¹ Nibwakamana buzuba butegwa Sabata, Meli Magadalini, Meli banyina aJemusi aSalome bakawula tununkilizyo kuti bayinke kuyoonanika mutunta waJesu. ² Chifumofumo mubuzuba butaanzi bwamviki, zuba mbulyakapasula biyo bakayinka kuchuumbwe. ³ Kabachili munzila bakabuzyania umwi awumwi kuti, “Ngwani uutakatugwisizye bbwe kuzwa kumulyango wachuumbwe?” ⁴ Pesi nibakatambya menso, bakabona bbwe kalili lyasunzuluzigwa kale nkaambo lyakali pati loko.. ⁵ Nibakanjila muchuumbwe, bakabona mwaalumi mukubusi kasamide chisamo chituba, kakkede kululyo, mpawo bakagamba akuyoowa. ⁶ Wakati kulimbabo, “Mutayoowi. Mulanguula Jesu muNazeleta, wakabambulwa aachiingano. Wabuka! Amulange aabusena mpubakamubikide. ⁷ Pesi kamuya, mukaambile basikwiiya bakwe aPita kuti, "Ulazulula kunembo lyenu kaya kuGalilii. Nkuko nkumuyoomubona, mbuli mbwaakamwaambilide,” ⁸ Bakazwa muchuumbwe; bakatalika kuchijaana, bakalikuteketa kabagambide. Taakwe nchimbakaambilana pe nkaambo bakali bayoowa loko. ⁹ Mubuzuba butaanzi bwamviki, naakabuka, wakasanguna kulitondeezya kuli Meli Magadalini, ooyo ngwaakali watanda myuuya mibi ilimusanu ayiibili kuzwa mulinguwe. ¹⁰ Wakayinka wakwaambila aabo bakali kweenda aawe, bakali koomoka akulila. ¹¹ Pesi nibakamvwa kuti Jesu muumi akuti wamubona, teebakasyoma pe. ¹² Nikwakayinda zintu eezi, wakalibonia munzila iisiyene kuli babili, nibakalikuyoobweenda kuya kumyuunzi. ¹³ Bakayinka kuyoowaambila basikwiiya boonse, pesi taakwe nibakabasyoma pe. ¹⁴ Mukweenda kwachiindi Jesu wakalibonia kulibalikkumi awumwi nibakali kulya; wakabakalalila mukutasyoma akuyuma kwamyoyo yabo, nkaambo bakakaka kuzuminina aabo bakamubona naakabuka. ¹⁵ Wakabaambila kuti, “Kamuya munyika yoonse alimwi mukakambawukile zilengwa zyoonse makani mabotu. ¹⁶ Kufumbwa uusyoma akubbizigwa uyoofutulwa, pesi kufumbwa uutasyomi uyoopegwa mulandu. ¹⁷ Alimwi zigambyo eezi ziyoobatobela boonse basyoma: Bayootanda myuuya mibi muzina lyangu. bayoowambuula mumilaka mipya. ¹⁸ Na baakujata nzoka, alimwi nibayoonywa chijaya, tachikwe kuyoobachisa pe, bayoobika maanza aabachiswa, alimwi bachiswa bayoopona.” ¹⁹ Mpawo Mwami naakamana kubaambila, wakatolwa kujulu mpawo wakakukkala kululyo lwaLeza. ²⁰ Mpawo basikwiiya bakazwa, akuyookambawuka koonse koonse, alimwi Mwami wakabeleka aabo akusiimya ijwi lyakwe azitondeezyo zyakabatobela.