¹ Eni e gwhẹ mhẹ, Imhẹ vha lama shi ayẹmhẹ ni vha mẹ kwu vhọ, ama vha nwu iyẹmhẹ kwu fẹẹ khi vha rhọ yẹsẹ ni iyi Ishinẹgba lọ, rharhi khi ebolẹ ighagha nebu e she lo agbọ le. ² Ona vha te a yẹsẹ oni o kyili Ayẹmhẹ Ishinẹgba, ayẹmhẹ kwu ni o vha myie lama khi Ijesu ọọ kyili ọgbọ bhẹ vhi agbọ o vha kyili uwi Ishinẹgba, ³ Ona khi ayẹmhẹ ẹbele Ijesu, ni vha kpọ suọ khi ọa bhale, o she le bhẹ vhi ukhomhi ekagbọ nena. ⁴ Uwi Ishinẹgba vha kyia, eni ivhiẹ ni e ghalẹ, vha she nwu wẹ le rharhi khi ọni ọ nu ẹ la ọ fu dala ọni ọ la oni abgona. ⁵ Rharhi khi uwi oni agbona li e kyia, ememeni ea ngme kwu iyi oni agbona lọ, ingmemhi wẹ li enagbọ e rhi esọ a shi. ⁶ Ọni ọ vha kyili uwi Ishinẹgba ọ vha rhi esọ a shi eyẹ vhi ekẹ. Ina a lia yẹsẹ oni o kyili ayẹmhẹ aghyie ali ayẹmhẹ obe. ⁷ Eni e gwhẹ mhẹ, eyẹ mhọli ighọli egbe, rharhi ighọli khi Ishinẹgba, ọni ọ mhuẹ ighọli lọ yẹsẹ Ishinẹgba ni ọ gwe kyili Omyi Ishinagba. ⁸ Ọni ọ vha mhọli ighọli ọ vha yẹsẹ Ishinẹgba. Rharhi khi Ishinẹgba lẹ khi ighọli. ⁹ Ina li Ishinẹgba ọ li rhi ighọli ọli khasẹ eyẹ, ni ọ rhọ rhi Omyi ọli ọgwho kpe ni ọ vyia bhẹ vhi ekẹ agbọ khi eyẹ kẹ rhọ te ikpa ọli nyele. ¹⁰ Ona khi oni ighọli, a khi eyẹ kpọ mhuẹ ighọli ọli, ama lọ kpọ mhuẹ ighọli eyẹ, ni ọ rhọ ghyie Omyi ọli bhale a lasẹ obo shi ingmobe eyẹ. ¹¹ Eni e gwhẹ mhẹ, Ishinẹgba ọ kha lina mhuẹ ighọli eyẹ, rhẹmhi eyẹ ke li a mhọli ighọli egbe. ¹² A vha mẹ ọni ọ mẹ Ishinẹgba gwhe. Eyẹ kha mhọli ighọli egbe, li Ishinẹgba ọ rhọ nu eyẹ a la ishọyọ ighọli ọli o gba ni eyẹ pfuse. ¹³ Ona li eyẹ ke rha yẹsẹ khi eyẹ toma vhọ khi ọ nu eyẹ la, rharhi khi ọ she rhi ayẹmhẹ ọli ni eyẹ. ¹⁴ Eyẹ she mẹ eyẹ pfi ọtsẹ shiọ khi ọni Ita ọ she ghyie Omyi ọ bhẹ khi ọ kaa tsumhi agbọ. ¹⁵ Ọni ọ lama khi Ijesu khi Omyi Ishinẹgba, lẹ ali Ishinẹgba li e toma ogwho. ¹⁶ Eyẹ yẹsẹ eyẹ lama shi ighọli ni Ishinẹgba ọ rhọ ni eyẹ. Ishinẹgba lẹ khi ighọli, ọni ọ mhuẹ ighọli ọ mhuẹ Ishinẹgba, Ishinẹgba ọ nu ọli la. ¹⁷ Ona o she rhi ighọli gba shi eyẹ vhi iteteva, khi eyẹ rhọ mhuẹ iregbeda ogbẹlẹ igwẹzọ, rharhi abhi ọ li, iyọ li eyẹ li li vhi oni agbona. ¹⁸ Ulishi ọ vha laa ighọli. Ama ighọli ni o gba pfuse rhẹmhi ọa kwhu ulishi pfia, rharhi khi ulishi ẹchọ li o rha ni ọgbọ. Ama ọni ulishi ọa nwu ighọli o vha khyie gba nali pfuse. ¹⁹ Rhẹmhi eyẹ mhọli ighọli rharhi khi Ishinẹgba lọ kpọ mhuẹ ighọli eyẹ. ²⁰ Ọgbọ ọ khẹ khi, ''Mhi mhuẹ ighọli Ishinẹgba'' ama ọ ke a bishi elemhi inyọgwho ọ, ọneta lọ kyia, rharhi khi ọni ọ mhuẹ ighọli inyọgwho ọ, ni ọ vha mẹ ẹloe, ọ vha dobẹ a mhuẹ ighọli Ishinẹgba, ni ọ vhaa mẹ ẹloẹ. ²¹ Ona khi ushi ni eyẹ te obọ vhẹ mẹ: Ọni ọ sheda mhọli Ishinẹgba, ọ nwemaa lia mhọli ighọli inyọgwho ọ abagwhoyọ.