¹ Jobbu wakeendelela anembo kaamba kuti, ² ''Ikaaka, koonzyo ndaba mbuli mbundakabede myeezi yakayinda Leza nakandibamba, ³ chimunisyo chakwe nichakamweka aamutwe wangu, alimwi nindakayinda mumudima amumuni wakwe. ⁴ Aakaka, kwanoli ndaba mbuli mumazuba aakusima kwangu buzolwani bwa Leza nibwakali ateente lyangu, ⁵ eelyo Singuzu zyonse nakachili andime abana bangu kabandizyungulukide, ⁶ eelyo nzila yangu niyakavumbidwe amawumba, alimwi ibbwe lyakanditilila tulonga twamafuta! ⁷ Nindakazwa kumulyango wamuunzi, nindakali kukkala mubusena bwangu mulubuwa lwaamunzi, ⁸ bakubusi bakandibona akusosoloka kuzwa kuli ndime mululemeko, abachembele bakabuka akundiimina. ⁹ Bana babaami bali kuumuna kwambuula nindali kusika; bali kuvumba maboko kumilomo. ¹⁰ Majwi abasilutwe ali kuumuzigwa, mpawo lulimi indimi zyabo zyali kunamatila kumalakunya. ¹¹ Nkambo kumana kwamatwi abo kundimvwa, bali kundilongezya; kumana kwakundibona kwabo, bali kupa bukamboni kuli ndime akuzumina aandime ¹² nkambo ndakavuna uumwi wakali muchete nakalila awumwi utakwe wakali aawisi nakali bulide sikumugwasya. ¹³ Lulongezyo lwayooyo wwali waamba kunyoonyoka lwakasika aalindime; Ndakachita moyo wamukamufu kwiimba chalukondo. ¹⁴ Ndakasama bululami, alimwi bwali mbuli chikobela amusini. ¹⁵ Ndakali menso kubantu boofu; ndali kuulu kubantu balemene. ¹⁶ Ndakali wisi kubantu babulide; Ndakali kulingulula makani nikuba aayoyo ngundandatakezi. ¹⁷ Ndakatyola myeebo yabantu bataluleme; Ndakasomona nchakali wazunda kuzwa aakati aameno aakwe. ¹⁸ Eelyo ndakaamba kuti, 'Ndiyoofwida muchisaba changu; Ndiyoyungizya mazuba aangu mbuli sanga zyamuseele. ¹⁹ Miyanda yangu yatandabala kuyosika kumaanzi, alimwi muume uloona busiku boonse aamitabi yangu. ²⁰ Lulemeko mulindime lukkede ndupya; alimwi buta bwanguzu zyangu buli bukulusidwe choonse chiindi mujanza lyangu.' ²¹ Bantu balikuswilila kuli ndime; bali kundilindilila; bakakkalachumunizi kuti bamvwe lulayo lwangu. ²² Kwinda kwamajwi aangu, teebali kwambuula lubo pe, kwakabawida mbuli maanzi aalimbabo. ²³ Kwalyonse bali kundilindila mbuli mbobalindila mvula; bali kwaasamuna milomo yabo kukunywa majwi aangu, mbuli mbobakachita kumvula iichalila. ²⁴ Ndakali kubamwemwetelela nibakatali kuchilangilila; tebakawukakila mumuni wakubusyu bwangu. ²⁵ Ndakasala nzila yabo akukkala mbuli simwami wabo; ndakapona mbuli mwami mumpi yakwe, mbuli umwi wuumbulizya boomoka.