¹ Muchifumofumo, bapayizi bapati bakabungana abapati abalembi ankamu yoonse yaJuda. Bakamwaanga Jesu bamutola. Bakamupedekezya kuliPayileti. ² Payileti wakabuzya kuti, ''Nduwe Mwami wabaJuda na?'' Wakasandula kuti, ''Waamba''. ³ Bapayizi bapati bakali kumutamikizya zintu zyiingi. ⁴ Alubo Payileti wakamubuzya kati, ''Tosanduli na?'' Langa kuvula zintu nzibali kukutamikizya!'' ⁵ Pesi Jesu taakamusandula pe, mpawo eecho chakamugambya Payileti. ⁶ Kuchiindi chapobwe, Payileti wanoonga wabaangunywida umwi wabaange, mwaange ngubatanooli bakumbila. ⁷ Mpawo kwakali mwaalumi utegwa Bbalabbasi muntolongo abamwi bakali amilandu yabujayi muchiindi chalupapi. ⁸ Makamu akaza kuli Payileti mpawo bakatalika kukumbila kuti abachitile mbuli mbabachitila lubbe. ⁹ Payileti wakabasandula wati, ''Muyanda kuti ndimwaangunwide Mwami wabaJuda na?'' ¹⁰ We wakalizi kuti nkaambo kabbivwe bapayizi bapati nchibakaaba Jesu kulinguwe. ¹¹ Pesi bapayizi bapati bakasungilizya makamu kuti balilile kwangununwa kwaBbalabbasi. ¹² Payileti wakasandula lubo wakati, ''Ani mpo ndichite biyeni aMwami wabaJuda?'' ¹³ Bakawompolola lubo, ''Ngabambulwe!'' ¹⁴ Payileti wakabaambila kuti, ''Mulanduunzi ngwakachita?'' Pesi bakayinkilila kunembo akoompolola kabati, ''Amumubambule''. ¹⁵ Payileti wakayanda kukutisika makamu, eelyo wakabaangunwida Bbalabbasi. Wakamupenzya Jesu mpawo wamupeda kuti akabambulwe. ¹⁶ Basilumamba bakamutola bamunjizya mubbetekelo (alingawo maanda afulumende mapati), mpawo bakayita imbunga yabasilumamba. ¹⁷ Bakamusamika kulembo wamubala wantumbula Jesu, mpawo bakazinga musini wamaamvwa bakamusamika. ¹⁸ Bakatalika kumuseka kabati, ''Mwalemekwa, Mwami wabaJuda!''. ¹⁹ Bakali kumumuuma mumutwe atete mpawo akumuswida mate. Bakamufugamina akumukotamina. ²⁰ Nibakamana kumusyonsya, bakamugwisya mulembo wamubala wantumbula mpawo bamusamika zisamo zyakwe, eelyo bakamutola kuyoomubambula. ²¹ Umwi mwaalumi, Sayimoni wakuSayilini, wakayobuza kuzwa kumyuunzi (wakali wisi waAlekizanda aLufusi), mpawo bakamwaangila kuti amubwezele chiingano. ²² Basilumamba bakasisya Jesu kubusena butegwa Gologota (bunga nibwapandululwa butegwa, ''Busena bwazipepe zyamitwe''). ²³ Bakamupa wayini ivwelengene andulwe, pesi taakanywa pe. ²⁴ Bakamubambula mpawo bakaabana zisamo zyakwe, kwiindila mukusonda kuti babone nchatajane umwi awumwi wabasilumamba. ²⁵ Chakali chiindi chahhola lyatatu nibakamubambula. ²⁶ Achikwaankwani bakalemba mulandu ngubakamupa, bakati, ''Mwami wabaJuda''. ²⁷ Bakamubambula aamwi ababbi babili, umwi kululyo lwakwe umwi kuchimweensi chakwe. ²⁸ Malembe akazuzikizigwa akuti, ''Wakabalikizigwa aamwi abasikutyola milawo". ²⁹ Abo bakali kwiinda nibakamubona bakali kutikinia mitwe kabati, ''Aa! webo nookonzya kumwaya chikombelo akuchiyakulula mumazuba otatwe, ³⁰ livune useluke achiingano!'' ³¹ Munzila ikozyenie, bapayizi bapati bakali kumuniaka antoomwe abalembi, kabati, ''Wakafutula bamwi, pesi takonzyi kulifutula. ³² Akube kuti Kkilisito, Mwami waIzilayeli, aseluka lino aachiingano, kuti tubone akusyoma.'' Abalabo bakabambulwa aamwi anguwe bakamuseka. ³³ Muhhola lyamusanu alimwi, mudima wakazulila busena boonse kusikila kuhhola lyamusanu aane. ³⁴ Muhhola lyamusanu aane Jesu wakoompolola ajwi pati wakati, ''Eloyi, Eloyi, sabakkatani?'', chipandululwa kuti, ''Leza wangu, Leza wangu wandisilaanzi?'' ³⁵ Bamwi babaabo bakayimvwi kumbali bakamvwa majwi akwe mpawo bakati, ''Langa, ulikwiita Elayija.'' ³⁶ Umwi wakachijaana, wakanika nsinsa muwayini iilweela, wayibikka aatete, mpawo wakamupa kuti anywe. Mwaalumwi ooyu wakati, ''Atubone na Elayija ulasika kuzoomwaangula.'' ³⁷ Eelyo Jesu wakoompolola ajwi pati mpawo wafwa. ³⁸ Mulembo wamuchikombelo wakadeluka muzipanzi zibili kuzwa kujulu kusika aansi. ³⁹ Eelyo mupati wabasilumamba balimwaanda wakayimvwi kalangide Jesu, naakabona kuti wafwa munzila eeyi, wakati, ''Masimpe mwaalumi ooyu wali Mwana waLeza.'' ⁴⁰ Kwakaliko alimwi banakazi bakali kweebela chakulekule. Akati kabo kwakali Maliya Magadalini, Maliya (bayina aaJemusi mwanike aJosesi). ⁴¹ Naakali muGalili bakalikumutobela mpawo akumukutawukila. Alimwi banakazi bayingi abalabo bakamusindikila kuJelusalema. ⁴² Nilyakaba goko, akaambo kakuti lyakaliZuba lyaMabambe, nkokuti, buzuba kakutanaaba buzuba butegwa Sabata, ⁴³ Jozefu wakuAlimatiya wakasika. Wakali kulemekwa kali umwi wankamu yabapati bechisi wakali kulindila bwami bwaLeza. Wakayinka chabusichaamba kuli Payileti waakukumbila mutunta waJesu. ⁴⁴ Payileti chakamugambya kuti Jesu wakali wafwa kale. Wakayita mupati wabasilumamba bali mwaanda mpawo wakabuzya kuti Jesu wakali wafwa kale na. ⁴⁵ Eleyo Payileti naakaziba kuzwa kumupati wabasilumamba balimwaanda kuti Jesu wafwa, wakuupa Jozefu mutunta. ⁴⁶ Jozefu wakawula mulembo utentema wakamwangununa achingano, wamuvungilizya amulembo utentema, mpawo wamulazika muchuumbwe chamumpako yabbwe. Eelyo wakatendelesya bbwe wajala mulyango wachuumbwe. ⁴⁷ Maliya Magadalini aMaliya bayina aJosesi bakabubona busena Jesu mbwaakalazikwa.