¹ Mwiye tuhuke kwaHekudyetu, yoyishi Ghaturemeka ene mboghana twirura; Ghatutjitjupitha ene mboghana dhingi yitombo yetu. ² Munyima dhomayuwa mawadi ne mboghana tupindutha; mudiyuwa dyoghuhatu ne mboghana twimeka ndjikiti, podiyo eshi twakupare paghutho dhendi. ³ Tudimuke notukuthe keho ghudimuki waHekudyetu. Meyero Ghendi ne ghapwa kuturithapo noyira mavero ghodiyuwa. Mbogha neya kukwetu yira mvura ghothihuru-huru nogho ghuye ghuno." ⁴ Ephraim, yinu munye sho Ni tende kukoye? Juda, yinu munye sho Ni tende kukoye? Ghutawedhi ghoye ne yira divuyi dyomathiku-thiku noyira mume ghomurughura. ⁵ Yodiyo, nawa teta ko kupitera mwamupumbi, Nawa payire noyighamba yomukanwa kange; nomatetero ndhango ghoye ne yira munyenge ghokumuneka kokuheya. ⁶ Ame ne narumbera mathiyerero mbadi muyambo noghudimuki waNyambi ne wapiterera muyambo ghokutumekera. ⁷ Ene yira hatutughuru, hatjora makuyuvero; Hapirire ghutawedhi kukwange. ⁸ Gilead ne thitata thawa yiharuri noha kunyateka hathinda nothinyinga. ⁹ Yira mbunga dhaka widhi ghomukungu hana kutaterera ghumweya, hapristeri ne kohana kutenda ghupayi mundhira dhokutamba ku-Shechem; yaghushemwa, awo ne kuna kutenda ghupayi ghothihonyi. ¹⁰ Namonine thinu thokuyapitha mundhugho dha-Esreali; Morudi rungu rwa-Ephraim na-Esreali ne ghana nyata. ¹¹ Nowe Juda, mukesho ne naghu kuroyithera apa mboni hutha makwatero ghohanu wange.