¹ Mwanangu, bamba majwi angu ubambe amilazyo yangu mulinduwe. ² Bamba milazyo yangu upone, bamba mulawo wangu mbuli chintu chiyandisi. ³ Zyaange ezi atunwe twako; zilembe amoyo wako. ⁴ Wambila busongo kuti, ''Ulimuchizangu,'' akwiita luzibo kuti mwenzinyokwe, ⁵ ikuti ulibambe kumwanakazi simamambi, mwanakazi utalilemeki, ulamajwi mabotu. ⁶ Ndakali langide ampulunguzyo yang'anda yang'anda yangu. ⁷ Ndakalanga ibantu batakwe maanu, akkati kabana balombe ndakabona muupya mufubafuba. ⁸ Ooyo mwana mulombe wakaselezya anzila iyakuchooko yakwe akululama ng'anda yakwe. ⁹ Kwakali mumutungazuba, igolezya, mudindi chamansiku amudima. ¹⁰ Mpawawo wakaswanizigwa amwanakazi, wakazweete mbuli simamambi, kalamoyo wakubeja. ¹¹ Wakali kwambwida ajulu kaswekede; mawulu aakwe takali kukkala ang'anda pe. ¹² Kwalino mumigwagwa, azwawo mubusena bwakusambalila, alimwi amuzyooko zyoonse kayubilila. ¹³ Mpawo wakamujata akumumyonta, abusyu businizizye wakamwambila, ¹⁴ ''Ndapayila chipayilo chaluumuno sunobu, Ndabbadala zikonke, ¹⁵ elyo ndasika kuzokubona, kuzoyandulisya busyu bwako, alimwi ndakujana. ¹⁶ Ndayala abulo bwangu, malembo amusyobo waku Ijiputi. ¹⁷ Ndasansiila tununkilizyo twamula, kanembe, antomwe a sinamoni. ¹⁸ Sika, tunywe tukkutisye lwesu mane bukache; atukabotelwe muzichito zyaluyando. ¹⁹ Nkambo mulumangu tawo kung'anda; watola lweendo lulamfu. ²⁰ Wabweza chibikilo chamali, uyoboola mweezi niwakkala.'' ²¹ Akwambuula kwiingi wakamukonzya, amilomo yakwe wakamusowa. ²² Mpawawo wakamutobela mbuli ng'ombe iyakojiigwa, ambuli chifubafuba mbuchipenzegwa. ²³ mane do muvwi ukayase chini chakwe. Unoli mbuli kayuni kachijanina mukakole. Takalizi pe kuti zilila buumi bwakwe. ²⁴ Lino bana bangu, mundiswilizye; amuteelele majwi amulomo wangu. ²⁵ Myoyo yanu ngayitaleyileyi munzila zyakwe; mutaswekeli munzila zyakwe. ²⁶ Waketelezya kuwa akuyaswa kwabiingi, bakajiigwa anguwe mbiingi loko. ²⁷ Ing'anda ninzila iziya kulufu; zikunuka kaziya kumalo alufu.