¹ BaFalisi abamwi balembi bakali bazwa kuJelusalemu bakamubunganina. ² Mpawo bakabona bamwi basikwiiya bakwe kabaliikulya chakulya amaboko aatopeene, nkukuti, atasambide. ³ (BaFalisi abaJuda boonse tabalyi chakulya kabatasambide maboko pe mbuli kuchiyanza chabo, nkaambo bajisilidi kutunsiyasiya twabasikale. ⁴ Nibazwa kuzisambalilo baFalisi tabalyi pe kabatasambide. Balalondola atumwi tunsiyansiya twiingi, tuli mbuli kusanzya nkomeki, nongo zyamaanzi azilongo nzibalida.) ⁵ Lino baFalisi abalembi bakabuzya Jesu bati, “Nkaamboonzi basikwiiya bako nibatalondoli tunsiyansiya twabasikale, balalya kabatasambide?” ⁶ Wakabasandula wati, “Isaya wakasinsima kabotu aatala andinywe nibasikuupawupa; mbuli mbaakalemba kuti: 'Aba bantu bandilemeka amilomo yabo, pesi myoyo yabo ilikule andime. ⁷ Nkombyo zyabo tazikwe nchizyaamba, bayiisya milawu yabantu aziyanza zyabo.' ⁸ Mwakalekezya milawu yaLeza, mpawo mwajatisya ziyanza zyabantu.” ⁹ Mpawo wakabaambila wati, “Mujisi nzila inembene yakusunzulusya mulawu waLeza akuubika kumbali kuti mulondole kabotu tunsiyansiya twanu! ¹⁰ Mozesi wakati, 'Lemeka wuso abanyoko,' akuti 'kufumbwa muntu utukila wisi abanyina, weelede kujayigwa.' ¹¹ Pesi nywebo mulati, 'Na muntu waambila wisi na banyina, kuti "Kufumbwa zilibiyeni nzimwakagwasigwa kulindime ngu ‘Kkobbani’ (nkukuti, 'Nchilumbyo cha Leza',) - ¹² eelyo tamumuzumizyi kuti achitile wisi na banyina chimwi chintu. ¹³ Mulalobya ijwi lya Leza nkaambo katunsiyansiya twanu ntumwakabamba. Alimwi mulachita zintu zyiingi zilimbuli eezyo.” ^{16 14} Mpawo Jesu wakayita makamu makamu wati kulimbabo, “Amundiswilizye, moonse, mumvwisisisye. ¹⁵ Takwe chili kunze amuntu chikonzya kumuninaania na chanjila mulinguwe pe. Chininaania muntu ncheecho chizwa mukati mumoyo wamuntu.” ¹⁷ Jesu kali wasiya makamu makamu, akunjila mung'anda, basikwiiya bakwe bakamubuzya aatala achikozyano eechi. ¹⁸ Jesu wakati, “Tamunaaba akumvwisisisya pe?” Tamubwene na kuti taakwe chinjila mumuntu chili kunze kwamuntu chinga chilamuninaania chanjila mukati mulinguwe, mbukunga ¹⁹ tachinjili mumoyo wakwe pe, pesi mubula biyo mpawo chazwa kunze.” Mukwaamba oobu Jesu wakasalazya zyakulya zyoonse. ²⁰ Wakati, “Chizwa mumuntu nchechichita kuti aninaane. ²¹ Nkaambo mukati kamyoyo yabantu, mumuzwa mizeezo mibi, busofwaazi muli zyamalale, kubba, bujayi, ²² bwamu, bwaanka, luuni, lweeno, cheendwe, ibbivwe, kubejelezya, kulisumpula abufubafuba. ²³ Zibi eezi zyoonse zizwa mumoyo, nzizininaania muntu.” ²⁴ Wakanyampuka aabusena oobo akuya kuchlikiti cha chaTaya aSidon. Wakanjila mung'anda alimwi taakayanda kuti bantu, naba omwe bazibe mpabede, nekuba boobo wakakachilwa kuyuba kuti bantu batamuboni. ²⁵ Mpawo aawo umwi mwanakazi wakali aamwana wakanjidwe muuya uusofweede, mbaakamvwa biyo aatala aJesu wakaza wawida kumawulu aakwe. ²⁶ Mwanakazi ooyu wakali wamusyobo wabaGilikki wakazyalilwa kuSiliya Fonisiya. Wakakumbila Jesu kuti atande muuya mubi uzwe mumwana wakwe. ²⁷ Wakamwaambila wati, “Weelede kulekela bana kuti balye saansi. Nkaambo tachili kabotu pe kubweza chakulya chabana mpawo usowele bankala.” ²⁸ Pesi wakamuvwiila wati, “Iiyi, Mwami, nekuba boobo abalabo bankala balabwezelela bumbulumbulu bulosya bana munsi lyatafula.” ²⁹ Mpawo wakamwaambila kuti, “Mbuwasandula oobo, enda biyo, muuya mubi wazwa kale mumwana wako.” ³⁰ Mpawo wakajokela kung'anda wajana mwana ulilede aabulo, muuya mubi kuuli wazwa kale. ³¹ Lino Jesu wakazwa kubusena bwaTaya wakeenda wayinda muSidoni, katozya kulwizi lwaGalili mpawo wanjila muchilikiti chaDekkapolisi. ³² Ooku, bamwi bantu bakamweetela mwaalumi musinkematwi kali sichilimilimi, mpawo bakamukumbila kuti amubikke kuboko kwakwe amuponia. ³³ Wakamubweza wakamugwisya mubantu biingi wamutola kumbali, wakamunjizya minwe mumatwi. naakaswida wamudompa alulimi. ³⁴ Mpawo wakalungumana walanga kujulu, watula choyo, wati kulinguwe, “Efifata,” nkukwaamba kuti, “Sinkuka!”. ³⁵ Nizyakachitwa eezi mwaalumi uulya akasinkuka matwi aakwe, alulimi lwakwe lwakaangunuka mpawo watanguna kwaambuula kabotu. ³⁶ Wakabalayilila kuti bataambili bantu. Pesi naakanoonga wabalayilila oobu, bantu nibakayindilila loko kwaambuula azyakachitika. ³⁷ Bantu bakazula kugamba kabaamba kuti, “Uchita kabotu loko muzintu zyoonse. Ulaponia basinkematwi abasichilimilimi.”