¹ Lino Jehova wakavwiila Jobo kuzwa kuguwo alimwi wakati, ² ''Ngwani ooyu uyeta mudima kumizeezo yangu amajwi aatakwe luzibo? ³ Lino lyaange muchibuno chako mbuli mwaalumi eelyo ndiyokubuzya mibuzyo, aboobo uyoondisandula. ⁴ Ndindakayimika ntalisyo yanyika wakali kuli ? Ndibuzye, kuti kolaakumvwisisisya. ⁵ Ngwani wakeeleka migaano yayo? Ndibuzye, kuti kozi. Ngawani wakoolola kakole kakweela kulinjiyo. ⁶ Mpaali ntalisyo yayo mpiiyalidwe? Ngwani wakabika bbwe lyachooko ⁷ nizyakayimba nyenyezi zyabuchedo alimwi abana baLeza nebakoompolola mukusekelela kwabo? ⁸ Ngwani wakajalila lwizi azijazyo nilwakasika aanze, nilwakatuluka kuzwa mwida - ⁹ eelyo nindakapanga mayoba chibe chikkobela, alimwi mudima mupati. ¹⁰ Eechi nchichicho nchindakabika mpa aanze aalwizi amugaano , alimwi akulupingila zyelano azijazyo, ¹¹ kandaamba kuti, 'Mpawo mpoyosika akutayinda, nikuba boobo, aawa mpawo mpiyoobika mugaano kumayuwe aalisumpula.' ¹² Saa wakapa malayilile kuchifumo, naa kuchita chifumo kuziba busena bwacho, ¹³ kuti chijate nyika azyooko akusansamuna babi kuzwa kuli njiyo? ¹⁴ Eelyo nyika ilasandulwa kukulibonia mbuli bulongo mbubusanduka; zyoonse zintu ziyoyima kaziboneka loko mbuli mabala-mabala aali aachisamo. ¹⁵ Kubantu babi balanyayigwa zyiindi zyabo zyabo 'zyamumuni'; makuko aabo aasumpukide ayootyolwa. ¹⁶ Sa wakiinka kuzwa maanzi aalwizi? Sa wakalyata mububbile bwalwizi? ¹⁷ Sa wakatondeezegwa milyango yalufu kuli nduwe? ¹⁸ Saa wakamvwisisisya bweelanisyo bwanyika mbububede? Ndaambile, kuti kozizi zyoonse. ¹⁹ Ilikuli nzila iiya kubusena bwakulyookezya bwamumuni - amudima, bulikuli busena bwawo? ²⁰ Kozulwida mumuni alimwi amudima kumasena aazyo amulimu? Yanduula nzila yakuboola kuzwa kumaanda aazyo yazyo? ²¹ Chakutadoneeka ulizi, nkaambo wakalizyedwe kale; nkaambo mweelwe wamazuba aako akomenesya! ²² Wakanjila muziyobwedo zyasikkunkwe, naa wakabona zilongeledo zyachivulamabwe, ²³ eezi zintu nzindakamba kwamazuba miingi amapenzi kwamazuba akulwana ankondo? ²⁴ Njiili nzila kalabi nkukakkala aamuuwo wakujwe umwayigwa biyeni aatala aanyika? ²⁵ Ngwani wakachita inzila yazambangulwe lwamvula, naa ngwani wakalenga nzila yamuzumo, ²⁶ kuchita kuti mvula iwe aatala aanyika kutakkali bantu, alimwi aatala lyachimpayuma, awo kutakwe muntu, ²⁷ kukutya masena aamwayukide alimwi asiiyidwe, alimwi kuctita kuti inyika isyuuke masokwe? ²⁸ Eno imvula ilawiisi na, naa, ngwani uuzyala malosi aalume? ²⁹ Azwa mumaanza ani mankaakamba? Ngwani wakazyala chaanda chituba anze ajulu? ³⁰ Maanzi alalisisa meni alimwi ngaaba mbuli mabwe; aajulu kwabubbile ngakwaba chikoto aamwi. ³¹ Ulakonzya kusunga bulilima muchisankata naa kusungulula nzyaanzyo zyaOliyoni? ³² Ulakonzya kusolweda ntanda kuti ibe muchiindi cheelede? Kujana wazulwida bbule abana bakwe? ³³ Ulizi na milawu yakujulu? Ulakonzya na kwiimika milawu yakujuliu aanyika? ^{34 35} Ulakonzya na kunyampula jwi lyako kusika kumayoba , kuti akuzuzizye mvula nyingi ikuvumbe? Ulakonzya kweeta lulabi kuti lwiinke, kuti ikambe kulinduwe, 'Tulaano.' ³⁶ Ngwani waka bika luzibo mumayoba alimwi wakatambika kumvwisisisya kubuma? ³⁷ Ngwani uubala mayoba mubusongo bwakwe? Ngwani uunga ulatila maanzi kuzwa munongo zyakujulu ³⁸ eelyo suko nilyachijaana ayumide mavwinga aanyika alajatana aamwi. ³⁹ Ulakonzya na kuvwimina mulavu muzyazi naa kukutya nzala yabana bakwe babalavu ⁴⁰ eelyo nibafugeme mumasempo aabo alimwi nibawusa muziyubilo nkabalala mukwiimina. ⁴¹ Ngwani uujanina basinkondonyina babachikwangala eelyo bana babo nibalila kuli Leza alimwi nibadadalika akubula chakulya.