¹ Apa Nahimine kwirukitha Esreali ne maharwero gha Ephraim ne ghakarire pashenene, noyiruwana yoghushatani ya Samaria. Awo ne kuna kwidha mughufwiki nohedhi ne kuna kwingenamo. Mbunga dhawa kawidhi ghomukungu ne kwiya nokushimba maghushwi hatware panunda. ² Mbadi hana kuyi ghayara eshi Ame ne kuvuruka ghuyi wagho ghoghuheya. Yiruwana yagho ne yawa dhingumwetwedha nopaghutho dhange yidi. ³ Awo ne kushambereritha fumu nomafumu ghana noghuyi wagho nombango dhagho. ⁴ Waheya hatjora ghuruwo. Yira didhiko edi ghana yenyeka muyothi ghuroto, ghana shayeka kundjonga-ndjonga mudiro munyima dhokukosha mushungwa ghokutenda ghuroto, kate ghupwe kuyotha. ⁵ Mudiyuwa dyafumu wetu, Fumu ghana ne ghakorwire kumayenyena ghovinyu. Gha ghonyononine dyoko dyendi kowa hamuhekire. ⁶ Awo ne haroyitha mitjima dhagho yira madhiko, omu hana kwangera ghutaterera. Hayothi ghuroto wagho ne kurara ghuthiku ghoghuheya; Mathiku-thiku ne kutumbuka yira mudiro ghomaretha. ⁷ Waheya hapyaghana yira madhiko nohapagha haghaturi wagho; Mafumu ghagho ghomaheya ne hafa. Noyofotji temba ghana ku-Nitha ⁸ Ephraim ne ghakupakerera thinda mwawanu; Ephraim ne thikuki ethi hapira kupirura. ⁹ Hamutunda kure ne hapagha mangcamu ghendi ene mbadi ghayidimuka. Mvi ne ghodhi nopapendi dhidi ene mbadi ghana kuyidimuka. ¹⁰ Nomakununekero gha-Esreali ne kugha monenena murupara rwendi ene mbadi hana kupiruka kwaHekudyagho Nyambi endi hamushane muyinu yoyiheya yi. ¹¹ Ephraim ne yira dikutji dyodiyero, dyokupira maghano, awo ne kwitha haka Egyptena nokuyenda ku-Assyria. ¹² Kehe ku hana kuyenda, mbona wedherera dikwe dyange kukwagho; Mbona wawitha pamuve yira yinyunyi yomuwiru; Mbona wahumbitha kukutha kuma kughongawedhero pofotji ghagho. ¹³ Toko-toko kukwagho, pamurandu eshi hashwagha kukwange! Mepithero ne kukwagho, pamurandu eshi hani harwera! Ngambi kenge eshi nawa shuture ene haghamba mbango kuKwange. ¹⁴ Mbadi hadirera kukwange nomitjima dhagho, apa hadirire pama ghudidi ghawo. Awo ne kwiya pofotji kughuheke ghomukesho wagho noku vinyu ghomupya. ¹⁵ Ngambi kemo eshi nawa deghure nokutanaritha moko ghagho, ene hana Nimanganyena. ¹⁶ Awo ne hahukire ene mbadi kwaNyambi Shokuru. Awo ne yira ndamba edhi hameta kumaghuwa ghagho, hama fumu ghana wagho ne mbohana ghu kuthimende, kuthikuto thomarudimi ghagho. Eyi ne mboyina kara mahekitho muditunga dya-Egyptena.