¹ Mbuli sikunkwe miinza nakuti mvula chindi chakutebula, aboobo mufubafuba tayelede bulemu. ² Mbuli muyuni kapembela asikamembya mukuuluka kwakwe, aboobo mbulubede lutuko lwabuyo. ³ Chiswepu chelede ibbiza, lubulo luleelede mukanwa lyambongolo alimwi musako ulelede amusana wamufubafuba. ⁴ Utavwili mufubafuba mbuli bufubafuba bwakwe, nkaambo uyoba mbuli nguwe. ⁵ Vwiila mufubafuba alimwi ubabufubafuba bwakwe, aboobo tokoyoba muchenjezi mumenso akwe. ⁶ Oyo utuma mulumbe kumulomo wamufubafuba ulalitema zituta zyakwe akunywa lunyonyongano. ⁷ Mbuli mawulu achilema alengelela biyo aansi mbukabede kasimpi mumilomo yabafubafuba. ⁸ Mbuli kwangila ibbwe amukwimpo mbabede upa mufubafuba bulumbu. ⁹ Mbuli mamvwa ayasa kuboko kwachaankolwa mbukabede kasimpi mumulomo wabafubafuba. ¹⁰ Mbuli simata uyasa boonse bamuzyungulukide mbabede muntu ubelesya mufubafuba ayooyo ubelesya simwendenzila. ¹¹ Mbuli munkala ubweda kumalussi akwe, mbabede mufubafuba ubweda kubufubafuba bwakwe. ¹² Kuli muntu na ngobwene ulabusongo kumenso ako? Mufubafuba ulasyomeka kwinda nguwe. ¹³ Muntu mukandu ulamba kuti, ''Kuli mulavu munzila! kuli mulavu akati kamasena alantanganana!'' ¹⁴ Mbuli kkoma mbulizumuka, mbabede muntu mukandu abulo bwakwe. ¹⁵ Mbuli mukandu ubika kuboko kwakwe mundido alimwi katakwe nguzu zyakwinyampwida kumulomo wakwe. ¹⁶ Muntu mukandu ulichenjede kumenso akwe kwinda bantu balimusanu ababili bazi kuvwila ansandulo mbotu. ¹⁷ Mbuli ooyo ujata matwi amubwa nkalobwinda oyo unyemena nkondo itali yakwe. ¹⁸ Mbuli muntu upengede uwala mivwi iyaka ¹⁹ mbabede muntu wena mwenzinyina akwamba kuti, ''Ndalikusana biyo?'' ²⁰ Na takwe nkuni, mulilo ulazima; alimwi awo atakwe kuvwiya, inkondo ilamana. ²¹ Mbuli masizi makala ayaka aankuni kumulilo, mbabede sikadyokodyoko kukubusya nkondo. ²² Majwi asikuvwiya alimbuli chilyo chinono; alanjila akati kamubili. ²³ Mbuli chibelesyo chabulongo chilulwidwe ansiliva, mbubede mulomo muuba amoyo mubi. ²⁴ Oyo usula akupawula amilomo yakwe alimwi usisa lweno mumoyo. ²⁵ Uyowambula chabuya, pesi mutakamusyomi kulisesemyo zilimusanu azibili mumoyo wakwe. ²⁶ Nekuba kuti lusulo lwakwe lulisisidwe alweno, bubi bwakwe bulayubununwa mumbungano yabantu. ²⁷ Oyo uyosya dindi uyowida mulindilyo alimwi mabwe ayowida oyo wakatonta. ²⁸ Lulimi lubeja lunyemena abo basulidwe alimwi mulomo muuba uleeta lunyonyoko.