¹ Kuzwawo Jobbu wakasandula Jehova wakati, ² ''Ndilizizi kuti ulakonzya kuchita zyoonse zintu, zyakuti takwe nzyokanza zikonzya kwimikizigwa. ³ 'Ngwani oyu utakwe abusongo unga ulingaania makanze?' Nchoonzyo, ndakambula zintu nzindakatali kumvwisisisya, zintu zyakali ziyumu loko kulindime kuti nzimvwe, ezyo nzindakateezi. ⁴ Wakati kulindime, 'Teelela, lino, alimwi ndiyowambuula; ndiyokubuzya zintu webo, alimwi uyondibuzya mebo.' ⁵ Ndakali ndamvwa atala anduwe amatwi aangu, pesi kwaino menso angu akubona. ⁶ Nchenchicho nchindalisola lwangu; ndasanduka mulusuko amudota.'' ⁷ Zyakachitika kuleecho chindi nakamana kwambula majwi aya kuli Jobbu, Jehova wakati kuli Elifazi muTemanayiti, ''Bukali bwangu balungene ayebo antomwe abeenzinyokwe bobile, nkaambo takwe niwakaambula atala andime ezyoziluleme, mbuli mbwakachita mulanda wangu Jobbu. ⁸ Lino kuzwaawo, amulibwezele basipule balimusanu ababili antomwe abagutu balimusanu ababili, mwiinke kumulanda wangu Jobbu, alimwi mukapede chipayilo chenu chakuumpa. Mulanda wangu Jobbu uyomukombela, alimwi ndiyotambula nkombyo yakwe, kuchitila kuti nsikamunyonyoni akambo kabufubafuba bwenu. Takwepe nimwakambula zibotu atala andime, mbwakachita mulanda wangu Jobbu.'' ⁹ Elyo Elifazi muTemanayiti, Bbiludadi muKkusyayiti, aZofa muNamatayiti bakiinka alimwi bakakuchita mbuli Jehova mbaakabalayilila, alimwi Jehova wakatambula Jobbu. ¹⁰ Elyo Jobbu nakakombela bazolwani bakwe, Jehova wakababwededezya zyoolwe. Jehova wakamubwedezya kwindulwidwe tubili kwinda nzyakajisi kutaanguna. ¹¹ Mpawo boonseni bakulana baJobbu, antomwe abachizi bakwe, aboonse bakamwizi kumatangunino, bakasika kulinguwe akuzolya zyakulya mung'anda yakwe. Bakamufwida luzyalo akumumbulizya nkambo kamapenzi ayo Jehova ngaakali wamwetela, alimwi umwi awumwi wakapa Jobbu kampanzi kansiliva akangolide. ¹² Jehova wakalongezya mamanino abuumi bwaJobbu kwiinda bwakutanguna; wakajisi tanga lyambelele zyulu kkumi azyulu zyone, nkamela zyuulu musanu achimwi, zipani zyabasune chuulu chomwe, alimwi achuulu chomwe chamadonki mazyazi. ¹³ Alimwi wakalijisi bana balombe balimusanu ababili antomwe abasimbi botatwe. ¹⁴ Wakawuzika mwana wakwe musimbi mutaanzi zina lyakuti nguJemima, wabili nguKkeziya, awatatu nguKkeleni Hapuchi. ¹⁵ Munyika yoonse tawope mukayintu wakajanika kalimubotu mbuli bana basimbi baJobbu. Wisaabo wakabapa lukono antomwe abachizi babo. ¹⁶ Musule lyazeezi, Jobbu wakapona myaka ili 140; wakabona bana bakwe antomwe abazukulu, kuyosikila kuzyalane lyane. ¹⁷ Mpawo Jobbu wakafwa, kaliwachembaala amazuba azulide.