¹ Omwana wangu mulombe, swilila kubusongo bwangu; chenjeka kutwi kwako kukumvwisisisya kwangu, ² kuchitila kuti ukonzye kusaluula alimwi milomo yako ikwabilile luzibo. ³ Nkambo milomo yamwanakazi simamambe ilalosya buchi alimwi akwaamba kwakwe mutete mbuli mafuta, ⁴ pesi kumamanino ilalula luu mbuli mululwe, ilabosya mbuli chipanga. ⁵ Kuulu kwakwe kulinka ansi kulufu; njendelo yakwe ilenda munzila zyoonse kitola mukabanda. ⁶ Tabiki mizezo kunzila zyabuumi. Kwenda kwakwe nkwakupampalika; takwepe nkwaya. ⁷ Lino, mwana omulombe, swilila ndime; utakandiswilili kuzwa kumajwi amulomo wangu. ⁸ Tantamuna nzila zyako kuzwa kuli nguwe alimwi utakasweni afwifwi amulyango wanganda wakwe. ⁹ Muleyonzila tokoyopa bamwi pe bulemo bwako na minyaka yabuumi bwako kubantu batakwe buya; ¹⁰ bazwakule tabakoyolya mbono zyako; ezyo nziwakabelekela tazikoyonjila mung'anda yabazwakule. ¹¹ Kumamanino abuumi uyotongeka elyo nyama amubili wako niziyomana manguzu. ¹² Uyowamba kuti, ''Mbuli mbundakasulide lulayo alimwi moyo wangu wakasampawula luchenjezyo! ¹³ Tendakali kuswilila pe bayisyi bangu na kuchenjeka kutwi kwangu kuli baabo bakandilaya. ¹⁴ Ndakali ndanyonyooka loko akkati kambungano yabantu, mukati kwakuswanana kwabantu.'' ¹⁵ Konywa manzi kuchikala chako alimwi konywa manzi kuzwa kuchikala chako. ¹⁶ Sa nchibotu na kuti manzi ako akunke alimwi abetulonga mumigwagwa. ¹⁷ Akabe ako olike alimwi atanywigwi abenzu mboli kwenda ambabo. ¹⁸ Kasensa kako kalongezegwe alimwi ukakondwe, sekelela amwanakazi wabulombe bwako, ¹⁹ nkambo ulimbuli mwana wansya naa mwana wanjelele. Inkolo zyakwe zikukkutye chiindi choonse; alwinkilile anembo akukkutisika aluyando lwakwe. ²⁰ Nkambo kanzi nzyoyelede, mwana wangu mulombe, sa nchibotu kulamwa mwanakazi mwenzu; sa nchibotu kukumbatana inkolo zyamwanakazi muzwakule? ²¹ Jehova ulabona zyoonse zichita muntu alimwi ulalanga nzila zyonse nzyachita. ²² Milimo yasizibi ilamuteya mwini; tukole twasizibi zyakwe zilamucha. ²³ Uyofwa nkambo kakubula lulayo; ulanyonyooka mubufubafuba bwakwe bwiinji.