¹ Jula milyango yako, Lebbanoni, kuti mulilo ukatente misida yako! ² Kolila omusamu waSipulasi, nkaambo munsamunyokwe munsida wawa ! Yakali aabulemu yanyonyoka! Kolila, Omubanga waku Basyani, nkaambo lusaka loonse lulitentedwe. ³ Kulokumvwikka kulila kwabeembeli, nkaambo bulemu bwabo bwakamwayisigwa! Kulijwi lyakuvuluma kwabana babalavu, nkaambo kulisumpula kwamulavu jodani kwamwayisigwa! ⁴ Mbuboobu Jehova Leza wangu mbwambuula, ''Mbuli mweembeli mbalanga butanga bubambilidwe kujayigwa! ⁵ (Aabo bazyuula balazijaya alimwi tabakwe mulandu pe, abasikuzyuuzya balaamba kuti, 'Jehova ngalongezegwe! Ndaba muvubi! nkaambo beembeli babelekela butanga bamunaazyo tabakwe nsoni anzizyo.) ⁶ Nkaambo nsikoyoobafwida nsoni kunyika njebakkala! - ooku nkwaamba kwaJehova. Bona! Ime lwangu ndemwini ndaba afwiifwi kusandula muntu woonse kwiindila kujanza lyasimabambanwe wakwe amujanza lyaMwami wakwe alimwi bayomwaya nyika alimwi takukwe womwe ngwendiyovuna kuzwa mujanza lyabo.'' ⁷ Aboobo ndakaba mweembeli wabutanga buyanda kujayigwa nkaambo kababo basambala mbelele. Ndakabweza misako yobile; umwi musako ndakawulika kuti ''Luzyalo'' alimwi umwi ''Kujatana.'' Muliyeeyi nzila ndakeembela butanga. ⁸ Mumwezi womwe ndakajaya beembeli batatu. Tendakaba aalwetelelo pe ambabo, alimwi bakalindisulide. ⁹ Mpawo ndakati kulibanaazyo, ''Nsikoyoobeleka mbuli mweembeli wako pe limbi. Imbelele eezyo zilimukufwa ngazifwe biyo; imbelele eezyo zilimukunyonyoonwa - azyalo ngazinyonyoonwe. Mbelele eezyo zisyeede imwi ayimwi ngayilye nyama yasimabambane wayo.'' ¹⁰ Aboobo ndakabweza musako wangu ''Luzyalo'' ndawutyola kukutyola chizuminano nchindakali ndachita amazyalane aangu. ¹¹ Mubuzuba oobo chizuminano chakatyolwa, alimwi kuli aabo bakalikuuzya mbelele abakali kundilanga bakaziba kuti Jehova wambuula. ¹² Ndakati kulimbabo, ''Na kazili zibotu kulindinywe, mukandiliye mufolo wangu. Pesi na kakutali boobo, mutachiti.'' Aboobo bakandiphimina - zimpati zili makkumi otatwe zyansiliva. ¹³ Mpawo Jehova wakati kulindime, ''Waala nsiliva muchibikilo, kumufolo mubotu loko ngobakulemya anguwo!'' Eelyo ndakabweza tumpanzi twansiliva tuli makkumi otatwe alimwi ndakazibika muchibambilo chang'anda yaJehova. ¹⁴ Mpawo ndakatyola wachibili musako, ''Lujatano,'' kutyolabuzolwane aakati kaJuda aIzilayeli. ¹⁵ Jehova wakati kulindime, ''Alubo, bweza zibelesyo zyabeembeli bafubafuba zibe zyako, ¹⁶ nkaambo bona, ndaamba kukubika mweembeli mubusena bwanyika. Takoyoozibamba pe mbelele zifwidilila. Takoyooziyanduula pe mbelele zisweekede, nikuba kusilika mbelele zityokede. Takoyoosanina mbelele zifwefwema, pesi uyoolya nyama yambelele zineneede alimwi uyokwamuna nzumba zyazyo. ¹⁷ Mawe kubeembeli batakwe lugwasyo balekela butanga bwabo! Ipanga ngalisike kumulwisya kujanza lyakwe akulinso lyakululyo lwakwe! Ijanza lyakwe likanyane alimwi linso lyakwe lyakululyo likoofwale!''