¹ Munyima dhoyi, mughupiterithi wafumu Artaxerxes, fumu wa-Persia. Ezra ghomwana Seraiah, ghomwana Azariah, ghomwana Hilkiah. Ghomwana ² Shallum, ghomwana Zadok, ghomwana Ahitub, ghomwana ³ Amariah, ghomwana Azariah, ghomwana Meraioth, gho mwana ⁴ Zerahiah, ghomwana Uzzi, gho mwana Bukki, ⁵ ghomwana Abishua, ghomwana Phinehas, ghomwana Eleazar oyu ghakarire eshi mwana Aaron mupristeri shokuru. ⁶ Ezra ne ghakeyire kutunda kuBabylon nogha karire muka marukwaro ghomanongwahu mumuragho waMosesi, oghu ghatapire Nyambi wa-Esreali. Fumu ne ghamupire yoyiheya eyi ghakumbere noyoyishi dyoko dyaFumu Nyambi ne nendi dyakarire. ⁷ Hamweya hana hoka wa-Esreali, hapristeri, haLevite, hembi homungirishe, hakungi makorogho nawa hatorore mukuruwana mungirishe heyire kuJerusalem mumwaka ghoghukwoko-wadi wafumu Artaxerxes. ⁸ Ezra ne ghana kumine muJerusalem mukaghonda koghukwoko, mumwaka ghoghukwoko-wadi wafumu Artaxerxes. ⁹ Mudiyuwa dyokutanga dyokaghonda kokutanga ghafungurukire noruyendo rwendi kutunda kuBabylon nomudiyuwa dyokutanga dyokaghonda koghukwoko ne ghana kumine muJerusalem. Thika dyodi yakarire eshi dyoko dishaghuwa dyaNyambi ne nendi dyakarire. ¹⁰ Ezra ne gharoyithere mutjima wendi kushana muragho dhaFumu nokudhikumithamo nokuhonga miragho noyirika mu-Esreali. ¹¹ Ethi ne thidamu-damu thombapira edhi ghatjangire fumu Artaxerxes nogha dhitapire kwa-Ezra ghomu pristeri, muka marukwaro ghombudhi dhomarawero ghaFumu Nyambi nomayendithitho gha-Esreali. ¹² Artaxerxes fumu wawa mafumu, kwamupristeri Ezra, muka marukwaro ghomuragho dhaNyambi ghomudiwiru. ¹³ Nakutapa muragho eshi kehe yu ghashwagha ku-Esreali ghono ghadi mumarawero ghange pofotji nawa pristeri nawa Levite noghana himi kuyenda noye kuJerusalem ne ghayende. ¹⁴ Kokuhe oku nakuku tuma me nofumu nawa piterithi wange kwoko-wadi, mukepura kuhatera Juda naJerusalem kukutha muragho waNyambi oghu ghudi munyara dhoye. ¹⁵ Wakarete Siliveri noNgorondo eyi fumu nawa piterithi wendi hatapire nyara-nyara kwaNyambi wa-Esreali Oyu ghatunga muJerusalem. ¹⁶ Ghomuheya Siliveri noNgorondo eyi mbokawana mumikunda dhaBabylon nomuyambo ghonyara-nyara ghohanu nawa pristeri mboghupwe kutupura mundhugho dhaNyambi muJerusalem. ¹⁷ Podiyo keho eshi, karuwanithe sherenyi ghomuheya yu kughura mahove, ndjwi dhodhirume, ndjwi vene nomushungwa ghomuyambo nomuyambo ghoyinwa. Mbo yambe yinu yi pathinyaku mundhugho dhaNyambi muJerusalem. ¹⁸ Nokeheyi ghuna kumona eshi yiwa kukoye nokwawa yendhoye, muruwanitheko siliveri nongorondo oyu ghana thiyarako kudifumanekero dyaNyambi. ¹⁹ Noyiruwanitha yoyiheya eyi hana kupa yokuthiruwana thondhugho dhaNyambi, kayitape yoyiheya kwaNyambi ghoye muJerusalem. ²⁰ Nokehe thi mbothi kanyandiwa mundhugho dhaNyambi, wane yiruweritha yatho mundhugho dhomapungwero dhafumu. ²¹ Yame fumu Artaxerxes nakutapa muragho kwawapunguri waheya homumikunda edhi dhatungera kumbadi dhorware eshi; kehe yi shogha mukumbere Ezra gho mupristeri, mukamarukwaro ghomuragho waNyambi ghomuwiru ne mwakona kumupa mukuyarerera. ²² Yikume kuma siliveri dithere, thimetitho thomushungwa ghokukuma kudithere, thimetitho thovinyu ghokukuma kudithere, thimetitho thomaghadhi ghokukuma kudithere nomungwa kupira kurikanyitha. ²³ Kehe yino ghana rawera Nyambi ghomuwiru, yipwe kuruwana thiwana kundhugho dhaNyambi ghomuwiru. Pashanye showiyere ghukenya wendi kughufumu wafumu nohanendi? ²⁴ Nakumudimukitha karo eshi; mbadi shoyikare pathina muragho ngeshi mushweneke mutero nondupu kwawa pristeri, haLevite, hembi, hakungi makorogho endi kwakehe wa hapa thitumbukera thoyiruwana yomungirishe ngambi hapikendi homundhugho dhaNyambi. ²⁵ Owe Ezra, kukutha kughunyanyami oghu ghakupa Nyambi, wakona kuneya haghaturi mukutheka hanu waheya kumikunda edhi dhatungera kumbombwa dhorware, ruwanene waheya awa hadimuka muragho waNyambi ghoye. Wakona kuhonga waheya awa hapira kudimuka muragho. ²⁶ Keheyu mba pira kukutekera muragho waNyambi nowa fumu, munu yo ne ghapwe kughatura wangu-wangu, kuyifa ndi, kumutjidha mudyango ndi, kumukungura yiwana yendi ndi endi kumuyandherera mukashitiko. ²⁷ Fiyaghudhi kwaFumu Nyambi wawa kerekandongo wetu, oyu ghatura yoyiheya yi mumutjima wafumu, muku tapa difumanekero kundhugho dhaNyambi muJerusalem. ²⁸ Nogha wedherera ghunongo wendi kwafumu noha piterithi wendi nawa mafumu ghana wendi. Napwire kutanaritha panyara dhaFumu ghoNyambi wange no naghongawedha hatutughuru hohapiterithi wa-Esreali hayende nange.