¹ Amukumbile imvula kuli Jehova muchindi chachilimo -- Jehova uchita indabo -- alimwi nguupa boonse imvula azisyu zyamyuunda. ² Nkambo zikozyanio zyamizimu zyambuula bubi; basondi nzibabona nzyakubeja; balaamba ziloto zyakubeja akupa lumbulizyo lutagwasyi, aboobo nchibasweeka mbuli mbelele akupenga nkambo taakwe mwembeli pe. ³ ''Bukali bwangu busikila bwabukila bwembeeli; mbasipule bempongo -- bazuluzi -- aboo njobapenzya. Jehova wamakamu alimwi uyogwasya butanga bwakwe, ing'anda ya Juda, akubachita mbuli bbiza munkondo! ⁴ Kuli Juda kuyozwa ibbwe lyachooko; kuli nguwe nkwiyoozwa inkanka yateente; kuli nguwe nkukutakazwe buta bwankondo; kuli nguwe bazuluzi boonse nkubayoozwa aamwi. ⁵ Bayooba mbuli basilumamba basinguzu balyatawula basinkondonyina mubutope bwamumigwagwa munkondo; bayochita nkondo, nkambo Jehova ulamba oobo, alimwi bayowusisya aboo basikweenzya mabbiza ankondo. ⁶ Njoyumya ng'anda ya Juda akufutula ng'anda ya Josefa, nkambo njobachitulula akubafwida luzyalo. Bayoba mbuli kuti tendakabatakatide pe, nkambo ndime Jehova Leza wabo, alimwi njobavwiila. ⁷ Mpawo Efulemu uyoba mbuli silumamba, amyoyo yabo iyokondwa mbuli basikunywa wayini; bana babo bayobona akusekelela. Myoyo yabo iyosekelela muli ndime! ⁸ Njobiita akubabungania nkambo njobavuna, alimwi bayovula mbuli mbubakabede, kalekale! ⁹ Ndakabamiza akkati kabantu, pesi bayondiyeeya mebo kuzisi zili kule, aboobo lwabo abana babo bayopona akuboola. ¹⁰ Nkambo njobaboozya kuzwa k unyika ya Ijiputi akuyobabungania ku Asiliya. Njobaboozya kunyika ya Giliyadi aku Lebbanoni mane do katutachikwe busena bwabo pe. ¹¹ Njoyinda akkati kalwizi lwamachise aabo; njowuma mayuwe alwizi oolo alimwi njoyuminizya bboonze lyamaanzi a Nayili. Abulemu bwa Asiliya buyoselusigwa, ankoli yabwami yaku Ijiputi kuzwa kubantu baku Ijiputi. ¹² Njobayumya lwangu, alimwi baloyenda muzina lyangu -- mbuboobu Jehova mbwawamba.''