¹ Jesu wakanjila lubo muchikombelo, mwaakaakujana mwaalumi wakakokonyene kuboko. ² Bantu biingi bakamulangisisya kabayanda kubona kuti ulamuponia na mubuzuba butegwa Sabata kuchitila kuti bamupe mulandu. ³ Jesu wakaambila mwaalumi wakakokonyene kuboko kuti, "Nyampuka uyimikile aakati kabantu aaba." ⁴ Mpawo wakati kubantu, "Chilimumulawu na kuchita chibotu mubuzuba butegwa Sabata na kuchita bubi; kuvuna buumi na kujaya?" Pesi bakawumuna. ⁵ Wakabalanga chakunyema, alimwi wakawusa, akaambo kakuyuma kwamyoyo yabo, mpawo wakati kumwaalumi ooyo, “Tandabika kuboko kwako.” Mpawo wakatandabika, elyo kuboko kwakwe kwakoololoka. ⁶ Lino baFalisi bakazwa aanze akufwambaana bajatana aabaHelodi kulanguula nzila mbubanga balamujaya. ⁷ Eelyo Jesu abasikwiiya bakwe bakaya kulwizi, mpawo makamu makamu akabatobela kuzwa kuGalili, akuJudiya, ⁸ akuJelusalemu akuIdumiya amutala lyaJodani akubusena buzyungulukide Taya aSidoni. Lino nibakamvwa nzyakali kuchita, bantu bayingi bakeza kulinguwe. ⁹ Aboobo wakaambila basikwiiya bakwe kuti bamubambile bwaato buniini afwiifwi, kuti akonzye kusosoloka kumakamu baleke kumusyanikizyi. ¹⁰ Nkaambo wakaponia bayingi, aboobo bakali aamachise bakasundikizyania kabayanda kumuguma. ¹¹ Kufumbwa myuuya mibi mpuyakamubona yakawida aansi kunembo lyakwe akoompolola kiiti, “Nduwe Mwana waLeza.” ¹² Alimwi wakayilayila changuzu kuti itamubbusyi. ¹³ Wakatanta achilundu akwiita aabo mbakalikuyanda, alimwi bakaza kulinguwe. ¹⁴ Wakasala balikkumi ababili; (aabo mbakati mbatumwa) kuti bakabe aamwi anguwe, alimwi akabatume kukukambawuka, ¹⁵ akubapa ngunzu, zyakutanda myuuya mibi. ¹⁶ Wakasala aaba balikkumi ababili: Sayimoni, ooyo ngwaakawulika zina lyaPita; ¹⁷ Jemusi mwana waZebbediya, aJoni mwana wakwabo Jemusi, aabo mbaakawulika kuti mba Bbowanejesi, nkukwaamba kuti bana ba ndabi; ¹⁸ Endulu, Filipu, Bbatolomi, Matewu, Tomasi, Jemusi mwana waAlifasi, Tediyasi, a Sayimoni munkutwe ¹⁹ a Judasi Sikkaliyoti, nguwe wakazoomuuzya. ²⁰ Mpawo wakabweeda kumuunzi, alimwi makamu makamu akamubunganina, aboobo basikwiiya bakwe anguwe tebakachili kujana chiindi chakulya pe. ²¹ Lino bang'anda yakwabo nibakamvwa zyalikuchitika, bakamulanguula, kabaamba kuti “Wasondoka.” ²² Balembi bakazwa kuJelusalema bakaamba kuti, “Unjidwe muuya mubi utegwa Bbelizabbeli, 'Alimwi nguzu nzyatandya myuuya mibi nzizyakwe Bbelizabbeli mwami wamyuuya mibi.” ²³ Jesu wakabayita mpawo watanguna kwaambuula ambabo muzikozyanio, “Satani ulakonzya biyeni kulitanda? ²⁴ Na bwami kabupambukene, bwami oobo tabukonzyi kwiimikila pe. ²⁵ Alimwi na tekwaba kumwvanana mung'anda, eeyo ng'anda tikonzyi kwiimikila pe. ²⁶ Alimwi na Satani walikazya eelyo kaanzeene, takonzyi kwiimikila pe; nkokuti mamanino aakwe asika. ²⁷ Pesi taakwe muntu ukonzya kunjila mung'anda yamwaalumi singuzu kuti abbe lubono lwakwe, atatanguna kumuzunda akumwaanga ooyo mwaalumi singuzu. Aawo mpanga ulakonzya kubba lubono mung'anda eeyo. ²⁸ Ndamwaambila kasimpe, zyoonse zibi zyabana babantu ziyoolekelelwa, nikuba kutuka Leza nkubachita, ²⁹ pesi ooyo muntu utuka Muuya Usalala takonzyi kulekelelwa; ulaamulandu wachibi utamani.” ³⁰ Jesu wakabaambila eezi, nkaambo bakalikwaamba kuti, “Ulaamuuya uusofweede.” ³¹ Mpawo banyina abanike bakwe bakasika, bayimikila aanze. Bakatuma umwi kuti amwiite. ³² Bantu bayingi bakalikkede kabamubunganide, umwi wakamwaambila kuti, “Banyoko abanike bako balaanze baliikukulanguula.” ³³ Wakabasandula wati, “Baama abana bakwesu mbaani?” ³⁴ Lino wakalanga aabo bakakkede kabamuzyungulukide wati, “Bona, baama abana bakwesu mbaaba! ³⁵ Kufumbwa uuchita kuyanda kwaLeza ngumwana wakwesu, amuchizi wangu abaama.”