¹ Jesu wakatalika kuyiisya lubo kali kumbali aalwizi alimwi nkamu mpati yakamubunganina. Wakanjila mubwaato bwakali mumaanzi wakkala. Nkamu yoonse yakatobelezezye nkomwe yalwizi. ² Mpawo wakabayiisya zintu zyiingi kabelesya zikozyanio, alimwi mukuyiisya kwakwe nzeezi nzyaakaamba, ³ “Amuswiilizye, mulimi wakaya kukumiza mbuto yakwe. ⁴ Aawo naakali kumiza mbuto, imwi yakawida munzila, mpawo tuyuni twakasika twiilya. ⁵ Imwi yakawida amwaala, aatakwe muse mwiingi. Yakamena kufwambaana, nkaambo muse wakali muche. ⁶ Pesi zuba nilyakabala yakapya, mpawo yakayuma nkaambo kamiyanda yakatabbide. ⁷ Imwi mbuto yakawida mumaamvwa, maamvwa akakomena ayisyanikizya, aboobo teeyakakonzya kuzyala. ⁸ Imwi mbuto yakawida mumuse uvubide. Yakamena, akukomena mane yazyala michelo, imwi zyiindulwidwe makkumi otatwe, imwi zyiindulwidwe makkumi musanu alimwi, imwi zyiindulwidwe mwaanda.” ⁹ Lino wakati, “Ooyo ulaamatwi aakumvwa, ngamvwe.” ¹⁰ Lino Jesu naakaba alike, mbakali aabo antoomwe abasikwiiya bakwe balikkumi ababili bakamubuzya aatala azikozyanisyo eezyo. ¹¹ Wakabaambila wati, “Insiswa yabwami bwaLeza ilipedwe kuli ndinywe, pesi kulibamwi biyo balikunze, zyoonse zyaambwa muzikozyanisyo, ¹² nikuba kuti, kubona balabona pesi kabatabonesesyi, akumvwa balamvwa, pesi kabatamvwisisisyi; nkaambo kansinga balikubonesesya akumvwisisisya balikunoosanduka kabalekelelwa zibi zyabo.” ¹³ Lino wakati kuli mbabo, “Teemwamvwisisisya pe chikozyanisyo eechi? Ani mpo zimwi zyoonse muzoozimvwisisisya biyeni? ¹⁴ Mumizi umiza ijwi. ¹⁵ Bamwi bantu balimbuli nzila, aawo mpulimizidwe jwi. Mpawo mbubalimvwa biyo, Satani wasika wabweza jwi lyali lyamizwa muli mbabo. ¹⁶ Bamwi, mbuli muse ulaamwaala mpuyakamizwa mbuto, balalimvwa jwi, mpawo, akufwambaana balalitambula chakubotelwa. ¹⁷ Pesi nkaambo tabajisi miyanda ibbide, balajata kwachiindi chiniini biyo. Nikwasika mapenzi nikuba kusyonsegwa akaambo kajwi, balafwambaana kuwa. ¹⁸ Alubo bamwi, mbuli muse ulaamaamvwa muyakamizwa mbuto, balalimvwa jwi, ¹⁹ pesi masukuusyo aanyika, kweenwa aabuvubi aziyandisyo zyazimwi zintu zyabuyo zilasika zyasyanikizya jwi, zyachita kuti litabi aamichelo. ²⁰ Bamwi, mbuli muse uuvubide muyakabyalwa mbuto, balalimvwa jwi, balitambula, akuzyala michelo imwi zyiindulwidwe makkumi otatwe, imwi zyiindulwidwe makkumi musanu alimwi, imwi zyiindulwidwe mwaanda.” ²¹ Jesu wakati kulimbabo, “Ani nga mweeta lambi mung'anda kuti muzoolitibbike alusuwo, na kulibika mujungusi? Ani te nga mwalibika aatala aachibikilo chalyo. ²² Nkaambo zintu zyoonse zisisidwe ziyooyubununwa, alimwi choonse chitibbikidwe chiyotibbulwa. ²³ Kufumbwa ulaamatwi aakumvwa ngamvwe.” ²⁴ Wakaya kunembo akubaambila kuti, “Amuchenjele loko nzimumvwa. Cheelesyo nchimubelesya anywebo muyoyelesegwa anchicho, nikuba kwindilila kulindinywe. ²⁵ Nkaambo kufumbwa uujisi uyoopegwa zyiingi. Ooyo uutajisi, niziba nzyalaazyo uyoonyanzigwa.” ²⁶ Alimwi wakati, “Mbobubede oobu bwami bwa Leza mbuli muntu uumiza mbuto aansi. ²⁷ Mpawo uloona mansiku akubuka nibwacha, pesi mbuto ilamena akukomena, nikuba kuti tazi mbozichitika. ²⁸ Muse awulike: ulamezya nseke zyamayila kusaanguna munsonga, kakutobela miyungi, mane miyungi yatuba. ²⁹ Mayila mbaatuba biyo, ulabelesya chakunenzya, nkaambo chiindi chakutebula chasika.” ³⁰ Wakabaambila lubo kuti, “Ani niinzi nchitunga tuleelanisya aacho bwami bwaLeza, na chikozyanisyo nchitukonzya kubelesya? ³¹ Bulimbuli mbuto itegwa musitada, iinga niibyalwa nimbuto niini loko kuli zyoonse. ³² Pesi niyabyalwa, ilakomena kwiinda zilimwa zyoonse zyamumuunda, kilaamitabi mipati zyakuti tuyuni tulakonzya kukkala akuyaka mumweenzule wawo.” ³³ Jesu wakabaambila jwi kabelesya zikozyanisyo zyiingi mbuli mbubakali kukonzya kumvwisisisya, ³⁴ mpawo taakwe nchaakabaambila pe katabelesezye chikozyanisyo. Pesi naakaba alike abasikwiiya bakwe, wakabapandulwida zyoonse. ³⁵ Oobo buzuba, nilyakaba goko, wakati kuli mbabo, “Atuzubuke tuye mutala.” ³⁶ Bakayisiya nkamu, babweza Jesu mubwaato. Kwakali aamwi maato aakamutobela. ³⁷ Mbubakeendeenda biyo kwakawunga guwo pati, alimwi mayuwe akalikukupila maanzi mubwaato, mane bwaamba kuzula. ³⁸ Jesu wakalilede kasegede musego, kusule mubwaato. Basikwiiya bakamubusya alimwi bakati kuli nguwe, “Muyiisyi, ani tokubwene na kuti twaamba kufwa?” ³⁹ Wakabuka, wakalayilila guwo, alimwi wakati kumayuwe, “Umuna! Batama!” Mpawo guwo lyakawumuna, mayuwe akayosa, kwang'unama. ⁴⁰ Wakati kuli basikwiiya bakwe, “Nkaamboonzi nimuyoowa boobu? Ambulisunu tamunaabaalusyomo pe?” ⁴¹ Bakayoowa loko alimwi bakabuzyania bati, “Ani muntu musyoboonzi ooyu, iguwo amayuwe zilamumvwa akumuswiilila?”