¹ Naakaboola kuKkapenawumi kakuli kwayiinda mazuba mache, kwakabbuka kuti Jesu mwali. ² Bantu biingi bakabungana kwakuti taakwe nikwachili busena pe, mung'anda nikuba kumulyango, alimwi Jesu wakabakambawukila ijwi. ³ Kwakasika baalumi bakanyampwide mwaalumi wakayuminide mubili; kanyampwidwe abaalumi bone. ⁴ Nibakabula mweenya wakuswena afwiifwi anguwe nkaambo kakuvula kwabantu, bakavumbula kaluli kuti baseluzizye mulwazi aawo mpaakabede Jesu. ⁵ Naakabona lusyomo lwabo, Jesu wakati kuli wakayuminide mubili, ''Mwana wangu, zibi zyako zyalekelelwa''. ⁶ Bamwi balembi bakalikkede mpawo aawo, bakaliikuyeeya munyono yabo, ⁷ ''Nkaamboonzi mwaalumi ooyu naambuula oobu? Utuka Leza! Ngwani ukonzya kulekelela zibi, kunze kwaLeza alike?'' ⁸ Chakufwambaana Jesu wakaziba mumuuya wakwe nzibakali kuyeeya mumyoyo yabo. Wakati kulimbabo, ''Nkaamboonzi nimulikuyeeya eezi mumyoyo yenu? ⁹ Ncheechili chuuba kwaambila mulwazi, ''Walekelelwa zibi zyako, na kuti buka, bweza bulo bwako weende?'' ¹⁰ Pesi kuchitila kuti muzibe kuti Mwana waMuntu ulaamanguzu aano aansi zyakulekelela zibi, '' (wakati kuliwakayuminide mubili) ¹¹ ''Ndati kulinduwe nyampuka, bweza bulo bwako, uye kung'anda yako''. ¹² Wakanyampuka chakufwambaana wabweza bulo, wakazwa mung'anda kunembo lyabantu boonse, zyakuti boonse bakagamba bapa bulumbu kuliLeza, bati, ''Eezi tatunaazibona pe''. ¹³ Wakayinka lubo kunkomwe yalwizi, makamu makamu akamutobela, mpawo wakabayiisya. ¹⁴ Kayabweenda, wakabona Levi mwana waAlufiyasi kakkede mutente lyabasimutelo wakati kulinguwe, ''Nditobele''. Wakanyampuka wamutobela. ¹⁵ Jesu naakachili kulya mung'anda yaLevi, basimutelo abasizibi bakali kulya aawe antoomwe abasikwiiya bakwe, nkaambo bakali biingi bakali bamutobela. ¹⁶ Lino balembi, bakali baFalisi, nibakabona Jesu kaliikulya abasizibi, bakati kuli basikwiiya bakwe, ''Nkaamboonzi nalya abasimutelo abasizibi?'' ¹⁷ Jesu naakamvwa boobo wakati kulimbabo, ''Bantu baponede mumubili tabayandi musilisi pe; pesi bachiswa mbibayanda musilisi. Teendazida kwiita baluleme pesi basizibi''. ¹⁸ Lino basikwiiya baJoni ababaFalisi balikulyiimya kulya. Bamwi bantu bakamuzida akubuzya, ''Nkaamboonzi basikwiiya baJoni ababaFalisi nibalyiimya, pesi bako tabalyiimyi pe?'' ¹⁹ Jesu wakati kulimbabo, ''Nkujana basikutambwa kulisibwiinga balyiimya na sibwiinga kachili aabo?'' Kufumbwa kabachili aamwi asibwiinga, tabakoonga balyiimya pe. ²⁰ Pesi ayoosika mazuba sibwiinga nayoobwezegwa kuzwa kulimbabo. Muli aayo mazuba bayoolyiimya. ²¹ Tawo pe usuma chigamba chamulembo mupya aachizwaato chikulukulu, nkaambo chigamba chipya chilayakisya mpawo bbanga likomenesye. ²² Tawo pe ubika wayini mupya munkomo nkulukulu nkaambo wayini ulabbalula nkomo mpawo zyoonse, wayini ankomo zilanyonyooka. Wayini mupya ubikwa munkomo mpya". ²³ Mubuzuba butegwa sabata Jesu wakayinda mumuunda wamayila, basikwiiya bakapuluula mayila. ²⁴ BaFalisi bakati kulinguwe, ''Bona, nkaamboonzi nibalikuchita chitondwa mubuzuba bwaSabata?'' ²⁵ Wakati kulimbabo, ''Teemwakabala na kuti Deviti naakabula akuba anzala- we abaalumi mbakali aabo - ²⁶ mbaakanjila mung'anda yaJehova, Abbiyata naakali mupayizi mupati, akulya chinkwa chamukamu, chitazumizigwi kuligwa amuntu biyo pe kunze kwabapayizi, alimwi wakapa abalabo mbakali aabo?'' ²⁷ Jesu wakati, ''Sabata lyakalengelwa bantu, pepe bantu kulengelwa Sabata. ²⁸ Aboobo, Mwana waMuntu nguMwami, nikuba wabuzuba butegwa Sabata''.