¹ Wakazwa awo mpawo waya ku chisi chakulimbabo, mpawo basikwiiya bakwe bakamutobela. ² Lino buzuba butegwa Sabata nibwakasika, wakatalika kuyiisya muchikombelo. Bantu bayiingi bakamumvwa kayiisya bakagamba. Bakabuzya kuti, "Ooyu mwaalumi wakazijana kuli njiisyo eez?i" "Mbusongoonzi mbwapedwe?" "Maleele alibuti aaya ngachita amaanza aakwe?" ³ "Ooyu teensi nguwe na mubezi mwana waMeli? Mwana wakwabo waJemusi, Jozefu, Judasi aSayimoni? Bachizi bakwe teensi mbabo aaba mbituli aabo na? Mpawo bakamubijilwa Jesu. ⁴ Jesu wakati kulimbabo, “Musinsimi ulalemekwa, kunze kwamuchisi, amung'anda mwazyalwa aakati kabasinzubo zyakwe.” ⁵ Taakakonzya pe kuchita maleele mapati, kunze kwakukombela biyo bache bachiswa akubabikka maboko aakubaponia. ⁶ Alimwi kutasyoma kwabo kwakamugambya. Wakeendeenda mugunzi eelyo kayabuyiisya. ⁷ Mpawo wakayita bali kkumi ababili wabatuma babili babili akubapa nguzu zyakuzunda myuuya mibi, ⁸ mpawo wakabaambila kuti tababwezi chintu pe mulweendo lwabo, chakulya niiba nkomo, niiba mali munkumba zyabo kunze kwamusako, ⁹ basame nsangu pesi batabwezi zisamo zimbi. ¹⁰ Mpawo wakati kulimbabo, "Kufumbwa busena nkumuyoosika, mukakkale mung'anda na mumuunzi ngumuyoonjila kusikila mukazwe . ¹¹ Na kwaba dolopo lyakaka kumutambula na kumuswiilizya, nimuyoozwa mubusena oobo, mukasansamune lusuko kumawulu enu, bukabe bukamboni kulimbabo.” ¹² Bakazwa baya kukukambawuka kuti bantu basanduke. ¹³ Bakaanda myuuya mibi miingi mpawo bakananika bachiswa bayingi amafuta alimwi bakapona. ¹⁴ Mwami Helodi wakazimvwa eezi, nkaambo zina lyaMwami Jesu lyakali lyazibikana loko. Bamwi bakati, “Joni Mubbabbatizyi wabusigwa kuzwa kubafu, nkikaako nguzu zyamaleele nzizilikubeleka mulinguwe.” ¹⁵ Bamwi bakati, "Ngu Elayija". Alimwi bamwi bakati, “Musinsimi, uulimbuli umwi wabasinsimi bansiku.” ¹⁶ Pesi Helodi naakamvwa oobu wakati, “Joni mwaalumi uulya ngundakadunsula mutwe wakabusigwa kuzwa kubafu.” ¹⁷ Nkaambo Helodi lwake nguwakali walayilila kuti Joni aangwe, alimwi wakaangwa akubikwa muntolongo akaambo kaHelodiyasi (muka Filipi mwana wakwabo) ngwaakali wakwata. ¹⁸ Nkaambo Joni wakaambila Helodi kuti, “Tachili chibotu pe kuti ukwate mukayintu wamwanike wako.” ¹⁹ Lino Helodiyasi wakaleemfwindiilili yakuyanda kujaya Joni, pesi taakakonzya pe, ²⁰ nkaambo Helodi wakali kumuyoowa Joni; wakalimwizi kuti muntu ululeme kali musalali, aboobo wakali kumutabilila. Kumuswiilila kwakalikumunyongania loko, pesi wakalikumuswiilila kaboteledwe. ²¹ Lino mweenya wakaba aawo Helodi naakapobweda kuzyalwa kwakwe. Wakachita pobwe pati kachitila bapati abasilumamba bakwe, abeendelezi bapati bamu Galili. ²² Mpawo mwana musimbi waHelodiyasi wakasika wazyana, zyakabotezya Helodi abeenzu bakatambidwe kupobwe. Lino Mwami wakati kumusimbi, “Ndikumbile kufumbwa nchuyanda, ndilakupa.” ²³ Mpawo wakamusyomezya achikonke wati, “Kufumbwa nchuyookumbila nichiba chipanzi chabwami bwangu, ndilakupa.” ²⁴ Wakazwa waya kulibanyina wakwaamba kuti, “Ngandilakumbilaanzi?” Banyina bakati, “Mutwe waJoni Mubbabbatizyi” ²⁵ Mpawo aawo wakanjila akufwambaana kuMwami achikumbilo chakwe wakwaamba wati: “Ndiyanda kuti lino mpawo aawa undipe mutwe waJoni Mubbizyi mukasuwo.” ²⁶ Nikuba kuti eechi chakamuchisa loko mwami, pesi akaambo kachikonke achikumbizyo, antoomwe abeenzu bakwe taakayanda kumukakila pe. ²⁷ Mpawo wakafwambaana kutuma silumamba kuti akeete mutwe waJoni. Lino wakiinka wakudunsula mutwe waJoni muntolongo, ²⁸ mpawo wawuleta mukasuwo wamupa musimbi ooyo, mpawo musimbi wakatola kuli banyina. ²⁹ Nibakamvwa oobo basikwiiya baJoni bakaza kuzoobweza mutunta akuubamba muchibunda. ³⁰ Batumwa, bakasika kuliJesu, bamwaambila zyoonse nzibakachita akuyiisya. ³¹ Lino wakati kulimbabo, “Muzide ookuno kusitikide mulyookezye.” ³² Bakeenda muli chabochabo mubwaato bazubuka baya kutakwe bantu pe. ³³ Lino bamwi bakababona nibakeenda, bakabaziba mpawo bakeenda amawulu kuzwa mumyuunzi yoonse baakubatangunina kusika. ³⁴ Lino nibakasika kuchito Jesu wakabona makamu makamu abantu, wakabafwida luzyalo, nkaambo bakali mbuli mbelele zitakwe mweembeli pe. Mpawo wakatanguna kubayiisya zintu zyiingi. ³⁵ Lino muchiindi eechi lyakali lyaba goko, basikwiiya bakwe bakaza kuli nguwe bakati, “Ookuno nkuubusena butakwe chintu, alubo chiindi chamana. ³⁶ Baambile bantu aaba baye mumyuunzi ilaafwiifwi bakalyuulile zyakulya.” ³⁷ Pesi wakabasandula wati, “Mubape chakulya ndinywe.” Bakati kuli nguwe, “Nga tulayinka na tukawule kulya kuchita myaanda yobile yama denari kuti tubape balye?" ³⁸ Wakababuzya wati, “Mujisi zinkwa zingana? Mwiinke mukalange.” Nibakabuzyabuzya, bakati, “Tujisi zinkwa zilimusanu answi zibili.” ³⁹ Wakabalayilila kuti baambile bantu boonse kuti bakkale muzibumga zibumga aabwizu butete. ⁴⁰ Mpawo bakakkala aansi muzibungazibunga zyamyaanda azya makkumi musanu. ⁴¹ Wakabweza zinkwa zili musanu answi zibili, mpawo wakalanga kujulu, wakapa kulumba eelyo wakakwamuna zinkwa mpawo wazipa kulibasikwiiya kuti bape bantu. wakakwamuna inswi zibili mpawo wabapa boonse. ⁴² Bakalya boonse bakkuta. ⁴³ Bakabwezelela bufwefwelenga bwazinkwa, answi bwakachala bazuzya zizuma zilikkumi azibili. ⁴⁴ Mweelwe wabaalumi bakalya wakali kusika kuzyuulu zilimusanu. ⁴⁵ Mpawo aawo wakaambila basikwiiya bakwe kuti banjile mubwaato bazulule baye mutala kuBetisayida, ooku nkaliikuwayisya bantu. ⁴⁶ Nibakeenda, wakaya kuchilundu kuti akakombe. ⁴⁷ Lino nilyakaba goko, bwaato bwakali bwaba aakati kalwizi, we wakachaala alikke. ⁴⁸ Wakabona kuti baliikuzundana aluuwo, nkaambo luuwo lwakabalwanisya. Kubuchedo wakasika kulimbabo kayobweenda aatala amaanzi. Wakabaanga ngusikubayinda kumbali. ⁴⁹ Pesi nibakamubona kayenda aatala alwizi, bakayeeyanga ncheelo, bakakwiizyania, ⁵⁰ nkaambo boonse nibakamubona bakayoowa. Mpawo aawo wakabaambuuzya wati, “Mujate moyo! Ndime. Mutayoowi pe!” ⁵¹ Eelyo wakanjila mubwaaato mubaskabede, mpawo luuwo lwakawumuna. Bakagamba loko, ⁵² mbukunga tebakamvwisisisya pe aatala azinkwa; amyoyo yabo yakachili miyumu. ⁵³ Lino nibakazubukila mutala, bakasika kuJenesaleti bakaanga bwaato kunkomwe yalwizi. ⁵⁴ Kabachizwa biyo mubwaato bantu batalika kumuziba Jesu. ⁵⁵ Bakachijaana chisi choonse alimwi bakabweza bachiswa amalo akubatola ooko kufumbwa nkubakamvwa kuti nkwabede. ⁵⁶ Lino kufumbwa kumyuunzi nkwakaya, kumadolopo nanka kumabazu anyika bakalikubika bachiswa muzisambalilo. Bakamukumbila kuti bamugume biyo chisamo chakwe, nkabela kuli bakamuguma bakapona.