¹ Alubo, Elihu wakiinkilila kunembo kwambuula; ² ''Swiilizya majwi angu, iwe nomwalumi musongo; kondimvwa iwe notakwe luzibo. ³ Kaambo matwi alasaluuzya majwi mbuli kameneno mbukalabila chakulya. ⁴ Atulisalile tubeni eecho chiluleme: atuliyandwiide aakati kesu chibotu. ⁵ Nkaambo Jobbu wakaamba kuti, 'Ime ndililuleme, pesi Leza wabweza zyeelelo zyangu. ⁶ Kutalizyeelelo zyangu , ndilangililwa nbuli sikubeja. chilonda changu tachisilikiki, nikuba mebo nkesikwe chibi.' ⁷ Jobbu mwaalumi ulibiyeni, ooyo uunywa masampu mbuli manzi, ⁸ weenda aakati kababo bachita bubi,akweenda abaalumi basofwede? ⁹ Kaambo wati, 'Tachigwasyi pe kuti muntu abotelwe kukuchita zintu Leza nzyayanda. ¹⁰ Aboobo ndiswiilizye, iwe nomwaalumi umvwisisiya: tazichiti pe kuti Leza achite bubi; tazichiti pe kuti Singuzu abisye.' ¹¹ nkaambo ulaliya muntu milimo yakwe; uchita kuti umwi awumwi muntu apegwwe bulumbu bwanzila zyakwe. ¹² Kasimpe, Leza tachiti bubi, nikuba Simanguzu tachiti chakutalulama. ¹³ Ngwani wakati ulange nyika? Ngwani wakati nyika yoonse ibe munsi lyakwe? ¹⁴ Na wabika kuyanda kwakwe kulinguwe mwini, alimwi kuti wakabungika muuya wakwe akuyoya kwakwe, ¹⁵ mpawo nyama yoonse ikalobe aantomwe; bantu bakabwede lubo kulusuko. ¹⁶ Kuti lino nkojisi kumvwisisisya , swiilila kuli cheechi; swiilila kumusabilo wamajwi aako. ¹⁷ Kujana utayandi bublulami weendelezya na? Kujana wabeteka Leza na ooyo uusalala alimwi uujisi nguzu mpati? ¹⁸ Leza, ngwani waamba kuti kumwami, 'Ulibuyo,' na waamba kuti, 'Nduwe sizibi'? ¹⁹ Leza utatondeezyi lusalulo kubazululi akubalemeka bantu bavubi kwiinda bachete nkaambo boonse milimo yamanza aakwe. ²⁰ Muchiindi chiniini bayofwa; aakati kabusiku bantu bayokankama alimwi bayoyinda; bantu banguzu bayobwezwa pesi kutali kwamaboko abantu. ²¹ Nkaambo menso aLeza ali aajulu lyabantu; ulibwene ntamo zyako zyoonse. ²² Takwe mudima na cheenzule chalufu aawo basizibi mpubayoliyubika beni. ²³ Nkaambo Leza tayandi kulangisisya muntu limbi; taziyandi kuti umwu muntu aze kulinguwe mukubetekwa. ²⁴ Ulatyoloola baalumi bapati tusyaputusyapu kunzila zyabo zitayandi kulingululwa, ubika bamwi mubusena bwabo. ²⁵ Munzila iilibobu uli aaluzubo anchito zyabo; ulabazunda bantu aaba mansiku; balanyonyoonwa. ²⁶ Kunembo lyamenso aabamwi ulabajaya akaambo kanchito zyabo mbi mbuli bafumpi ²⁷ nkaambo bakaleya mukumutobela alimwi bakaka kumvwisisisya kufumbwa nzila zyakwe. ²⁸ Munzila eeyi bachita kuti kulila kwabantu bachete kuze kulinguwe; wakamvwa kulila kwabantu bapenzegelwe. ²⁹ Eelyo nawumuna, ngwani uumupa mulandu? Kuti wasisa busyu bwakwe ngwani ukonzya kumusandula? Weendeleya chisi abantu kwelene, ³⁰ kuchitila kuti kukabulike naba womwe uyoyendelezya, kuchitila kuti kukabulike uchenga bantu. ³¹ Atwaambe umwi muntu wati kuli Leza, ''ime kasimpe ndaamulandu pesi nsichiyoobisyi lubo pe, ³² ndiyiisye ime nzisibwene; ndachita chibi pesi nsichiyoochichiti lubo pe.' ³³ Ubonaanga Leza uyosubula na muntu kuchibi chakwe, mukunga toyandi Leza nzyachita? Weelede kulisalila peepe ime . Eelyo waamba eezyo nzyozi. ³⁴ Baalumi bakumvwisisisya bayowamba kuti kulindime - nchobeni, woonse musongo uundimvwa uyowamba kuti, ³⁵ ''Jobbu waamba katakwe luzibo; majwi aakwe takwe busongo.' ³⁶ Luzutu na Jobbuwabikwa mumisunko kukupandulula kantu kaniini aatala amakani aakwe nkaambo kakwambuula kwakwe mbuli baalumi basizibi. ³⁷ Nkaambo ulayungizya lupapo kububi bwakwe; ukamba maboko aakwe chakunyansya aakati kesu; wambuula bubi aatala aLeza.''