¹ Vhaa ghee uvhali ighọli ni ọni Ita ọ mhọli ni eyẹ, khi a rhọ kee lu eyẹ imyi Ishinẹgba, emeni eyẹ kyia lẹ khi ona. ona li o zẹ khi agbọ e vha yẹsẹ eyẹ, rharhi khi e vha kpọ yẹsẹ ọ. ² Eni e gwhẹ mhẹ, nena imyi Ishinẹgba li eyẹ ke kyia, a vha khyie rhọ khasẹ ne emeni eyẹ laa kyia vhi odalo. Eyẹ yẹsẹ khi Ikiristi ọ kha bhale, eyẹ la laa liabhi lẹ, rharhi khi eyẹ la laa mẹ ọli abhi ọ li le li la. ³ Ọni ọ mhọli iregbenya onana ọ rhi udu ọ shi ayọ rhẹmhi ọ rhi egbe ọli shi ipfuasẹ abhi ọli chẹma. ⁴ Ọni ọ li ingmobe a je alo ọni ọ vha rhi ushi a gwhẹ li ọ kyia, rharhi ingmobe lẹ khi imha rhi ushi a gwhẹ. ⁵ Vhavha li yẹsẹ khi irhẹmhi a rhi Ikiristi bhẹ khi ọ rhue agbọ ingmobe e gbea, Rharhi khi ọ vha mhọli ingmobe shi egbe. ⁶ A vha mẹ ọni ọ toma vhọ ni ọ gwe li ingmobe a je alo. Ọnọni ọ li ingmobe a je alo rhẹmhi ọ vha kpọ mẹ ọli gwhe wẹ khi rhẹmhi ọ yẹsẹ ọ. ⁷ Imyi mhi ni e ghalẹ, imhẹ vha dobẹ ọgbọ ghagha vhẹ odẹa. Ọni ọ gbe a te odẹ, rhẹmhi ọ pfuasẹ, abhi Ikiristi ọ li pfuasẹ. ⁸ Ọlingmobe uwi okhyio li ọ kyia, rharhi ituẹkẹle li okhyio ọ te li ingmobe bhẹ. Ona li o rhi Omyi Ishinẹgba bhale, khi ọ kẹ gwọghọ ikanya okhyioa. ⁹ Ọni Ishinẹgba ọ vyia ọ vha li ingmobe rharhi khi ukpamhi Ishinẹgba o nu ọli la. Ọ vha gwe laa kee li ingmobe rharhi omyi Ishinẹgba li ọ ke kyia. ¹⁰ Ona li o rhi imyi Ishinẹgba ali imyi okhyio aa khasẹ. Ọni ọ vha gbe a te odẹ ọ vha kyili omyi Ishinẹgba, ali ọni ọ vha mhọli ighọli inyọgwho ọli. ¹¹ Ona khi usomhi ni vha te ekẹ suọ bhẹ, khi eyẹ mhọli ighọli egbe. ¹² A khi abhi Ikeni ni ọ li kyili ọnọkhọlọ ni ọ rhi ibishielemhi gbe inyọgwho ọli ugbee. Elọ e zẹ ni ọ rhọ gbe ọlia? Rharhi khi a vha myie ilasobo ọ khi a myie iyi inyọgwhọ ọli. ¹³ Imhẹ dobẹ ọli sha ẹ abọ, inyọgwho mhẹ, ni agbọ ea bishi elemhiẹ ẹ. ¹⁴ Li ẹyẹ ke rha yẹsẹ khi eyẹ a she te egwhui tsumhi eyẹ bhẹ vhi inyele, rharhi khi eyẹ mhọli ighọli egbe. Ọni ọ vha mhọli ighọli rhẹmhi ọ gwhua. ¹⁵ Ọni ọa bishi elemhi inyọgwho ọli rhẹmhi ọ gbe ugbee. Ghyiẹ u li yẹsẹ khi ọni ọ gbe ugbee ọ vha mẹ agbọ ẹlẹnagbọagbọ, ¹⁶ Ona li eyẹ te a yẹsẹ emeni ighọli o kyia, rharhi Ikiristi rhẹmhi ọ rhi agbọ li pfa eyẹ shi ekẹ. ¹⁷ Ama a kha mẹ ọni ọ mhọli ẹtsẹkẹ, khi ọ mẹ ọni ọa nono, khi ọ gwese udu ọ, khi ọ vha mhuẹ ivhẹlemhi kwu ọ, see ighọli Ishinẹgba o ke li nu ọli a la? ¹⁸ Imyi mhẹ ni e ghalẹ, imhẹ vha mhọli ighọli unu ama vha rhọ shi akanya ali ingmaghyie. ¹⁹ Ona li eyẹ rhọ yẹsẹ khi eyẹ mugha shi ingmaghyie khi eyẹ rhi udu nali. ²⁰ Rharhi udu eyẹ o kha luese eyẹ, Ishinẹgba ọ fu dala udu eyẹ, ọ yẹsẹ ẹtsẹkẹ kwu. ²¹ Ọni ọ gwhẹ mhẹ, udu eyẹ o vha sheda luese eyẹ, eyẹ mhuẹ iregbeda obodẹ Ishinẹgba. ²² Ememeni eyẹ ke mhilali ọ laa rhi ọli ni eyẹ, rharhi khi eyẹ rhi ishi ọli gwhẹ ali khi eyẹ khyiẹli emeni e rhi egbe a nwu ọ. ²³ Ona khi ushi ọli, khi eyẹ rhọ lama shi eva Omyi ọ ni Ijesu Ikiristi ali eyẹ mhọli ighọli egbe, abhi ọ lee li rhi oni ushi ona ni eyẹ. ²⁴ Ọni ọ rhi ishi Ishinẹgba gwhẹ lọ toma vhọ. Rharhi ona li eyẹ te yẹsẹ khi ọ nu eyẹ la, te ikpa Ayẹmhẹ ni ọ rhọ ni eyẹ.