¹ Mwanaangu na wabika kumbali mali yako mbuli chizuminano chachikwelete chasimabambanwa wako, kuti wapa chisyomezyo chachikwelete chamuntu ngotazi, ² eelyo unoli wateya kakole kulinduwe achizuminano chako alimwi wachigwa kumajwi aamulomo wako. ³ Na wachigwa kumajwi aakko, mwanaangu, chita eechi alimwi ulivune mbuli kuti wawida mukuboko kwasimabambanwa wako; inka alimwi ukalibombye akwaamba mulandu wako kuli simabambanwa wako. ⁴ Utapi menso aako ng'onzi azikowe zyako kuguna. ⁵ Kolivuna mbuli nsya kuzwa mumaboko aamuvwimi mbuli kayuni kuzwa mukuboko kwasikuteya. ⁶ Langa manyenya, iwe nomuntu mukandu, langisisya nzila yakwe alimwi ube musongo. ⁷ Takwe mwami, muzululi na mweendelezi, ⁸ nikuba boobo ulabamba zilyo zyakwe muchiindi champeyo alimwi muchiindi chakutyola ulabamba eecho nchayanda kulya. ⁹ Ulawona kwachiindi chlamfu chili buti, iwe nomuntu mukandu? Uyosinsimuka lili kuzwa kukoona? ¹⁰ ''Koona bunini, kuguna kuche, kusukata maboko bunini mukulyookezya'' - ¹¹ alimwi buchete bwako bulaza mbuli mubbi alimwi kubula mbuli silumamba. ¹² Muntu uuzwide bubi - muntu sizibi - upona akwambuula kwakwe kupilingene, ¹³ ulafwinya menso aakwe, ulachita zitondeezyo amawulu aakwe akutondeka aminwe yakwe. ¹⁴ Ubamba bubi akupilingana mumoyo wakwe; choonse chiindi ulapilingania akunyongania. ¹⁵ Akaako mafwabi akwe ayomusikila chakufwambana; mukayindi uyotyolooka akubula kuponesegwa. ¹⁶ Kuli zintu zili musanu achimwi Jehova nzyasulide, zili musanu azibili zisesemya kulinguwe: ¹⁷ menso aamuntu ulisumpula, lulimi lwaamba mabejo, maboko aayo aatila bulowa bwabantu batakwe milandu, ¹⁸ moyo uuyeya makanze aabubi, mawulu afwambana kuchijanina kuchita bubi, ¹⁹ kamboni uyoya mabejo alimwi awoyo ubyala kutamvwanana aakati kabakulana. ²⁰ Mwanaangu lemeka malayilile awuso alimwi utaleki njisyo yabanyoko. ²¹ Choonse chiindi yaangilile mumoyo wako; yaangilile mumukosi wako. ²² Aawo noyenda iyokukwabilila; aawo nolala inokulangide, inoyokulanga; alimwi noyobuka iyokuyisya. ²³ Nkaambo malayilile nilampi, alimwi njisyo mumuni; kululamikwa kuza aamalayilile ninzila yabuumi. ²⁴ Ilakuvuna kuzwa kumwanakazi simamambe, kuzwa kumajwi mateteete aamwanakazi simamambe. ²⁵ Uteenwi mumoyo wako akubona bubotu bwakwe alimwi utamulekeli kuti akuche azikowe zyakwe. ²⁶ Koona aasimamambe kulawulwa amweelwe wachinkwa., pesi mwanakazi wawumwi ulamuula abuumi bwako boonse. ²⁷ Sa muntu kubona wabweza mulilo akaango kakwe kazitapyide na zyakusama zyakwe? ²⁸ Sa muntu kubona weenda aatala lyamakala aapya nkatapyide ndyato zyakwe? ²⁹ Mbabede muntu wiinkila mwanakazi wasimayakilanwa wakwe; umujata takayolekwi kubetekwa. ³⁰ Bantu tabasampawuli mubbi na wabba kukukutya ziyandisyo zyakwe aawo nali enzala. ³¹ Pesi na wajatwa uyoliya musanu atubili eecho nchabba; welede kugwisya akupa zyoonse zidula zili mung'anda yakwe. ³² Ooyo uchita mamambe takwe maanu; ooyo ubuchita ulijaya lwakwe mwini. ³³ Zilonda abweeme nzizyo nzyayelede alimwi lusampawuko lwakwe talukoyogwisigwa. ³⁴ Nkaambo bbivwe lichita muntu kuti abe abukkali; takoyotondeezya luzyalo lwakwe aawo nayoyanda kubwedezya. ³⁵ Takoyotambula luliyo alimwi takonzyi kuulwa, nikuba wamupa zipo zyiingi.