¹ Imyi mhẹ ni e ghalẹ, irhẹmhi kẹkẹ ena ghyi vhẹ khi vhaa ke li ingmeobe. Ama a kha mẹ ọni ọ li ingmobe, eyẹ mhọli ọni ọ lema a ni eyẹ ni ọ nu ọni Ita la, Ijesu Ikiristi ni ọ pfuasẹ. ² Lọ mẹ ẹchọ shi ingmobe eyẹ, ama a khi eyẹ lọgwho lishi oni agbona kwu ³ Ona li eyẹ te a yẹsẹ ọli, ni eyẹ rhi ishi ọli gwhẹ. ⁴ Ọni ọ khi, ''Mhi yẹsẹ Ishinẹgba, ama khi ọ vha rhi ishi ọli a gwhẹ, ọneta li ọ kyia. ⁵ Ama ọni ọ rhi ingmemhi ọli gbe akanya, egbegbingme ighọli Ishinegba o she gba naa. Ona li eyẹ rha yẹsẹ khi eyẹ gba itsua kwugbe. ⁶ Ọni ọ khi lẹ toma Ishinẹgba vhọ, ọ kyili emeni e kha kyia abhi Ijesu Ikiristi ọ li a kyia. ⁷ Eni e gwhẹ mhẹ, a khi ishi egbọ mhi kẹkẹ a ghyi vhẹ, ama ushi nẹlẹ ni vha te ugbẹkẹle suọ. Oni ushi nẹlẹ wẹwẹ khi ingmemhi ni u ke suọ. ⁸ Ama mhi kẹkẹ ushi ogbo a ghyi vhẹ, ni o kyili ingmaghyie obodẹ Ikiristi ali vhẹvhẹ, rharhi khi aloebi o she a daa, egbegbe ufulọ ọa gẹẹ. ⁹ Ọni ọ khi elemhi ufulọ lẹ la, khi ọa bishi elemhi inyọgwho ọ, aloebi li ọ la apfishi nena. ¹⁰ Ọni ọ mhọli ighọli inyọgwho ọ lọ la elemhi ufulọ a je alo a vha mẹ ọzuodẹ obodẹ ọ. ¹¹ Ama ọni ọ bishi elemhi inyọgwho ọ, aloebi lọ la kyia; ọ vha yẹsẹ obhoni ọa je rharhi khi ubili o she zuse ọli alo. ¹² Mhi kẹkẹ ghyi vhẹ, eni ivhiẹ ni e ghalẹ, rharhi khi a she yele ingmobe vhẹa te ikpa eva ọli. ¹³ Mhi kẹkẹ ghyi vhẹvhẹ eni ita, rharhi khi vha yẹsẹ ọ ni ọ te ugbẹkẹlẹ la. Mhi kẹkẹ ghyi vhẹ, vhẹvhẹ inọghọdọ, rharhi khi vha she nwu ọnọkhọlọ le. Mhi kẹkẹ ghyi vhẹ, vhẹvhẹ ikwukwu ivhiẹ, rharhi khi vha yẹsẹ ọni Ita. ¹⁴ Mhi kẹkẹ ghyi vhẹ, vhẹvhẹ eni ita, rharhi khi vha yẹsẹ ọ ọni ọ te ugbẹkẹle la. Mhi she kẹkẹ ghyi vhẹ vhẹvhẹ inọghọdọ, rharhi khi vha ze, iyọ ingmemhi Ishinẹgba e nu vhẹ la, vha she nwu ọnọkhọlọ le. ¹⁵ Imhẹ mhọli ighọli oni agbona wẹ khi ẹtsẹkẹ ni e la vhọ. Ọgbọ kha mhọli ighọli oni agbona, ighọli ọni Ita o vha nu ọli la. ¹⁶ Ena khi ẹtsẹkẹ ni e la oni agbona, ọgwhẹmhẹ ẹlamhijegbe, ọgwhẹmhẹ ikpalo, ali ichichegbe agbọ; ena kwu e vha kyili uwi ọni Ita ama uwi oni agbona li e kyila. ¹⁷ Oni agbona ali ẹtsẹkẹ ọgwhẹmhẹ oni agbona e dọsẹ la lẹ. Ama ọnọni ọ la khyiẹlẹ abhi o ghọli Ishinẹgba ọ la nu ọli la ẹlẹnagbọagbọ. ¹⁸ Ikwukwu ivhiẹ, ẹrhẹghẹ ikposhimhi li a la ena, abhi vha kpọ le suọ khi ẹbele Ikiristi ọa bhẹ, abhi eyẹ lia ngme ena ẹbele Ikiristi e she le bhẹ, rharhi ona li eyẹ te yẹsẹ khi ẹrhẹghẹ ikposhimhi li a ke la ena. ¹⁹ Iteteva eyẹ li e te a lase, ama eyẹ vha kpọ kyili ogwho. Rharhi eyẹ kha kpọ kyili ogwho lọ e kha khyie nu eyẹ la nena. Ivumhi ni e vu li o rhọ khasẹ khi eyẹ vha kpọ kyili ogwho. ²⁰ Ama a she sase ẹ rhọ te ikpa Ọni ọ pfuasẹ, vha laa yẹsẹ oni ingmaghyie. ²¹ A khi rhẹmhi kẹkẹ ghyi vhẹ rharhi khi vha yẹsẹ oni ingmaghyie, ama rharhi khi vha yẹsẹ ọ khi olẹmhi o vha la elemhi ingmaghyie. ²² Ọgwho mẹẹ khi ọni ọpfiolẹmhi ọni ọ mẹẹ khyie khi Ijesu ọa kyili Ikiristi lọ? Ọgbọ ọnana lẹ khi ẹbele Ikiristi, rharhi khi ọ khyie ọni Ita ali ọni Ọmọ. ²³ A vha mẹ ọni ọ la khyie ọni Ọmọ ni ọa mhọli ọni Ita. Ọni ọ yẹsẹ ọni ọmọ li ọa mhọli ọni Ita abagwhoyọ. ²⁴ Uwi obọ vhẹ, vha dobẹ emeni vha te ituẹkẹle suọ khi e nu vhẹ la. O kha kyia khi emeni vha te ituẹkẹle suọ khi e nu vhẹ la, li vha rha nu Ọni Ọmọ la elemhi ọni Ita. ²⁵ Agbọ ni o vha laa pfo lẹ khi obọ ni ọ shi ni eyẹ. ²⁶ Irhẹmhi kẹkẹ ona ghyi vhẹ obodẹ emhẹghagha khi e ke ghagha vhẹ odẹ Ishinẹgba le. ²⁷ A khẹ li uwi vhẹ, ovhi ni a rhọ tono vhẹ okhomhi o khyie le la vhẹ vhọ, vhavha ke gwe kyili ọni a kha wẹna. Ama abhi irhi ovhili to ukhomhi ọli o lia wẹna vhẹ ẹtsẹkẹ kwu e liyọ kyili ingmaghyie khi olẹmhi o vha la, abhi a le li wẹna ẹ eyọ, liyọ mugha nya vhọ. ²⁸ Nenaa imyi mhẹ ni e ghalẹ, vha liyọ nu ọli la, ishọyọ ọ kha liegbe bhẹ, khi eyẹ kẹ gbudu, omama o ke nwu eyẹ ukpẹloli ọ. ²⁹ U kha sheda yẹsẹ khi ọ gwabha gbe, oyọ li u ke rha yẹsẹ khi ọni ọ gwabha gbe ọ she kyili omyi Ishinẹgba.