1
Mhẹmhẹ Ipọlu, mhi rhi ichegbekpiale ali ipfọmhẹ Ikiristi te egbe mhẹ lema vhẹ, Mhi kha nu vhẹ la mhi ga pfọmhẹ ama mhi kha ke chi vhẹ iteteva le mhi ke nu vhẹ a ngme kali, kali.
2
Mhi lema vhẹ khi imhẹ vha rhẹ mhẹ ngme ọva na mhi bhẹ; Imha nono khi mhi rhi izemhi mhẹ ngme ova. Rharhi khi mhi sa khi mhi jilẹ gbudu nu eni ẹẹ khi inyele elamhijegbe li eyẹ nyele a ngme.
3
Rharhi khi eyẹ kha rhẹ la elemhijegbe, eyẹ vhaa khọli okhọli elamhijegbe.
4
Itsua okhọli eyẹ e vha kyili iyi ẹlamhijegbe. Ama khi e ze ni e dobẹ a gwhọghọ izemhi ikyhioa. E nwu epfuasẹ ebe mela apfuẹa.
5
Eyẹ li gwhọghọ ẹtsẹkẹ kwu ni e nu iyẹsẹ Ishinẹgba a khẹ abọ. Eyẹ nwuno izemhi isamhi kwu igwhumha khi e suesọ ni Ikiristi.
6
Eyẹ rhi ẹchọ ni umhasuesọ kwu, ni isuesọ vhẹ o ke sheda gba pfuse.
7
Bino emeni e kpalo na vhẹ ni vhaa mẹ gboo. Ọni ọ mẹ ọli mẹ khi uwi Ikiristi lẹ kyia, ọ yele egbe ọli khi abhi lẹ lee li kyili uwi Ikiristi eyọ, iyọ li eyẹ li li kyili uwi Ikiristi abagwhoyọ.
8
Rharhi khi mhi kha rhẹ rhi afu ni Ishinẹgba ọ rhọ ni eyẹ gha, ni ọ rhọ ni eyẹ khi eyẹ rhọ kwẹlẹ vhẹ shele a khi eyẹ rhọ pfuse vhẹa, omama o vha laa nwu eyẹ shi vhọ.
9
Imha nono khi o li vhẹ ẹloe abhizẹzẹ khi rhẹmhi rhi ebe na mhi kẹkẹ ghyi vhẹ a pfianọ vhẹ idu elemhi.
10
Rharhi khi egwho ea ngme khi “Ebe ni ọa kẹkẹ e ze, ama ghe mhẹ ghe ẹ ingmemhi ọli o pfọ, ingmemhi ọli o vha kyili emeni a kha rhi esọ shi.”
11
dobẹ iọgbọ eyọyọ yẹsẹ khi emeni eyẹ a ngme shi ebe, li eyẹ gwe lia ngme ghe mhẹ ghe ẹ.
12
Eyẹ vha dobẹ laa rhi egbe eyẹ khọkhọ eni ea chichi egbe wẹ eyọ. Ama e kha rhi egbe wẹ a ta, khi e rhi egbe wẹ a khọkhọ egbe, e vha yẹsẹ emeni a khyiẹlẹ.
13
Eyẹ ena, eyẹ vha laa nyanọ dọsẹ. Onochi, eyẹ kha rhẹ laa nyanọ eyẹ nyanọ rhamhi asha ni Ishinẹgba o rhi afu ni eyẹ rhamhi, ali ikanya ni eyẹ gbe iteteva vhẹ.
14
Rharhi khi eyẹ vha rhue egbe eyẹ fu dọsẹ ẹrhẹghẹ ni eyẹ rhọ rhamhi vhẹ egbe kwu, eyẹ kpọ kyiatsolo rhi ingmemhi Ikiristi kpọ vhẹ alo egbe.
15
Eyẹ vha rhi ikanya iọgbọ evhese nyanọ dọsẹ, Onochi, eyẹ rhi egbe nya khi abhi irhọshiọ vhẹ o fu iyọ li ikanya eyẹ e vhẹ shi vhọ, o khyiele nwemaa rhamhi asha ni Ishinẹgba ọ bẹa khi ọa rhamhi.
16
Ona li o laa rhi eyẹ dobẹ ngme oni ingmemhi Ishinẹgba talase aloekẹ vhẹ. Eyẹ vha laa rhi ikanya ni eyẹ gbe obhovhese nyanọ.
17
“Ama ọni ọa dọmhi ọ kee rhi eva Ọnọmhọli dọmhi.”
18
Rharhi khi a khi ọni ọ rhi egbe ọli khasẹ laa mẹ. Ama Ọnọmhọli li ọ rhi ọgbọ a khasẹ.