gbe mhẹ?
16
Ama abhi oli ena, imha rhi itsua khọsẹ vhẹ. Ama, abhi a ke rhẹ khi ikpamhika mhi rhọ rhi ẹgbhẹ nwuno vhẹ.
17
Mhi mẹẹ te ikpa ọna mhi ghyie vhẹ ighagha egbe?
18
Mhẹmhẹ mhi ghyie iItatọsi bhuli vhẹ, mhi gwe ghyie inyọgwho eyẹ ọvhese bhuli vhẹ. Itatọsi ọọ mẹẹ li vhẹ le? A khi odẹ ogwho li eyẹ mhẹ rhọ te? A khi ẹtoawẹ egwho li eyẹ rhọ kyia?
19
Irhẹmhi vha khọkhọ eni ẹrhẹghẹ ena kwu rhẹmhi eyẹ gwu a kpẹ egbe eyẹ? Ukpẹloe Ishinẹgba ni ọ kyili ọtsẹ eyẹ, emeni eyẹ a ngme kwu rhẹmhi eyẹ rhẹ wẹ a zise vhẹ.
20
Rharhi ulishi ni oa nwu mhẹ lẹ khi imhẹmhẹ bhale a vhẹ asha ni imha kha bhale a vhẹ vhẹ. ulishi ni oa nwu mhẹ lẹ khi vha ke bhale a vhẹ mhẹ asha ni o vha gwhẹ vhẹ. ulishi ọa nwu mhẹ khi a la laa mẹ epfuasẹ, ukhẹmhukhẹ, ofu, itomhi, ilegbe odoshimhi, ichichegbe ali umhasuegbe.
21
Ulishi oa nwu mhẹ khi mhi kha liegbe bhẹ, khi Ọnọmhuẹyẹ ọ laa nwu mhẹ chi kpiale vhi ukpẹloe vhẹ. Ulishi oa nwu mhẹ khi eni e pfidọ ẹrhẹghẹ ni o dọsẹ e laa rhi ofu fu mhẹ, ni e vha nwegbe lieliẹ vhi umhapfuasẹ le, ali ighaba ali ikanya ẹlamhijegbe ni e nyele shi.