¹ Ijwi lya Jehova wamakamu lyakandisikila, kalyaamba kuti, ² ''Jehova waamba oobu: Ndime sibuzuba a Ziyoni abuzuba bupati loko, alimwi ndamusungwalila achabukali bupati loko! ³ Mbuboobu mbwawamba Jehova wamakamu: Ndaboola ku Ziyoni alimwi ndiyokkala akkati ka Jelusalemu, nkambo Jelusalemu uyoyitwa kuti dolopo lyakasimpe achilundu cha Jehova wamakamu chiyoyitwa Kuti Nchilundu Chisalala! ⁴ Jehova wamakkamu waamba obu: Maneene amachembele bayooba alimwi mumigwagwa ya Jelusalemu, alimwi muntu woonse uliyanda mufunko mujanza lyakwe nkambo unoli wacheembaala loko. ⁵ Migwagwa yadolopo iyozula balombe abasimbi balisenia muli njiyo. ⁶ Jehova wamakkamu waamba oobu: Kuti chimwi kachilangika aanga tachikkonzeki mumenso abantu bacheede kumazuba aayoo mazuba, sa chilalangika anga chilakkachila mumenso angu? -- mbuboobu Jehova mbwawamba. ⁷ Jehova wamakkamu waamba oobu: Amubone, ndaamba kuvuna bantu bangu kuzwa kunyika yakujwe akusikila kunyika yakumbo! ⁸ Nkambvo njobapilusya, alimwi bayokkala akkati ka Jelusalemu, aboobo bayoba bantu bangu lubo, alimwi njooba Leza wabo mukasimpe amubululami! ⁹ Jehova wamakkamu waamba kuti: Lino inywebo nimwinkilila anembo akumvwa ijwi ndilyonya eelyo lyakazwa kumilomo yabasinsimi eelyo intalisyo yang'anda yangu niyakabikkwa --eyi ning'anda yangu, Jehova wamakkamu: Kamusimya maboko abobiya kuti intempele iyaakwe. ¹⁰ Nkaambo kusule lyamazuba aayo takwe zilimwa pe nikuba kumuntu naba munyama, alimwi tekwakali lumvwanano pe kuzwa kuli basinkondo kuli uyinka naba uboola. Ndabikka kuti muntu woonse alwisye simayakenyina. ¹¹ Pesi kwalino takukoyoba mbuli mumazuba akamana pe, njooba antoomwe abacheede babantu aaba -- aayaa ngimalayilile a Jehova wamakkamu. ¹² Nkambo imbuto zyaluumuno ziyobyalwa; musansa uyobelela uyopa michelo yawo anyika iyoopa zilyo zyayo; ijulu liyoopa luume lwalyo, nkambo njochita bacheede babantu aba kuti bakkone zintu ezi. ¹³ Wakali chikkozyanio kulizimwi zisi alutuko, ng'anda ya Juda ang'anda ya Izilayeli. Aboobo njokunununa lwako webo alimwi uyoba chilongezyo. Utayoowi; Koyumya maboko aako! ¹⁴ Nkambo Jehova wamakkamu waamba oobu: mbuli mbundakabambide kukuchisa eelyo bamawuso nibakandikalazya -- mbwawamba Jehova wamakkamu -- akutaleka bukkali, ¹⁵ aboobo njobamba muli aya mazuba kuchita bubotu lubo mu Jelusalemu ang'anda ya Juda! Utayoowi! ¹⁶ Eezi nzezintu nzoyelede kuchita: Waamba kasimpe, kumuntu woonse asimayakilane wako. Ubeteke chakasimpe, akululama, aluumuno mumilyango yanu. ¹⁷ Mutabambi kuchita bubi pe mumyoyo yanu kuli umwi awumwi, alimwi mutayandi zikonke zyakubeja -- nkambo eezi nzezintu nzinsulide! aaya ngemalayilile a Jehova.'' ¹⁸ Mpawo ijwi lya Jehova wamakkamu lyakandisikila, lyakati, ¹⁹ ''Jehova wamakkamu waamba obu: Kulyiimya kwamweezi waane, akwamweezi wasanu, awamusanu, awamusanu ayibili, awamwezi wakkumi ayooba zyiindi zyakukkondwa, akubotelwa, akusekelela pobwe lyang'anda ya Juda! Kuzwa waawo amuyande kasimpe aluumuuno! ²⁰ Mbuuboobu Jehova wamakkamu mbwawamba: Bantu bayooboola lubo, nikuba aabo biingi bakkala mumadolopo miingi asiyenesiyene. ²¹ Bantu bakkala mulilimwi dolopo baloyinka kuli limbi dolopo akwaamba kuti, 'Atufwambane twinke tukakumbile kunembo lyabusyu bwa Jehova akuyo yanduula Jehova wamakkamu! Iswe lwesu tulayinka.' ²² Bantu biingi azisi zilanguzu ziyobola kukulanguula Jehova wamakkamu mu Jelusalemu akakumbila luzyalo kuli Jehova! ²³ Mbuboobu mbwawamba Jehova wamakkamu: Kulaayo mazuba baaluumi balikkumi kuzwa kumulaka woonse azisi bayojata lupimpito lwachikobela chamu Judaakwamba kuti, 'Atweende anduwe, nkambo twaamvwa kuti Jehova ulanduwe!'''