¹ Jehova ulasula zipimyo zyakubeja, pesi uleela mumweelo uyelede. ² Eelyo kulisumpula nikwasika, mpawo insoni zilasika, pesi kubamoyo mubotu kwetela busongo. ³ Bululami bwabaluleme bulaba kwabilila, pesi inzila zipilingene zyabasilweeno zilabanyonyoona. ⁴ Buvubi tabugwasyi mubuzuba bwabukali, pesi kuchita kabotu kulakuvuna kuzwa kulufu. ⁵ Bololoki bwamuntu uululeme buchita nzila yakwe kuti ilulame, pesi basizibi balawa nkambo kazibi zyabo. ⁶ Bololoki bwabaluleme bulababamba kabotu, pesi basikwena balachegwa kwindila mukubisya kwabo. ⁷ Eelyo mwalumi sizibi naafwa, bulangizi bwakwe bulamana alimwi bulangizi bwali munguzu zyakwe ngabwaba bwabiyo. ⁸ Muntu mululami ulagwisigwa kuzwa kumapenzi alimwi alaza aatala lyasizibi. ⁹ Amulomo wakwe muntu utaluleme ulanyonyoona simabambanwa wakwe, pesi kwindila muluzibo bantu baluleme balabambwa kabotu. ¹⁰ Eelyo bantu baluleme nibazwidilila, chisi chilakondwa. ¹¹ Kwiindila kuzipo zibotu zyabaluleme, chisi chilakomezegwa; kwinda kumulomo wabasizibi, chisi chila mwayuulwa. ¹² Muntu oyo ujisi kasampusampu kumwenzinyina takwe boongo, pesi muntu uumvwisisisya ulawumuna. ¹³ Kufumbwa uyendeenda kayobulengelela ulayubununa zisisidwe, pesi muntu usyomekede ulabamba makani kachisisidwe. ¹⁴ Ooko kutakwe inzila yabusongo, nyika ilawa, pesi kuzunda kulaza kwinda mukubuzya kubendelezi biingi. ¹⁵ Kufumbwa ukweleta mali yachikwelete kumuntu muzwakule uyopengaana mumafwabi; pesi oyo usula kupa chipo kuli oyo musyobo wachizuminano ulikabotu. ¹⁶ Mwanakazi siluzyalo ulalijanina bulemu, pesi bantu balabukali balwani na bavubi. ¹⁷ Muntu siluzyalo ulaligwasya mwini,pesi oyo ujisi bukali ulalibisizya mwini. ¹⁸ Muntu sizibi ulabeja kukujana zipo zyakwe, pesi ooyo ubyala ziluleme ulatebula zipo zyabwini. ¹⁹ Imuntu usyomekede uchita ziluleme uyopona, pesi oyo utobela bubi uyoofwa. ²⁰ Jehova ulasula aabo bali amyoyo ipilingene, pesi ulabotelwa mulibaabo bali enzila zitakwe kampenda. ²¹ Mube akasimpe kuleezi -- muntu sizibi takoyojana chisubulo, pesi lunyungu lwabaluleme luyobambwa kabotu. ²² Mbuli nweenwe yangolida mupemo yangulube mbwabede mwanakazi mubotu uutakwe lusaluulo. ²³ Chiyandisyo chabantu baluleme chilampindu mbotu, pesi bantu basizibi basyomena luzutu kubukali. ²⁴ Kuli umwaya -- uyojana zyiingi; awumbi ulakkala anchayelede kupa -- ulajana buchete. ²⁵ Muntu mwaabi uyozwidilila alimwi oyo uupa maanzi kulibamwi uyojana maanzi lwakwe mwini. ²⁶ Bantu balatuka mwaalumi ukkala kawuzya zilyo, pesi zipo zibotu zilazwaatika mutwe wakwe oyo uzyuizya. ²⁷ Ooyo usungwalila kuyanduula bubotu nchobeni uyaanduula choolwe, pesi ooyo uyanduula bubi ulabujana. ²⁸ Abo basyomena mubuvubi bwabo bayoowa, pesi mbuli tuu, bantu baluleme balakunka. ²⁹ Ooyo uyeta mapenzi mung'anda yakwe uyokona luuwo alimwi mufubafuba uyooba muzike kuli bachenjede mumyoyo. ³⁰ Muntu ululeme uyooba mbuli munsamu wabuumi, pesi lunyonyoongano lulanyanzya mawumi. ³¹ Amubone! Muntu ululeme ulatambula eezyo nzyayelede; mbayingi boiyeni bataluleme abasizibi!