¹ Uteemuzyi basizibi, na kuba achiyandisyo chakulyidilana ambabo, ² nkaambo myoyo yabo ikanza lupyopyongano alimwi milomo yabo yambuula mapenzi. ³ Kwiindila mubusongo ing'anda ilayakwa alimwi kwiindila mukumvwisisisya ilasimpa. ⁴ Kwiindilila muluzibo twaanda twayo tulazuzigwa buvubi bubotu bubotezya. ⁵ Mulwani wabusongo musimu, alimwi mwaalumi waluzibo ulayungizya manguzu aakwe; ⁶ nkaambo kwiindilila mukulayigwa musongo ulakonzya kubusya nkondo alimwi abasikuchenjezya biingi kuli kuzunda. ⁷ Busongo buli aajulu loko lyamufubafuba; kumilyango tajuli pe mulomo wakwe. ⁸ Mpali ukanza kuchita bubi - bantu bamwiita kuti ngusilupyopyongano. ⁹ Mabambe abufubafuba chibi alimwi bantu balanyansya sikusampawula. ¹⁰ Na wizuuka akuyowa mubuzuba bwapenzi, chaamba kuti manguzu aako mache. ¹¹ Futula aabo balikutolwa kulufu alimwi ujate aabo balikutolegwa kukujayigwa. ¹² Kuti wati, 'Amulange, takwe nchitwakazi azeezi,'' weela moyo tamvwisisisyi na kuti nzolikwaamba? Ooyo uubanba buumi bwako tazizi na? Sa Leza takoyoopa umwi awumwi nzyayelede? ¹³ Mwana wangu, lya buchi, nkaambo mbubotu, nkaambo kulokaloka kwachimbulwe nkunono kukulabila kwako. ¹⁴ Oobo mbusongo bwakumuuya wako - na wabujana, ulaaba alyejunza alimwi bulangilizi bwako tabukoyooloba. ¹⁵ Utakkali mukuyubilila mbuli sizibi uulwanisya ng'anda yabasalali. Utanyonyooni munzi wakwe! ¹⁶ Nkaambo mululami ulawa tuli musanu atubili alimwi ulabuka lubo, pesi basizibi balawisigwa aansi amapenzi. ¹⁷ Utakondwi aawo sinkondonyokwe nawa alimwi moyo wako utabotelwi pe naalebwa, ¹⁸ amwi Jehova ulabona wabona, wagwisya alimwi wakasya bukali bwakwe kulinguwe. ¹⁹ Utalikataazyi akaambo kabasimuchitazibi, alimwi utabeemuzyi, ²⁰ takwe lyejunza pe alimwi lampi lyabasizibi liyoozima. ²¹ Yowa Jehova, alimwi yowa mwaami, mwanaangu; utabi aabulyidilano ababapandukila, ²² nkaambo lunyonyooko lulabaselukila kufwambana alimwi ngwani uuzi bupati bwalunyonyooko butakazwe kulimbabo? ²³ Aaya maambilambali aamusongo. Lusalulo mukubeteka kaambo kumulawu teechibotu pe. ²⁴ Kufumbwa waamba kulisizibi kuti, ''Uli muntu uululeme,'' uyotukwa abantu alimwi uyosulwa amanyika woonse. ²⁵ Pesi aabo batapatila basizibi bayoobotelwa alimwi zipo zibotu ziyooza kulimbabo. ²⁶ Ooyo uupa nsandulo iisyomekede upa lumyonto kumulomo. ²⁷ Bambila mubeleko wako waanze, alimwi uchite zyoonse zibambikane mumuunda; wamana eezyo uyake ng'anda yako. ²⁸ Utapi bukamboni aatala asimabambanwa wako kakutakwe kaambo alimwi utabeji amilomo yako. ²⁹ Utatedi, ''Ndiyochita kulinguwe eezyo nzyakachita kulindime; ndiyomubweedezezya eezyo nzyakachita.'' ³⁰ Ndakaya kumuunda wamuntu mukandu, kwiinda lubuwa lwamasaansa aamwaalumi uutakwe maanu. ³¹ Maamvwa akali amena akukomena boonse busena, nyika yakavumbidwe aalweemya, alimwi bulambo bwawo bwakali bwawisigilwa aansi. ³² Mpawo ndakabona akuyeesesya; ndakabona akutambula lulayo. ³³ Koona kuniini, kuguna kuche, kulisukata buniini kwamaboko kukulyookezya - ³⁴ mpawo buchete buyooza kabweenda aalinduwe, alimwi ziyandisyo zyako mbuli silumamba uulibambilide.