Mwalumi kawambuula kumwanakazi, ¹ Akaka, ulimubotu, omuyandwi wangu, ulimubotu. Menso ako ninziba kusule achisitilizyo chako. Masusu aako mbuli butanga bwempongo buseluka kuzwa kuchilundu cha Giliyadi. ² Meno aako mbuli butanga bwambelele, buyobutanta kuzwa kubusena bwakusanzigwa. Ayimwi nkila mambile alimwi nkaatakwe yafwidwa. ³ Milomo yako mbuli busumyo busalala; mulomo wako mubotu. Maseya alimbuli zimpanzi zyamu pomegilanayiti kusule achisitilizyo chako. ⁴ Insingo yako ilimbuli ng'anda ya Davida iyakidwe mumindando yamabwe, ilaachuulu chentibi zyaba silumamba. ⁵ Inkolo zyako zyobile mbuli meja, mambile anjelele, zilokulya akati kamweemvwe. ⁶ Nkabutana kucha amyenzule kitana chija, Ndilaya kuchilundu chamulo akutulundu twamuunde. ⁷ Ulimubotu munzila zyoonse, omjyandwi wangu alimwi taakwe bubi kulinduwe. ⁸ Kweza ambebo ku Lebbanoni, omuyandwi wangu, zaambebo kuzwa ku Lebbanoni; Kweza kuzwa ajulu lya Amana, kuzwa ajulu lya Seni antomwe a Helimoni, kuzwa kukkomba lyabalavu, kuzwa kuchilundu chabasiluwe. ⁹ Wakabba moyo wangu, muchizangu, nabwinga wangu; webo wakabba moyo wangu, kwinda mukundilanga lumwi, abulungu bomwe munsingo yako. ¹⁰ Ndubotu biyeni luyando lwako, omuchizangu, bwinga bwangu! Ndubotu biyeni luyando lwako kwinda wayini, amuunde wamafuta kwiinda butwizyo. ¹¹ Milomo yako, o muyandwi wangu, ilosya buchi; buchi amalili zilikunsi alulimi lwako; muunde wazikobela zyako mbuli muunde waku Lebbanoni. ¹² Muchizangu, bwinga bwangu nchilili nchijalilide, kasensa kasinkidwe. ¹³ Ntabi zyako muundas waminsamu yama pomegilanayiti ilamichelo mibotu, alimwi njaku Hena amisamu yaku Naadi, ¹⁴ Naadi a Sfuloni, Kkalamasi a Sinamoni antomwe amisyobo yonse abutwizyo, mili a akanembe antomwe abutwizyo boonse bubotu. ¹⁵ Ulikasensa kachilili, sawu lyamanzi mabotu, ntulonga tukunka kuzwa ku Lebbanoni. Mwanakazi uwambula kumwalumi ¹⁶ Buka, muuwo wakunyika; kweza, luuwo lwakumusanza, wungila chilili changu kubutwizyo bwacho bugwisye muunde. Nichali kubota muyandwi wangu ngaaze kuchilili chakwe azolye imwi michelo mibotu yacho.