¹ Mwana mulombe musongo ulaswilila lulayo lwawisi, pesi sikasampusampu takoyoswilila kuli uukkalalila. ² Kuzwa kumuchelo wamulomo wakwe muntu uyobotelwa zintu zibotu, pesi lulyo lwasilweno ndwalunyonyono. ³ Ooyo ukwabilila mulomo wakwe ukwabilila buumi bwakwe, pesi ooyo uwasamisya mulomo wakwe uyolibisizya mwini. ⁴ Moyo wamuntu mukandu ulayandula pesi takwe nchujana, pesi moyo wamuntu musungusungu uyokutisigwa. ⁵ Muntu musalali ulasula mabejo, pesi muntu mubi ulachita chisesemyo lwakwe mwini, alimwi ulachita ziwusisya nsoni. ⁶ Busalali bulakwabilila aabo baluleme munzila yabo, pesi bulanyonyona aabo bachita chibi. ⁷ Kuli umwi ulikankayizya buvubi, pesi kstakwe nchalacho, pesi kuli umwi upa zyoonse, nkali nchoonzyo muvubi. ⁸ Lununuko lwabuumi bwamuntu muvubi nimbono zyakwe, pesi muntu muchete tamvwi nikaba kanini. ⁹ Mumuni wabantu basalali ulabtelwa, pesi lampi lyabantu basizibi ilabikwa aanze. ¹⁰ Kulisumpula kulabusya lupyopyongano, pesi kulabo baswilila malayilile kuli busongo. ¹¹ Buvubi bulamwayika nabwafwambana kujanwa, ooyo uchita mali yakwe akubeleka amaboko akwe uyochita mali yakwe kuti ikomene. ¹² Na bulangilizi bwasampawulwa, butyola moyo, pesi chiyandikana chajanika musamu wabuumi. ¹³ Kufumbwa uusampawula malayilile ulalyetela lunyonyoko, pesi ooyo ulemeka malayilile uyojana bulumbu. ¹⁴ Njiisyo yamuntu uchenjede nkasensa kabuumi, ilakuchengunusya kuzwa kutukole twalufu. ¹⁵ Bubotu bwamukkati bulajana choolwe, pesi nzila yabasikweena ndunyonyoko. ¹⁶ Muntu uchenjede ulachita chaluzibo kuli zyoonse nzyayeya, pesi mufubafuba ulamwayula kupilingana kwakwe. ¹⁷ Mutumwa mubi ulawida mumapenzi, pesi ngambela ulisyomekede ulaponisya. ¹⁸ Oyo ukkakka malayilile uyojana buchete abweeme, pesi bulemu buyoza kulinguwe oyo uyiya kululamikwa. ¹⁹ Chilabotezya moyo kujana nchuyanda, pesi bafubafuba balasula kusanduka kuzwa kububi. ²⁰ Eenda abantu bachenjede alimwi uyochenjela, pesi muzolani wabafubafuba ulabisizigwa. ²¹ Mapenzi atobela basizibi, pesi bantu baluleme balalumbulwa kabotu. ²² Muntu mubotu ulasiila lukono kubazukulu bakwe, pesi mbono zyabasizibi zilayobwedwa bantu baluleme. ²³ Myuunda itafolwedwe yabantu bachete iyozyala zilyo, pesi zilakukulwa mukubula mbeta. ²⁴ Oyo utalayi mwana wakwemulombe ulamusula, pesi oyo uyanda mwana wakwe mulombe ulamulayilila kabotu. ²⁵ Muntu ululeme ulalya mane akakutelulyo lwakwe, pesi tumbu lyasizibi lilenzala kwalyoonse.