¹ Ulizi na kuti mpongo zyamutulundu zizyala chiindiinzi twana twazyo? Nga ulalipeda na kweebela nzyazi zyazyo nezizyala? ² Ngaulakonzya na kubala myeezi njezitola kaziminsi? Ulichizi na chindi nchezitumbuuka acho twana? ³ Zilayondoba ansi akuzyala twana twazyo, alimwi mpawo ngazyamaninsya machise azyo akuzyala. ⁴ Twana twazyo ngatwasima akukomena muntandabale zyamyuunda; balabbudilaanze akutachiyobola lubo. ⁵ Ngwani wakalekela donki lyamusokwe kuti lyangunuke? Ngwani wakangununa zyanzyo zyandonki, ⁶ eeyo njindakachitilide munzi wayo muAlabbiya, ng' anda yayo munyika yamwinyo? ⁷ Ulaseka chamusoko kulusabilo lwamudolopo; takwepe anamvwa kompolola kwabeenzyi bamyota. ⁸ Ulavuluma atala lyatulundu kumachelelo aakwe; ooko ulalanguula woonse masokwe matete kuti alye. ⁹ Musune wamusokwe ngaulakondwa na kukubelekela? Ngaulazumina na kulala mubbondo lyako? ¹⁰ Nkubona ulabelesya kakole na kukwanga musune wamusokwe kuti ukafolole? Nkubona ulafolola na kayobukutobelela? ¹¹ Ngankubona ulamusyoma na akaambo kanguzu zyakwe mpati? Ngankubona ulamusiila mulimo na kuti achite? ¹² Nkubona ulalangilila kuti akwetele miila ako kumunzi na, kuti akubunganisizye miyungi kuti izopolegwe? ¹³ Mababa empoo alavukuvigwa chakulisumpula, pesi ayamababa amilimba njaluyando na? ¹⁴ Nkaambo ilasiya mayi ayo amuseele, alimwi ilasiya kuti kalokukasalilwa mulusuko; ¹⁵ ilaluba kuti kuulu kukonzya kwalyata na kuti munyama wamusokwe ukonzya kwaalyata. ¹⁶ Ilajata chabukali twana twayo mbotatedi tatwensi twayo pe; tiyoowi pe kuti machise ayo akuzyala ulabona aaba abiyo, ¹⁷ nkaambo Leza wakiipa busongo alimwi takwe nakiipa kumvwisisisya. ¹⁸ Muchiindi nichijana kabotu, ilaseka chalweeno kumabbiza abasikwagada. ¹⁹ Wakalipa nguzu namp ibbiza? Wakalisamika nsingo yalyo na anzangala? ²⁰ Wakali walichitya kuti lisotoke mbuli mpasu na? Nguzu zyakujindimuka kwalyo kulayoosya. ²¹ Lilajindimuka changuzu akukondwa munguzu zyalyo; lilafwambanina kuyoswanizya zilwisyo. ²² Lilasunka buyoofu alimwi taliyosegwi; talinzeemuki pe kupanga. ²³ Zyeenzyo zilamonywa mumbali lyalyo, kumbali kakuli sumu limweka antomwe apanga. ²⁴ Lilamena musele chabukali akuyoosya; akulila kwamweembo, takonzyi kwimikila abusena bomwe. ²⁵ Kufumbwa niwalila mweembo, uwamba kuti, 'Aha!' Wanunkiizya bweema bwenkondo kuzwa kule, lompololo lwabazuluzi benkondo akukwiitilizya kwabo. ²⁶ Nkubusongo bwako na gumbe nkwawuluka, zyakuti ulatalamuna mababa akwe kumyuuwo yakumusanza? ²⁷ Nkumalayilile aako na nsika nchiyaka chizumbo chayo kumasena alikujulu loko? ²⁸ Ilakkala kundengelezegwa alimwi ichita munzi wayo kumpela lyandengelezegwa, mpaasimide. ²⁹ Kuzwa ooko ilalanguula chakulya chayo; menso ayo abonena kule loko. ³⁰ Atwana twayotunywa bulowa; ooko bantu nkubajiilwa, nkonkuko nkwiibede.''