¹ Muyuve diywi dyaFumu Nyambi, amwe mwahana Esreali, Fumu Nyambi ne ghana kureta matetero ndhango kowa hatunga mudyango di. Mbadimo ghushemwa, mathiyerero noghudimuki waNyambi muditunga. ² Pamedhero nombango, ghupayi, widhi nomatjorero ghoghuruwo ne kuna kuneghedha eshi hatjora nungathano, oyina kukara keho eshi thinyinga ne kuna kukuwedherera. ³ Yodiyo, ditunga di ne mbodina kara muthidiro; nayomuheya ghatunga mo ne mboghana pu kukashitha noyiyama yomumuthitu, yinyunyi yomuwiru nothi dhomudikuruviya ne mbodhina pu kushimba. ⁴ Pano keho ne mwakutetera ndhango; mwahanu maghana nawa pristeri ne mwaheya pofotji. ⁵ Yodiyo, mbomuna pundaghuka mudiyuwa dyo; hapumbi nagho ne mbohana pundaghuka nenu paghuthiku nombona hanyaghurapo hanyokwenu. ⁶ Hanu wange ne kuna kufa pamurandu ghokupira ghudimuki. Pamurandu eshi mwanyatha ghudimuki, name nina kumunyatha mukukara mwapristeri wange; Yoyishi mwavurama muragho waNyambi wenu, name mbona vurama hana hoka wenu. ⁷ Momu hana kukuwedherera, nodyoha kukuwedherera kuni harwera; Mbona tjindji dikuto dyagho dikare thihonyi. ⁸ Awo ne kuna ku kukoreritha nodiharwero dyawanu wange; hatura mitjima dhagho pamaharwero ghagho. ⁹ Mbohana kupitura, hanu maghana nawa pristeri. Mbona wahumbitha pamurandu ghomandhira ghagho nokuwa ruwera pamurandu ghombuto dhagho. ¹⁰ Mbohana di ene mbadi mboyirikanyena; mbohana tendi rungu ene mbadi mboyi kuwedherera, pamurandu eshi hashayeka kukutekera Hekudyagho. ¹¹ Rungu, vinyu novinyu ghomupya ne yatura mitjima dhagho mukashitiko. ¹² Hanu wange ne kushana maghamweno kuyitjwandjo yokuyuwa, noyiruwanitha yagho ne kuna kuwapa mahuthero. Mupepo ghorungu ne ghuna wayakunutha kukwange nohana tendi rungu naNyambi wagho. ¹³ Awo ne kutupura muyambo pawiru dhomarundu nokutumekera hapo pamarundu, mwishi dhoyitondo yokukutjaka-tjaka, pamurandu eshi mumvure wayo ne ghuwa. Yodiyo, hanenu hohambuyama ne hatenda rungu nawa hadi muwenga ne hatjora ghuruwo. ¹⁴ Mbadi mboni humbitha hanenu hohambuyama ngeshi hana tendi rungu karo, endi awa hadi muwenga ngeshi hana tjoro ghuruwo karo; Hatutughuru hathinda ne kukuyakunuka nawa karungu nokutenda muyambo nawa mbuyama harungu. Yodiyo, hanu awa hapira matjwathaneno ne mbohana ghu. ¹⁵ Ngambi kemo eshi amwe mwaka Esreali ne mwatenda rungu, ene mbadi ghakona kukara Juda murandu. Mbadi mwakona kuyenda ku-Gilgal endi muyende ku-Beth-Aven endi mutape medhero ghughamba eshi, "Kenge yikara eshi Hekudyetu ne muyumi." ¹⁶ Esreali ne ghudhina karo, yira ndana ghoghudhina karo; Pano keho Fumu Nyambi ne mboghana korera nomuhonyi yira ndji mudiyana. ¹⁷ Ephraim ne ghakupakerera noyitjwandjo; Muthiye ghakare pithendi. ¹⁸ Yinwa yagho ne yakara yira widhi ghomukungu, awo ne kutwikera kutenda rungu. Haraghuri wendi ne hahaka dishwahu. ¹⁹ Mupepo ne wakwata mando ghendi nombohana shwahuka pamurandu ghomiyambo dhagho.