¹ Kufumbwa uyanda lulayo ulayanda luzibo, pesi oyo uusula kululamikwa mufubafuba. ² Jehova ulapa choolwe kumuntu ululeme, pesi ulapa mulandu kumuntu uchita miyeyo mibi. ³ Muntu tayimizigwi abubi, pesi bantu basalali tabakoyo nobbolwa. ⁴ Mwanakazi mubotu musini wamulumi wakwe, pesimwanakazi oyo ufwisya nsoni ulimbuli bulwazi obo bubozeka mafuwa amulumi. ⁵ Miyeyo yabasalali ililuleme, pesi malayilile aabasizibi ngalweeno. ⁶ Majwi abasizibi alindila kujana mwenya wakujaya, pesi majwi abaluleme ababamba kabotu. ⁷ Bantu basizibi balisowedwe alimwi bakaloba, pesi ng'anda yabasalali iyoyima. ⁸ Muntu uyolumbayizigwa mukwindilila mubusongo mbwali aabo, pesi uchita chakupilingania uyosampulwa. ⁹ Nchibotu kujana chibaka chitali ajulu - biyo kuba mulanda - kwinda kulipa aatala abubotu bwako pesi kotakwe chakulya. ¹⁰ Muntu usalala ulabamba kabotu zyakulya zyabanyama bakwe, pesi luzyalo lwasizibi ndwalunya. ¹¹ Oyo ubeleka munyika yakwe uyojana chakulya chiingi, pesi utobele musule lyababeleka takwe boongo. ¹² Muntu sizibi uyeya eezyo basizibi nzibakabba nzibakabba kuli bamwi, pesi michelo yabasalali izwa kuli mbabo beni. ¹³ Muntu sizibi ulachegwa angambwido yakwe yabubi, pesi muntu musalali ulachija kuzwa kumapenzi. ¹⁴ Kuzwa kumichelo yamajwi aakwe muntu ulazuzigwa azintu zintu zibotu, mbuli mulimu wamaboko aakwe wamupa mpindu. ¹⁵ Nzila yasizibi yachifubafuba nimbotu kumenso aakwe, pesi muntu uchenjede ulaswilila malayilile. ¹⁶ Mufubafuba utondezya kunyema kwakwe lumwi, pesi oyo uwunduluzya masampu ulichenjede. ¹⁷ Oyo wambula kasimpe waamba ziluleme, pesi kamboni mubeji wamba mabejo. ¹⁸ Majwi ayoyo wambula chabukali alimbuli kubosya kwe panga, pesi lulimi lwawuchenjede luleta kuponesegwa. ¹⁹ Milomo isyomekede ilakalilila kwalyoonse, pesi milomo ibeja njakiindi kanini. ²⁰ Kuli lweeno mumyooyo ababo bayeya kuchita bubi, pesi lukondo luzwa kubasungwazyi balumuno. ²¹ Takwe kuchiswa kutakasikile basalali, pesi basizibi balizuzikizigwa abuyumuyumu. ²² Jehova ulasula milomo yamba mabejo, pesi abo bapona abululami ndufutuko lwabo. ²³ Muntu uchenjede ulasisa luzibo lwakwe, pesi moyo wamufubafuba ulamba zipilingene. ²⁴ Ijanza lyamusungusungu lilendelezya, pesi bantu bakandu bayobikwa kumilimu yabuyumuyumu. ²⁵ Bube bwamoyo wamuntu bumweela aansi, pesi jwi bbotu limupa kubotelwa. ²⁶ Muntu musalali ninchenjezyo kumwenzinyina, pesi nzila zyabasizibi zilabaleyesya. ²⁷ Bantu batolo talivwimini nzila zyakwe, pesi muntu musungusungu uyojana mbono mbotu. ²⁸ Abo beenda munzila mbotu ujana buumi alimwi munzila zyabo takwe lufu.