¹ Lino kwakasyeede mazuba abili kuti kutalike Pobwe lyaKwiindilila alyaMikamu yaChinkwa chitakwe Bumena. Bapayizi bapati abalembi bakali kulanguula nzila isisikene njibalikunoomujata aayo Jesu akumujaya. ² Nkaambo balikwaamba kuti ''kutabi muchiindi chapobwe, kuti kutabi kunyongana aakati kabantu'' ³ Lino Jesu kalimu Bbetani mung'anda y Sayimoni sichisenda, kachili mukulya aatebuli, kwakasika mwanakazi kulinguwe akankuli katununkilizyo tudula loko, twamusdyobo wanadi. Wakakapwaya kankuli akutila nadi aamutwe wakwe. ⁴ Pesi kuli bamwi bakabijilwa. Bakambuuzyania aakati kabo kabati, ''Ani wanyonyweedaanzi? ⁵ Tununkilizyo ootu twalikukonzya kuuzigwa amuulo wiinda myaanda yotatwe yamali mpawo kayipegwa bachete''. Mpawo bakamukalalila. ⁶ Pesi Jesu wakati, ''Amumusiye alike. Mumukataazizyaanzi? Wandichitila chintu chibotu. ⁷ Bachete munooli aabo kale lyoonse, mpawo kufumbwa chiindi nimwayanda mulakonzya kubachitila kabotu, pesi tamukoyooba andime pe lyoonse. ⁸ Wachita eecho nchakoonzya. Wananika kale mubili wangu kuti ukazikwe. ⁹ Ndamwaambila kasimpe kuti, kufumbwa makani mabotu nkwaayookambawukwa munyika yoonse, eechi nchachita mwanakazi ooyu chinoowambuulwa, mukumuyeeya''. ¹⁰ Mpawo Judasi Isikkaliyoti, umwi wabalikkumi ababili wakaya kubapayizi kuti akamwaabe kulimbabo. ¹¹ Lino bapayizi bapati nibamvwa oobo, bakabotelwa akumusyomezya kuti ulapegwa mali. Wakatalika kuyanduula mweenya wakumwaaba kulimbabo. ¹² Mubuzuba butaanzi bwachinkwa chitakwe bumena, lino nibakapayizya kabelele kapobwe lyakundilila, basikwiiya bakati kuli nguwe, ''Nkookuli nkoyanda kuti tukakumbambile kulyida pobwe lyakwindilila?'' ¹³ Wakatuma basikwiiya bakwe babili akubaambila kuti, ''Kamuya mugunzi, mpawo muyooswaanana aamwaalumi unyampwide munkuli wamaanzi. Mukamutobele. ¹⁴ Ooko nkwayoonjila mun'anda mukamutobele mukati, mukateedi kulimwaning'anda, "Muyiisyi wati, ''Ilikuli yangu ng'anda yabeenzu nkwesikalyide Pobwe lyaKwiindilila abasikwiya bangu?'' ¹⁵ Uyoomutondeezya ng'anda mpati yamujulu ibambidwe kabotu. Mukatubambile mumo''. ¹⁶ Mpawo basikwiiya bakazwa bayinka mumuunzi. Lino bakazijana zyoonse mbuli mbaakabambila, eelyo bakabambila chakulya chaPobwe lyaKwindilila. ¹⁷ Nikwakaba goko, wakaza abalikkumi ababili. ¹⁸ Aawo kabachivuumene aatebuli akulya, Jesu wakati, "Kasimpe ndamwaambila kuti umwi wenu ngundiliikulya aawe uyoonduuzya". ¹⁹ Mpawo boonse bakawusa loko, alimwi umwi awumwi wakati kulinguwe, ''Masimpe teensi ndime pe?'' ²⁰ Jesu wakasandula wakati kulimbabo, ''Nguumwi wabalikkumi ababili, ooyu uulikusunsila aamwi andime mundyido'' ²¹ Aboobo Mwana waMuntu uyooyinka mbuli mbukulembedwe aatala anguwe. Pesi maawe kuli yooyo muntu wachitya kuti Mwana waMuntu awuzigwe, chalikubota anooli muntu ooyo taakazyalwa''. ²² Nibakalikulya Jesu wakabweza chinkwa, wachilongezya, akuchikwamuna. Wabapa akwaamba kuti, ''Mubweze eechi. Ngomubili wangu''. ²³ Alimwi wakabweza nkomeki, wapa kulumba akubapa, eelyo bakanywa boonse. ²⁴ Wakati kulimbabo, ''Oobu mbobulowa bwangu bwachizuminano, bulowa butililwa bayingi. ²⁵ Kasimpe ndamwaambila kuti, Nsikoyoowunywa limbi pe ooyu muchelo wamasansa kusikila buzuba oobo nindiyoowunywa mubwami bwaLeza''. ²⁶ Nibakamana kwiimba lwiimbo, bakazwa baya kuchilundu chitegwa chamaOlivi. ²⁷ Jesu wakati kulimbabo, ''Moonse muyoowa, mbuli mbukulembedwe kuti, "Ndiyoowuma mweembeli butanga "buyoomwayika". ²⁸ Pesi ndayoobusigwa, ndiyoomuzulwida kuya muGalili''. ²⁹ Pita wakati, ''Nikuba kuti boonse bawa, mebo pe''. ³⁰ Jesu wakati kulinguwe, ''Kasimpe ndakwaambila, sunu, iyii, mbubo oobuno busiku mukombwe kutanaakokolika tubili uyoondikaka tutatu. ³¹ Lino Pita wakati na kazyaamba kufa ayebo, nsikoyookukaka pe. Boonse bakasyomezya bukozyenie. ³² Bakasika kubusena butegwa Gesemane, mpawo Jesu wakati kulibasikwiya bakwe, ''Amukkale aawa nenchiya kukukomba''. ³³ Wakabweza Pita, Jemusi aJoni, wiinka aabo mpawo watalika kupengaana akukataazika. ³⁴ Wakati kuli mbabo, ''Muuya wangu wawusa kapati, nikuba kusika kulufu. Muchaale aawa kamulindide'' ³⁵ Kabachiya kunembo, Jesu wakawida aansi akukomba kuti nichali kukonzeka chiindi eechi chimwiinde mbali. ³⁶ Wakati, ''Abba, Taata, kulinduwe zintu zyoonse zilakonzeka. Gwisya nkomeki eeyi kulindime pesi kutabi kuyanda kwangu pe, pesi kwako''. ³⁷ Wakaboola, wakajana baloona, mpawo wakati kuli Pita, ''Sayimoni, muliikoona? Tamukonzyi kulinda hhola lyomwe? ³⁸ Mulinde akukomba kuti mutanjili mukusunkwa. ³⁹ Lino wakazwa lwabili waakwiindulula kukomba amajwi ngawo. ⁴⁰ Naakaboola lubo wakajana baliikoona, nkambo meso aabo akali alema. Tebakaziba chakwaamba kulinguwe. ⁴¹ Wakaboola lwatatu wakati kulimbabo, ''Muchoona akulyookezya? Kwazulila! Chiindi chasika. Amulange! Mwana waMuntu uliikuuzigwa mumaanza abasizibi. ⁴² Munyampuke; tweende. Amulange, sikunduuzya waba afwiifwi.'' ⁴³ Kachaambuula, Judasi, umwi wabalikkumi ababili wakasika, ankamu mpati kabajisi mapanga amasumu, kuzwa kubabapayizi bapati, abalembi, abapati. ⁴⁴ Lino sikumuuzya wakapa chitondeezyo, wati, ''Ooyo ngundiyoomyonta ngonguwe. Amumujate mumutole atamuchiji pe.'' ⁴⁵ Judasi naakasika, mpawo aawo wakaya kuliJesu wati, ''Muyiisyi!'', mpawo wamumyonta. ⁴⁶ Mpawo bakamujata bamwaanga. ⁴⁷ Pesi umwi wabaabo bakayimvwi wakasomona panga wakakwezula akudunsula kutwi kwamuzike wamupayizi mupati. ⁴⁸ Jesu wakati kulimbabo, ''Muza aanga muyanda mubbi, amapanga, amakoli kuzoondijata? ⁴⁹ Nindakali aandinywe lubbe akuyiisya muchikombelo teemwakandaanga pe. Pesi eechi chachitika kuti malembe azuzikizigwe''. ⁵⁰ Boonse mbaakali aabo Jesu bakamusiya akuchija. ⁵¹ Mulombe wakalizambilide biyo mulembo uutentema wakali kuyobutobela Jesu. Bantu nibakamuvumpila, ⁵² wakasiya mulembo utentema wachija kali chinkuna. ⁵³ Bakatola Jesu kumupayizi mupati. Bamubunganina bapayizi bapati, abapati abalembi. ⁵⁴ Lino Pita wakali kuyobutobela chakulekule kuyoosika kulubuwa lwamupayizi mupati. Wakakkala aakati kabalindi bakalikuyoota mulilo. ⁵⁵ Lino bapayizi bapati ankuta yoonse yabaJuda bakalikuyanduula bukamboni bwakubeja kuchitila kuti bamutole bamujaye. Pesi teebakabujana pe. ⁵⁶ Bayingi bakaleta bukamboni bwakubeja aatala aanguwe, pesi bukamboni oobu teebwakalikuzuminina pe. ⁵⁷ Bamwi bakayima akupa bukamboni bwakubeja aatala anguwe; Kabati, '' ⁵⁸ Twakamumvwa kati, 'Ndiyoomwaya ng'anda yaLeza yakayakwa aamaanza, mukati kamazuba aatatu ndiyooyaka iimbi itayakwi aamaanza pe''. ⁵⁹ Nikuba boobo bukamboni bwabo teebwakazumina pe. ⁶⁰ Mupayizi mupati wakayimikila aakati kabo wabuzya Jesu kuti, ''Tujisi nsandulo na? Niinzi eezi aaba baalumi nzibapeda bukamboni aatala anduwe?'' ⁶¹ Pesi we wakawumuna, taakwe naakasandula chintu pe. Alubo mupayizi mupati wakamubuzya kuti, ''Nduwe Kkilisito, Mwana wawulongezegwe na?'' ⁶² Jesu wakati, ''Ndime! alimwi muyoomubona Mwana waMuntu aakukkala kululyo lwakuboko lwasinguzu akuboola amayoba aakujulu.'' ⁶³ Mupayizi mupati wakadelula zisamo mpawo wati, ''Sa tuchiyanda bakamboni bambi? ⁶⁴ Mwalimvwida mbaatuka Leza. Mutyeni?'' Mpawo bakamupa mulandu weelela lufu. ⁶⁵ Bamwi bakatalika kumuswida mate akumuvumba busyu akumunabba, akwaamba kuti kulinguwe, ''Sinsima!'' Basolooli bakamubweza akumuuma. ⁶⁶ Eelyo Pita kachili munsi mulubuwa umwi wabalanda basimbi bamupayizi mupati wakaza kulinguwe. ⁶⁷ Naakabona Pita kaliikuyota mulilo, wakamulangisisya akwaamba kuti, ''Mwakali aamwi aaJesu muNazaleta''. ⁶⁸ Pesi wakakaka akwaamba kuti tandimuzi pe nikuba kumvwisisisya nzoliikwaambuula'. Lino wakazwa waya anze aamulyango. Mpawo mukombwe wakakokolika. ⁶⁹ Pesi mulanda musimbi wakamubona mpawo watalika kwaamba lubo kuli baabo bakayiimvwi mpawo, ''Ooyu mwaalumi nguumwi wabo!'' ⁷⁰ Lino wakakaka lubo. Nikwakayinda kayindi kaniini, aabo bakayimvwi aawo bakati kuliPita, "Nkasimpe uli umwi wabo, nkaambo ayebo ulimunaGalili.'' ⁷¹ Wakatalika kulibika mulutuko akukonka. "Ooyu mwaalumi ngoliikwaambuula aatala anguwe nsimwizi pe mebo". ⁷² Mpawo mukombwe wakakokolika lwabili. Eelyo Pita wakaayeeya majwi aaJesu aakuti, "Mukombwe katanaakokolika tubili, uyoondikaka tutatu'' alimwi wakawusa akulila.