¹ Fumu Darius ne ghaturithirepo muragho noha shanine mundhugho dhomapungwero, omu hapungwere ghushwi ghomu Babylon. ² Mu-Achmetha, mumbara dhafumu hawanine rukwaro nombudhi dhamo ne; ³ Mumwaka ghokutanga wafumu Cyrus ne, ghaturithirepo muragho kuhatera ndhugho dhaNyambi muJerusalem: Ndhugho dhaNyambi ne haka dhitendurure, dyango dyokutupwera ndupu nomatatekitho ghadho ne ghakapwe kutenda, ghure wadho ne manaro kwoko-fotji nomuna ghuyaghuyu wadho karo ne manaro kwoko-fotji. ⁴ Mutara dhihatu dhokufughanyeka dhomawe ghomakuru nomutara ghumweya ghomitambo dhoyitondo noyiruwana mboyipwe kuyiruwera ndhugho dhafumu. ⁵ Mushwayithe yiruwanitha yoyiheya yongorondo noyo siliveri yomundhugho dhaNyambi, eyi ghaka shimbire Nebuchadnezzar kayireta kuBabylon kutunderera mungirishe dhomu Jerusalem. Mwaka yiture mundhugho dhaNyambi. ⁶ Pano keho ne Tattenai ghonguvuru ghomikunda dhokumbombwa dhorware, Shethar-Bozenai nawa yendhagho hokumikunda dhokumbombwa dhorware ne muyakunuke ko! ⁷ Muthiye thiruwana thondhugho dhaFumu Nyambi thiyende kughutho. Nguvuru nawa kuru wawa Juda mbohana tendi ndhugho dhaNyambi mudyango diya. ⁸ Nakumupa muragho eshi muyitendere hakuru wawa Juda awa hana kutenda ndhugho dhaNyambi. Mukashimbe mutero wafumu kumikunda dhakarera kumbombwa dhorware, noturuwere hatutughuru wa podiyo eshi yiruwana yagho ne mbadi yimane. ⁹ Nokehe thi hana kunyanda, mandwedho ghana, yikungwe yondjwi nondjwi dhomuyambo ghokutumekera kwaNyambi ghomudiwiru; mahangu, mungwa, vinyu nomaghadhi kumarawero ghawa pristeri muJerusalem. Muwape yinu yi kehe diyuwa kupira kuvumwa nodiyuwa dyofotji temba. ¹⁰ Mutende yinu yi podiyo eshi; Harete ndupu dhokukugha Nyambi ghomudiwiru nokuraperitha moyo wafumu nohanendi. ¹¹ Naturithapo muragho eshi keheyu ghokutjora muragho ghu ne; mutambo ghokudhugho dhendi haghu shwayithe ko nokumu ghangerera po. Nondhugho dhendi ne hana kudhipirura dirambo dyoyitjoro pamurandu oyi. ¹² Nyambi oyu ghatawedhera dina dyendi ditunge mo, ngogha hanyaghure kehe fumu nohanu awa mbatjora muragho ghu endi kwipitha ndhugho dhaNyambi muJerusalem. Yame Darius nakutapa muragho ghu nomuyitende thiwana. ¹³ Pamurandu ghomuragho oghu ghatumine fumu Darius, Tattenai ghonguvuru ghomikunda dhokumbombwa dhorware, naShethar-Bozenai nawa yendhagho ne haruwanine yoyiheya thika dyodi gharawere fumu Darius. ¹⁴ Hapiterithi wawa Juda ne hatendire noyawa tombokire pama pumbero ghaHaggai ghomupumbi naZechariah hana Iddo. Hamanine thiruwana thokutenda matungo kukutha marawero ghaNyambi wa-Esreali nomarawero gha-Cyrus, Darius na-Artaxerxes mafumu ghoku Persia. ¹⁵ Ndhugho ne dhapwire mudiyuwa dyomakumi mahatu ghokaghonda ka-Adar, mumwaka ghokwoko-fotji ghoghuraghuri wafumu Darius. ¹⁶ Ndani hana Esreali, hapristeri, halevite nawahe awa hana karire mughupika ne hashamberere kumatungekero ghondhugho dhaNyambi. ¹⁷ Hatupure mandwedho dithere, ndjwi dhodhirume dithere nondjwi mathere mane mukutungeka ndhugho dhaNyambi. Yikungwe dikumi noyiwadi nayo yapwire kutupura kumuyambo kumaharwero kwawa Esreali waheya, kungwe ghofotji kudiko dyofotji mu-Esreali. ¹⁸ Harongekire karo yitumbukera yawa pristeri nawa levite kukutha mumakuyakunukero ghoyiruwana yagho kwaNyambi muJerusalem, thika dyodi yapwa kutjanga mumbapira dhaMosesi. ¹⁹ Awa haka karire mughupika ne hadjabwane Paska mudiyuwa dyodikumi nodyoghune ghokaghonda kokutanga. ²⁰ Hapristeri nawa Levite waheya ne hakukenithire hathinda; waheya hakenine. Hapayire ndjwi ghomuyambo gho Paska kwaheya awa haka karire mughupika, kwawa yendhagho hapristeri nokukwagho hathinda. ²¹ Hanu hamu-Esreali awa hadire nyama ghoPaska ne wowa hakashwayire mughupika nowa haku yakunuthire hathinda kunyata dhomuditunga podiyo eshi hahenye pepi naFumu Nyambi, no Aye ne Nyambi wa-Esreali. ²² Hadjabwanine thirika thi thoghuroto ghothuthungunyi mumayuwa kwoko-wadi yoyishi ne Nyambi ne ghana waretera karo yishamberera nogha pirure mitjima dhawa mafumu wawa-Assyria ghatanarithe manyara ghagho kuyiruwana yondhugho dhendi, ndhugho dhaFumu Nyambi wa-Esreali.