¹ Mwanakazi musongo ulayaka ng'anda yakwe, pesi mwanakazi mufubafuba ulayimwaywida ansi amaboko akwe. ² Ooyo uyenda chakululama nguyoowa Jehova, pesi oyo upilingania munzila zyakwe ulamusampawula. ³ Kuzwa kumulomo wamufubafuba kulazwa kaponda kamusana wakwe, pesi milomo yabachenjede ilabavuna. ⁴ Awo kutakwe ng'ombe, machenjezyo alasalala, pesi zilyo zyiingi zizwa kunguzu zyabasune. ⁵ Kamboni usyomekede tabeji pe, pesi kamboni mubeji uyoya mabejo. ⁶ Sikasampusampu ulayanduula busongo alimwi tabujani, pesi luzibo luza buteteete kuli oyo usaluula. ⁷ Sosoloka kuzwa kumuntu mufubafuba, nkaambo tokoyojana luzibo mumilomo yakwe. ⁸ Busongo bwamuntu uchenjede nkumvwisisisya nzila yakwe, pesi kupilingana kwabafubafuba kuleena. ⁹ Bafubafuba balaniaka eelyo chipo chabubi nichapegwa, pesi akkati kabaluleme luzyalo lulaabidwe. ¹⁰ Imoyo ulizi machise aawo alimwi taakwe muzwakule uwabila lukondo lwawo. ¹¹ Ing'anda yabantu basizibi iyomwayigwa, pesi itente lyabaluleme chiyojanwa choolwe. ¹² Kulinzila iibaanga ilikabotu kubantu, pesi magolelo aayo atola kulufu. ¹³ Imoyo ulakkonzya kuseka pesi nkuchili mumachise alukondo luyogola nkaluba akupenzegwa. ¹⁴ Oyo utaluleme uyojana ezyo inzila zyakwe nzyaali kuchita, pesi muntu mululami uyojana nzila zyakwe. ¹⁵ Oyo uwongelekezya ulasyoma zyoonse, pesi muntu uchenjede ulayeeya aatala akweenda kwakwe. ¹⁶ Imuntu uchenjede ulayoowa akusanduka kuzwa kuzibi, pesi mufubafuba ulamwayisya lulayo. ¹⁷ Oyo ufwambana kunyema uchita zintu zyabufubafuba, alimwi muntu uchita zichito zyabubi ulasulwa. ¹⁸ Basikongelekezya balakona bufubafuba, pesi bantu bachenjede balazwatikwa aluzibo. ¹⁹ Bantu basizibi bayovundama kunembo lyabaabo baluleme alimwi abo basizibi bayovundama kumilyango yamuntu ululeme. ²⁰ Muntu muchete ulasulwa nikuba abenzinyina, pesi imuntu muvubi ulaba abeenzinyina biingi. ²¹ Oyo utondezya kusampawula simabambanwa wakwe ulabisya, pesi oyo utondezya luzyalo kubantu bachete ulilongezezegwe. ²² Utaleki aabo bachita bubi baleye? Pesi aabo bakanza kuchita bubotu bayojana luzyalo alusyomo. ²³ Kumilimo yoonse yanguzu kujanwa mpindu, pesi naa kuli kwaambula luzutu, zitola kumafwabi. ²⁴ Musini wabantu bachenjede mbuvubi bwabo, pesi ing'anda yabafubafuba ibetela bufubafuba bwiingi. ²⁵ Kamboni wakasimpe ulanuna mawumi, pesi kamboni mubeji uyoya bubeji. ²⁶ Eelyo muntu nayoowa Jehova, ulajana kabiyo nguzu nyiingi muli nguwe, ezi zintu ziyoba mbuli busena busimidebwachikkwabilizyo chabana babantu aba. ²⁷ Kuyoowa Jehova nkasensa kabuumi, kuchitila kuti muntu achije kuzwa kutukole twalufu. ²⁸ Bulemu bwamwami bulajanika mubwiingi bwabantu bakwe, pesi kakutakwe bantu mwana wamwami ulanyonyooka. ²⁹ Muntu utafwambani kunyema ulakumvwisisisya kupati, pesi muntu ufwambana kunyema ulasumpula bufubafuba. ³⁰ Imoyo ukkede mbuumi bwamubili, pesi ibbivwe lilabozeka zifuwa. ³¹ Oyo usyanikizya bachete utuka mulengi wabo, pesi oyo utondezya luzyalo ulamulemeka. ³² Imuntu sizibi ulaseluzigwa aansi azichito zyakwe zibi, pesi muntu mululami ulamakkalilo nikuba mulufu. ³³ Busongo bulakkala mumoyo wawuchenjede, pesi nikuba akkati kabafubafuba ulalichita lwakwe kuti azibinkane. ³⁴ Kuchita chibotu kulanyampula chisi, pesi chibi nchisampawuzi kuli woonse muntu. ³⁵ Luzyalo lwamwami luli amulanda uuchita chakuchenjela, pesi lunyemo lwakwe ndulwa yooyo uchita chuusisya insoni.