¹ Lino aabobaniini kwiinda ndime takwe nchibali aacho pesi lundiniako - baalumi aaba baniini bali aamawisi mbindakakakila kuti babeleke kunze kwabankala balitanga lwangu. ² Nchobeni, nguzu zyamaboko abamawisi, zyakali kundigwasya biyeni - baalumi aabo mulimbabo nguzu zyabupati bwabo zyakamana? ³ Bakalikotede kuzwa kukubula akunzala; bakampulukuta nyika njumu mumudima wamunkanda amutongo. ⁴ Bakachela minyo amatu azibbwindi, miyanda yamusamu mubbulumu kwakali kulya kwabo. ⁵ Bakatandwa kuzwa aakati kabantu aabo bakaboompolwedela mbuli umwi woompolweda sikubba. ⁶ Aboobo baleelede kukkala mumimpata yamilonga. mumpako zyanyika amabwe. ⁷ Aakati kalusaka bakalila mbuli madonki alimwi bakabungana aantomwe ansi azizumbo. ⁸ Bakali bana balombe bazifubafuba, nchobeni, bana balombe babantu batakwe mazina! Bakatandwa munyika amyoondo. ⁹ Pesi lino ndaba chisesyo munyimbo yabo; ndaba chintu biyo kulimbabo. ¹⁰ Balandisesemwa alimwi baliimikila kule andime; tabaleki kundiswida kubusyu bwangu. ¹¹ Nkaambo Leza wasungula kakole kukakokola kangu akundipenzya, alimwi aababo banditukila tabalemeki kunembo lyangu. ¹² Kubbazu lyangu lyalulyo kwabuka nkamu; banditanda akundibambila nzila zyabo zyalunyonyoono. ¹³ Balamwaya nzila zyangu; batontela lunyonyooko kunembo lyangu, baalumi batakwe uubakasya. ¹⁴ Balaza kulindime mbuli mpi kwiinda mumpako iikwamkwamukide mubulambo bwamunzi; aakati kalunyonyooko babumbulukila aalindime. ¹⁵ Kuyoowa kweetwa kulindime; kulemekwa kwangu kwatandwa anga mbuli nduuwo; kuzwidilila kwangu kwayinda mbuli joba. ¹⁶ Lino buumi bwangu bwatilwa kuzwa mulindime; mazuba miingi akufwaba ajatilila alindime. ¹⁷ Mansiku mafuwa alimulindime alayaswa; machise aandilya taalyookezyi pe. ¹⁸ Nguzu mpati zyaLeza zyakwempa zizwato zyangu; zyandivumba mbuli mombe wachizwato changu. ¹⁹ Wandiwaalila mumatope; ndaba mbuli lusuko adota. ²⁰ Ndililila kulinduwe, Leza, pesi tondisanduli pe; ndanyampuka, alimwi wandilanga biyo. ²¹ Wachincha akuba siluuni kulindime; amanguzu aamaboko aako wandipenzya. ²² Ulandinyampula kusika kuluuwo akuluchita kuti lundibweze; wandiwala lubo muluuwo lupati. ^{1 23} Nkaambo ndilizi kuti uyonditola kulufu, kung'anda iisalilidwe zyoonse zipona. ²⁴ Nikubaboobo, sena umwi tasisyi luboko lwakwe kukukumbila lugwasyo chiindi naawa? Sena umwi uli mumapenzi takumbili lugwaso? ²⁵ Tendakamulilila na wakali mumapenzi? Tendakamufwida nsoni na muntu uubula? ²⁶ Nindakalangilila bubotu, bubi bwakasika; nindakalindila mumuni, mudima nguwakasika biya. ²⁷ Moyo wangu ulakatazikana alimwi tulyookezyi; mazuba akupenzegwa asika alindime. ²⁸ Ndeenda mbuli wakalikukkala mumudima, pesi peepe akaambo kazuba; ndilayimikila mumbungano akulilila lugwasyo. ²⁹ Ndili mukulana wabamwaaba, mweenzinyina wampoo. ³⁰ Lukanda lwangu lwasiya alimwi akukuluuka kuzwa kulindime; mafuwa angu atentwa apuumina. ³¹ Akaako chakwiimbya changu chaba chanyimbo zyakoomoka, mutetele wangu waba wakwiimbila aabo bawizukide.