¹ Muyuve yi amwe mwa pristeri! Muteghe kutwi nomuthotere amwe mwandhugho dha-Esreali! Teghe kutwi owe ndhugho dhafumu! Matetero ndhango ne ghana kumu kukoye, yoyishi ghuna kara thiraha tha-Mizpah nogho dishire kwa-Tabor. ² Haka widhi ghomukungu ne kuna kukuhatithera mughupayi ngambi nina kuwa kenyapera. ³ Nadimuka Ephraim na-Esreali mbadi ghonda kukwange, pano keho we Ephraim, watenda rungu na-Esreali ne ghapwa kunyateka. ⁴ Mbadi wakughorora yiruwana yagho, eshi hapiruke kwaNyambi wagho, pamurandu eshi mupepo ghorungu mukatji kagho ghudi nombadi hadimuka Hekudyagho. ⁵ Makununekero gha-Esreali ne ghakuneya murupara rwendi; Yodiyo, Esreali na-Ephraim ne kupundaghuka mumaharwero ghagho; na-Juda naye ghana kupundaghuka nagho. ⁶ Nomitanga dhoyimuna yagho mbohayenda hashane Fumu Nyambi ene mbadi mboha muwana; Aye ne ghawa yakunuka. ⁷ Awo ne hapira ghutawedhi kwaFumu Nyambi, awo ne hawana hana hoha hayidena. Pano keho kaghonda kokapya ne mbokana wangambwera noghupingwa wagho. ⁸ Shiye dinyiha dyondjwi ghomurume mu-Gibeah no rumbendo mu-Ramah! Kugherere nokakugho kashokuru ku-Beth Aven, thetuke munyima owe Benjamin! ⁹ Ephraim ne mboghana pu kuhanyaghura mudiyuwa dyoghukenya; Mumushovo wa-Esreali ne nakutenda eyi yidi eshi yaghushemwa. ¹⁰ Hama fumu ghana wa-Juda ne yira haka kushwayitha mirurwani; Mbona wanotwera ghukenya wange yira meyu. ¹¹ Ephraim ne ghengena murupetho nokutetaghura mumatetero ndhango, pamurandu eshi ghahimine mukukutha yitjwandjo. ¹² Mbona kara yira mambimbidhi kwa-Ephraim noyira yinu yokwora mundhugho dhaJuda. ¹³ Apa Ephraim ghamonine yikorwa yendi na Juda ne ghamonine yitombo yendi; Ephraim ne ghayendire ku-Assyria nokutuma kwafumu Jareb ene mbadi mbogha kona kwirukitha yitombo yoye. ¹⁴ Pano keho ne mbona kara yira nyime kwa-Ephraim nokukara yira dihepa kundhugho dha-Juda. Ame ne mbona wadjadjaghura nokuwa yakunuka; mbona washwayitha nombadiko yu mbogha waghamwena. ¹⁵ Mbona hukera karo mudyango Dyange, kate hakudimuke mirandu dhagho. Ndani mbohana shana rupara Rwange; mumaghukukutu ghagho, mbohana nishana."