¹ Bakazubuka lwizi baya kuchisi cha Jelasenesi. ² Lino Jesu naakazwa mubwaato, mpawo mpawo kwakazidwa aamwaalumi wakanjidwe muuya uusofweede kazwa kumaanda. ³ Ooyu mwaalumi wakali kukkala kumaaanda, alimwi katakwe naba omwe wakachili kukonzya kumwaanga, nikuba kuti wabelesya nketani. ⁴ Nkaambo chiindi chiingi wakanoonga waangwa azibulo kumaboko akumawulu, pesi wakanoonga wazipasuula akutyola zyoonse nzyakanoonga waangwa aazyo. Takwe naba omwe wakali aanguzu zyakumuzunda ⁵ Chiindi choonse sikati amansiku wakali kukwiila kumaaanda amuzilundu akulinenguula amabwe. ⁶ Lino naakabona Jesu kulekule, wakachijaana wakuwa bufugeme munsi lyamawulu aakwe, kunembo lyakwe. ⁷ Wakoompolola ajwi pati wati, “Uyaandaanzi kulindime Jesu, Mwana waLeza Mupati Kampatila? Ndakukumbila, aLeza lwakwe kuti utandipenzyi pe!” ⁸ Nkaambo Jesu wakali wati kuli nguwe, “Zwaa mumwaalumi ooyu, webo nomuuya uusofweede!” ⁹ Lino Jesu wakabuzya kuti, “Nduweni izina lyako?” Wakasandula wati, “Izina lyangu ndime Ligiyoni, nkaambo tulibayiingi.” ¹⁰ Wakakombelezya Jesu kuti atabatandi pe kuzwa mubusena oobo. ¹¹ Kwakali tanga pati lyangulube lyakali kuchela aakalundu kali afwiifwi, ¹² mpawo myuuya iisofweede yakakombelezya Jesu yati, “Tutandile mungulube; utuzumizye kuti tunjile mulinzizyo.” ¹³ Wakayizumizya, elyo myuuya iisofweede yakazwa yaakunjila mungulube. Ngulube zikonzya kuba zyuulu zibili zyakanikila kujenga zyaaliwalila mulwizi zyanikila ¹⁴ Aabo bakalikweembela ngulube bakachija akuyowaamba kudolopo amumyuunzi, mpawo bantu bakayinka kuyoobona eecho chakali chachitika. ¹⁵ Lino nibakasika kuliJesu, bakamubona mwaalumi wakanjidwe ligiyoni, kakkede, kasamide, amizeezo yakwe yakali yaba kabotu. Eelyo bakayoowa. ¹⁶ Aabo bakazibona bakaambila bantu azyakachitika kuli ooyu mwaalumi wakanjidwe muuya uusofweede, bakapandulula azyakachitika kungulube. ¹⁷ Mpawo bantu bakatanguna kumukombelezya Jesu kuti azwe muchisi chabo. ¹⁸ Lino Jesu kaliikunjila mubwaato, mwaalumi wakanjidwe muuya uusofweede wakamukumbila kuti beende amwi. ¹⁹ Pesi Jesu wakamukakila, wati, “Kuya kumuunzi kuli bakulindinywe ukabaambile Mwami nzyaakuchitila, ambaakufwida luzyalo.” ²⁰ Eelyo mwaalumi ooyu wakeenda waakwaambila baku Dekkapolisi nzyakamuchitila Jesu. Mpawo bantu boonse bakagamba. ²¹ Lino Jesu naakazubuka lubo abwaato kuya mutala alwizi, bantu bayingi bakamubunganina kali kunkomwe yalwizi. ²² Lino umwi mweendelezi wachikombelo utegwa Jayilosi, wakasika. Naakabona Jesu, wakawida kumawulu aakwe. ²³ Mpawo wakamukombelezya chamoyo woonse wati, “Mwana wangu musimbi waamba kufwa, wenche kuza umubike maboko, ambweni ulasilikwa apone.” ²⁴ Eelyo Jesu wakeenda awe, abantu bayiingi bakamutobela kabayobusyanikizyania aafwiifwi anguwe. ²⁵ Mpawo aawo kwakali mwanakazi wakali kuchiswa kalobola kwaminyaka ilikkumi ayibili. ²⁶ Wakafwaba kapati loko mukusilikwa abasilisi bayingi, alubo wakamana lubono lwake loonse. Nikuba boobo taakwe naakapona pe, bulwazi bwakayindilila. ²⁷ Naakamvwa mpuwo zyaJesu, wakasika wanjila munkamu kusule lyaJesu wajata chisamo chakwe. ²⁸ Nkaambo wakalyaambila kuti, “Kufumbwa ndaguma chisamo chakwe ndilapona.” ²⁹ Mpawo aawo bulowa bwakagama, alimwi wakamvwa mumubili wakwe kuti wapona kuzwa kumachise aakwe. ³⁰ Mpawo awo Jesu wakamvwa kuti nguzu zyazwa mumubil wakwe. Wakachebukila musule wabuzya wati, “ani ngwani waguma chisamo changu?” ³¹ Basikwiiya bakwe bakasandula bati, "nga ulabuzya biyeni kuti, 'ngwani wandiguma?' 'kobwene bantu mbubasyanikizyenie bakubikide akati". ³² Pesi Jesu wakachiliswini kalanguula ooyo wakali wazichita. ³³ Lino mwanakazi ooyu, mukuziba zyoonse zyakali zyachitika kulinguwe, wakaza kuliJesu chakuyoowa akukankama waliwaala kumawulu aaJesu, wamwaambila simpe lyoonse. ³⁴ Lino wakamwaambila kuti, “Mwana wangu lusyomo lwako lwakuponia. Koya muluumuno, waangunuke kuzwa mumachise aako.” ³⁵ Lino Jesu kachaambuula, kwakasika bamwi bantu bakazwa kung'anda yaJayilosi Muzulwidi wambungano bati, “uchimukatazizyaanzi Muyiisyi,” teemwana wako musimbi wafwa kale?.” ³⁶ Jesu tatambwide pe eezi zyakali kwaambuulwa, wakaambila Jayilosi kuti, “Syoma utayoowi pe.” ³⁷ Wakeenda aPita aJemusi aJoni mukulana waJemusi, taakazumizya bamwi bantu pe. ³⁸ Lino nibakasika kung'anda yamweendelezi wachikombelo, Jesu wakabona kunyongana, akulibbwavuula kwabantu balila akoomoka kupati. ³⁹ Mpawo wakanjila mukati wabaambila kuti, “Nkaamboonzi nimunyongana akoomoka, Mwana tafwide pe ulede biyo?” ⁴⁰ Mpawo bakamuseka. Lino naakamana kubatandila anze boonse, wakabweza wisi wamusimbi abanyina abasikwiiya mbakali abo, wanjila oomo mwakali mwana. ⁴¹ Wakajata kuboko kwamusimbi wamwaambila kuti, “Talita kkumi!” (chaamba kuti, kasimbi buka!”) ⁴² Mpawo aawo musimbi wakanyampuka, weendeenda (wakali aminyaka ilikkumi ayibili). Alizeezi, bantu bakagamba loko. ⁴³ Wakabaambila malayilile mayumu akuti bataambili muntu aatala azyakachitika, mpawo wakalayilila kuti musimbi bamupe chakulya.