¹ Awa ne hakerekandongo ghomadhiko no edi ne dyoha kurandathana awa nayendire nagho kushwagha muBabylon, mu ghuraghuri wafumu Artaxerxes. ² Hana Phinehas, Gershom; ghomwana Ithamar, Daniel ghomwana David, Hattush. ³ Hana Shecaniah, ghomwana Parosh, Zechariah no aye ne ghatjangithire omu hakumine ku dithere nomakumi-kwoko hatutughuru. ⁴ Hana Pahath-Moab, Eliehoenai ghomwana Zerahiah aye ne ghakarire nawa tutughuru mathere mawadi. ⁵ Hana hoka wa-Shechaniah, Ben-Jahaziel no aye ne ghakarire nawa tutughuru mathere mahatu. ⁶ Hana Adin, Ebed ghomwana Jonathan no aye ne ghakarire nawa tutughuru makumi-kwoko. ⁷ Hana Elam, Jeshaiah ghomwana Athaliah, no aye ne ghakarire nawa tutughuru makuni kwoko-wadi. ⁸ Hana Shephatiah, Zebadiah ghomwana Micheal ne hakumine kumakumi kwoko-hatu ghoha tutughuru. ⁹ Hana Joab, Obadiah ghomwana Jehiel ne hakumine kuthivarero thokukuma kumathere mawadi noha tutughuru dikumi nokwoko-hatu. ¹⁰ Hana Shelomith, Ben-Josiphiah ne hakumine kudithere nomakumi kwoko-fotji. ¹¹ Hana Bebai, Zechariah ghomwana Bebai ne ghakumine kumakumi mawadi nohatutughuru kwoko-hatu. ¹² Hana Azgad, Johanan ghomwana Hakkatan ne ghakarire nawa tutughuru dithere nodikumi dyofotji. ¹³ No hana Adonikam wo ne heyire munyima, agha ne mena ghagho Eliphelet, Jeiel na-Shemaiah ne hakumine ku makumi kwoko-fotji ghawa tutughuru. ¹⁴ Hana Bigvai, Uthai naZakkur ne hakumine kumakumi kwoko-wadi ghawa tutughuru. ¹⁵ Nawa ghongawedhere kurware oru rwatamba ku-Ahava notwatendire mwara padyangodi mayuwa mahatu. Nakona-konine hanu nawa pristeri ene nawanine eshi mbadipo hana hoka wa-Levi. ¹⁶ Natumene ha-Eliezer, Ariel, Shemaiah, Elnathan, Jarib, Elnathan, Nathan, Zechariah naMeshullam awa hakarire eshi hapiterithi na-Joiarib na-Elnathan awa hakarire eshi hahongi. ¹⁷ Nawapire marawero ghokuwatuma kwa-Iddo, mupiterithi mudyango dya-Casiphia no nawa tongwere eshi ngepi edi shoha kaghambe kwa-Iddo nohayendhendi, haruwani homungirishe awa hatunga mu-Casiphia eshi ngo gha katume hapikendi homundhugho dhaFumu Nyambi. ¹⁸ Ndani panyara dhishaghuwa dhaNyambi wetu ne netu dhakarire, hatutumene katughuru ghomatjwathaneno, ghomwana Mahli, ghomwana Levi, ghomwana Esreali, gheyire nawa tutughuru dikumi nokwoko-hatu, ha-Sherebiah noha minendi. ¹⁹ Hashabiah ne gheyire na-Jeshaiah hana hotutughuru wa-Merari, haminendi nohanagho hotutughuru, kuwapakerera ne makumi mawadi. ²⁰ Karo nawa ghapire thitumbukera thokuruwana mungirishe, awa fumu David nawa pikendi hatorore muthiruwana thoghu Levite ne mathere mawadi nohanu makumi mawadi noyofotji. Waheya hawanine thitumbukera thi pamena ghagho. ²¹ Naturithirepo madhirerekedho kurware rwa-Ahava, podiyo eshi tukumbirupithe twathinda kughutho waNyambi wetu. Kukumbera kukwendi ndhira dhodhiwa kukwetu, kwawanetu nokuyiwana yetu yoyiheya. ²² Nafire thihonyi mukukumbera kwafumu ghatupe mashurundate nawa dhini mbi ghokutu thindekedha nokutu ghamwena kwawa nyathi mundhira, pamurandu eshi naghambire kwafumu eshi; "Dyoko dyaNyambi wetu ne pawaheya awa hana kumushana ene ghukenya wendi ne pawa hamunyatha. ²³ Twadhirerekedhire nokuraperera, kudirera kwaNyambi naye ghatu yuverere mandapero ghetu." ²⁴ Thokurandako ne natorore hatutughuru dikumi nohawadi, hapiterithi wawa pristeri; Sherebiah, Hashabiah nohaminagho dikumi. ²⁵ Navihire siliveri, ngorondo noyiruwanitha yimweya nomuyambo ghomundhugho dhaNyambi, oghu fumu nawa pikendi, hapiterithi wendi nawa Esreali waheya awa hakarirepo eyi hatupure nyara-nyara. ²⁶ Navihire pamanyara ghagho mathere kwoko-fotji nomakumi kwoko ghosiliveri, masiliveri dithere, ngorondo dithere dyofotji, ²⁷ yinwitha yongorondo makumi mawadi, eyi yakumine kudiyovi dyofotji dyomasherenyi, noyishimbera yiwadi yoyikuvo, eyi yapwa kutenda thiwana, yishaghuwa yira ngorondo. ²⁸ Nonaghambire kukwagho eshi; "Mwapwa kutorwera kwaFumu Nyambi noyiruwanitha yino, nosiliveri nongorondo ne yoyiheya yidi eshi ndupu dhomuyambo kwaFumu Nyambi, Aye ne Nyanbi wawa kerekando wenu. ²⁹ Mutokomene nomuyikunge kate mwaka yivihe kwawa pristeri nawa Levite nawa mayami gho mu Esreali muJerusalem mumangonda ghomundhugho dhaNyambi. ³⁰ Hapristeri nawa Levite ne hatambure siliveri, ngorondo noyiruwanitha eyi havihire podiyo eshi hakuyi tware kuJerusalem, kundhugho dhaNyambi. ³¹ Twafungurukire kushwagha kurware rwa-Ahava mudiyuwa dyodikumi nodyoghuwadi dyokaghonda kokutanga tutambe kuJerusalem. Dyoko dyaNyambi wetu ne papetu dyakarire; Ghatukungire munyara dhawa nyathi wetu, nakeheyu ghahimine kutwipitha mundhira. ³² Twanengenine muJerusalem notwana karire mo mayuwa mahatu. ³³ Mudiyuwa dyoghune ne havihire siliveri, ngorondo noyiruwanitha mundhugho dhaNyambi, nokuyitapa mumoko gha Meremoth ghomwana Uriah ghomupristeri. Aye ne ghakarire na-Eleazar ghomwana Phinehas, naJozabad ghomwana Jeshua naNoadiah ghomwana Binnui ghomu Levite. ³⁴ Thivarero nothiviha ghoyoheya yapwire kukona-kona thiwana. Thiviha thothiheya thapwire kutjanga mughuthiku wowo. ³⁵ Awa haka karire mughupika, pakuna kuma ne hana tendire muyambo ghokutumekera kwaNyambi wa-Esreali: Mandwedho dikumi nomawadi kwawa Esreali waheya, Ndjwi dhodhirume makumi kwoko-ne nokwoko-fotji, Ndjwi makumi kwoko-wadi nokwoko-wadi noyikungwe dikumi noyiwadi yomuyambo ghomaharwero. Yoyiheya ne yakarire muyambo ghokutumekera. ³⁶ Popo kokutapa marawero ghafumu kwawamayami ghendi nokwanguvuru ghokumikunda dhatungera kumbombwa dhorware noha ghamwene hanu nondhugho dhaNyambi.