¹ Aboobo kwalino, Jobbu, Ndakukumbila, koswilila majwi angu; mvwa kwambuula kwamajwi angu. ² Bona lino, ndasamuuna mulomo wangu; lulimi lwaamba mumulomo wangu. ³ Majwi angu azwa mumoyo wangu uululeme; milomo yangu yawamba luzibo lusalala. ⁴ Muuya wa Leza wakandilenga; luyoyo lwasinguzu zyoonse lwandipa buumi. ⁵ Kuti kokonzya, bamba kabotu majwi aako kunembo lyangu, konyamuka undikazye. ⁶ Bona, webo andime tuleleene kunembo lya-Leza; toonse twakabumbwa abulongo. ⁷ Bona, toyelede kuyoosegwa akambo kakundiyoowa; nekuba kuti mutolo wangu walema alinduwe. ⁸ Mbuli mbowakaamba mukumvwa kwangu; Ndakamvwa muzuzumo wamajwi kuti, ⁹ 'Ndilisalide alimwi nsijisi chibi; nsijisi kampenda, alimwi nsijisi chibi. ¹⁰ Bona, ngu-Leza wajana myeenya yakundilwisya akundijata mbuli sinkondonyina.'' ¹¹ Ulabikka mawulu angu aachangililo; ulalangilila koonse nkunjendenda.' ¹² Bona, mulicheechi tululeme pe - Ndiyokusandula webo, nkambo Leza mupati kwinda muntu. ¹³ Ulwaninaanzi anguwe? Toyeeyi kuli choonse chanzyakachita. ¹⁴ Nkambo Leza waamba kamwi - iyii, tubili, nekuba muntu kuti kotaboni. ¹⁵ Muchiloto, muchilengano chamumansiku, chiindi ng'onzi mpati niziwida bantu , mukuguna abulo -- ¹⁶ Eelyo Leza ulajula matwi abantu, akubayoosya aziyoosyo, ¹⁷ kuti agwisye bantu kuziyandisyo zyabubi, alimwi kuti baleke kulisumpula. ¹⁸ Leza wafutula muuya wabantu kuzwa mumulindi, buumi bwabo butayi kulunyonyooko. ¹⁹ Muntu ulasubulwa akuchiswa abulo, kulwana kuli muzifuwa zyakwe takumani, mane buumi bwakwe bukake zyakulya, ²⁰ alimwi muuya wakwe kuti usesemwe azinono. ²¹ Mubili wakwe waligwa chakuti tuchiboneki pe; zifuwa zyakwe tazichiboneki lino zyalibonia. ²² Zyanchoonzyo, muuya wakwe waswena afwifwi kukkomba, buumi bwakwe kuli baabo bayandisya kubunyonyoona. ²³ Pesi nakuli angelo umwi uunga ulaba simwimaakati kakwe, umwi wachuulu, kumwambila eecho chiluleme kulinguwe, ²⁴ kuba aaluzyalo kulinguwe kuti, 'Avunwe kulufu; Ndamujanina chinunuzyo.' ²⁵ Mpawo mubili wakwe waba mupya kwinda wamwana; ulajoka mbuli kumazuba abulombe bwakwe. ²⁶ Uyokomba kuli Leza, alimwi Leza uyoba abuuya kuli nguwe, kuchitila kuti abone busyu bwa-Leza alukondo. Leza uyopa muntu luzundo lwakwe. ²⁷ Mpawo oyo muntu uyoyimba kunembo abamwi alimwi akwamba kuti, 'Ndakabisya akulubizya eecho chiluleme, pesi chibi changu techakasubulwa. ²⁸ Leza wakanununa muuya wangu kuzwa kuya kukkomba; buumi bwangu bulendelela kuti babone mumuuni.' ²⁹ Bona, Leza ulachita zyoonse eezi zintu amuntu, tubili, iyi, nekuba zyiindi zitatu, ³⁰ kuti aboozye muuya wakwe kuzwa kukkomba, kuchitila kuti akamunikilwe amumuni wabuumi. ³¹ Swilila changuzu, Jobbu, alimwi swilizya kuli ndime; wumuna mpawo ndiyowamba. ³² Kuti kojisi chakwamba, ndisandule; Kowamba, nkambo ndayanda kuti nkalitondezye kuti uliluleme. ³³ Kakutali boobo, undiswilile, kowumuna, alimwi ndiyokuyiisya busongo.''