¹ Kujana wagwisya Leviyatani na akalobyo? Na kwaanga myeebo yakwe entambo? ² Kujana wamubika kakkole na mumpemo yakwe, na kudonkola mweebo wakwe akalobyo? ³ Uyookukombelezya na kulinduwe? Uyoowambuula majwi mabombe na kulinduwe? ⁴ Uyoochita chizuminano na anduwe, kuti ukamubweze mbuli mulanda kwalyoonse? ⁵ Uyoosaana anguwe na mbuli mbuunga ulacita akayuni? Kujana wamwaanga na kubalanda bako basimbi? ⁶ Kujana mbunga yabalobi bamuyanda na? Kujana bamwaanzaania na kuti akawuzye aakati kabasikuuzya? ⁷ Kujana mwazuzya chikumba chakwe amasumu na mutwe wakwe amasumu aanswi? ⁸ Bika jaanza lyako aalinguwe lomwe luzutu alimwi uyooyeeya nkondo akutazooyichita limbi pe. ⁹ Bona, bulangilizi bwawooyo uuchita eezi mabejo; umwi takoyoowaalilwa aansi na akaambo kakuyoowa? ¹⁰ Tawo pe uukonzya kunyongania Leviyatani; mpawo ngwani uukonzya kwiimikila kunembo lyangu? ¹¹ Ngwani lutaanzi wakandipa chimwi chintu kuti nzzmuliye? Kufumbwa choonse chili aansi aajulu lyoonse nchichangu. ¹² Nsikoyoowumuna pe aatala amawulu aaLeviyatani, nikuba aatala amakani aanguzu zyakwe, nikuba aatala amubili wakwe waluzyalo. ¹³ Ngwani uukonzya kumuzwaatununa chkobela chakwe? Ngwani uukonzya kunjila zizwaato zyakwe zyempi? ¹⁴ Ngwani uukonzya kujula makoma aabusyu bwakwe - buzwide meno chili chiyoosyo? ¹⁵ Sule lyakwe lizwide mibunda yantobo, yaangidwe aamwi mbuli aachaanzyo chiyumu. ¹⁶ Zili aafwiifwi kuli chimwi achimwi zyakuti muuya tukonzyi pe kwiinda aakati kazyo. ¹⁷ Zilisweenene kuli chimwi achimwi; zilisweenene zyakuti tazikonzyi pe kwaanzanisigwa. ¹⁸ Mumuni ulamweka kuzwa kukuyoya kwakwe; menso akwe ali mbuli zikowe zyakumachedo. ¹⁹ Mumulomo wakwe kuzwa mulilo uupya, nsasi zyamulilo zilasotoka kazizwa. ²⁰ Kumansonono akwe kuzwa busi mbuli bwachilongo chili kubila aamulilo wafulidwa kuti upye loko. ²¹ Kuyoya kwakwe kutenta malasya akuba bbila; mumulomo wakwe kulazwa mulilo. ²² Munsingo yakwe kuli nguzu, akuyoosya kulazyana kunembo lyakwe. ²³ Mafwindi eenyama zyakwe alisweenene; alinamatide aalinguwe; taagwisiki pe. ²⁴ Moyo wakwe muyumu mbuli bbwe - nchobeni muyumu mbuli ziyo. ²⁵ Aawo nalibusya lwakwe mwini, nikuba baleza balayoowa; akaambo kakuyoowa, balabweedela musule. ²⁶ Na panga lyamugonka, takwe nchilimuchita - nikuba sumu, kanta na chilwanio chiyasa. ²⁷ Lubulo ulubona mbuli muzi, amukuba mbuli chisamu chibolede. ²⁸ Kanta takamuchiti kuti achije; kulinguwe mabwe aangwelebele ngaaba buungu. ²⁹ Nkoli ngazyaba mbuli mizi; ulaseka kumusabilo wesumu. ³⁰ Zipanzi zyakwe zili aansi zili mbuli zifwapu zyakalongo kakafwa; usiya mukondo uuyanzabukide mumatope mbuli chileyi chipola. ³¹ Uchita maanzi kuti abile mbuli kalongo kamaanzi aabila; uchita lwizi mbuli kalongo kamafuta. ³² Uchita kuti mumuni umweke musule lyakwe; umwi ulabonaanga mulungu waba aamvwi. ³³ Tawo pe weelene aawe aanyika, wakabumbwa kuti apone chakutayoowa. ³⁴ Ulabona choonse chilisumpula; mwami kuli boonse bana balombe bakulisupula.''