¹ Nchobeni nkuuli mugodi wansiliva, abusena oko nkwisalazigwa ngolide. ² Lubulo lulagwisigwa munyika; mukkuba wayeemunwa kuzwa mubbwe. ³ Bantu balanguula mumudima kusikila kumamanino, kusikila nkubayiila, imabwe mwabambidwe alimwi mumudima muche. ⁴ Ulapwaya akufula mpwiido kuzwa kubantu; masena aayo aakalubwa kufwambana kuulu kwaumwi awumwi. Ulanziika kule kuzwa kubantu; ulazungaana kuya akuboola. ⁵ Kuli zyanyika, omo muzwa chakulya, yakasandukila kumbi mbuli mulilo. ⁶ Mabwe aayo mbusena oko mabwe mayandisi nkwaazwa, asuko lyayo lilijisi ngolida. ⁷ Takwepe kayuni kawuluka kazi inzila eyo, nikuba linso lyansika libona. ⁸ Banyama balisumpula tabana kweenda muleeyo nzila pe, nikuba balavu bayoosya tabanayinda ooko. ⁹ Muntu ulatandabika janza alwaale, akukolomona zilundu amiyanda yazyo. ¹⁰ Ulajula tulonga akkati kamabwe; menso akwe alabona zintu ziyandisi zyoonse oko. ¹¹ Ulajala tulonga kuti tuteendi pe; zisisidwe ooko ulazyeeta anze kumumuni. ¹² Nkukuli busongo nkubukonzya kujanwa? Nkukuli kubusena bwakumvwisisisya? ¹³ Muntu tawuzi muulo wabo pe; nikuba kujanika kunyika yabaponi. ¹⁴ Manzi malamfu alikunsi anyika awamba kuti, 'Tensi muli ndime pe'; lwizi lwamba kuti, 'Tensi kuli ndime pe. ¹⁵ 'Tabukonzyi kuulwa angolide; nikuba nsiliva tikonzyi kweelwa mbuli muulo wabo. ¹⁶ Tabukonzyi kwelanisigwa angolide yaku Ofili, atubwe tuyandisi tatubuli. ¹⁷ Ingolide amabwe aabalangala takonzyi kwelanisigwa ambubo pe mubulemu; nikuba tumwekamweka twangolide iisalala inga tulakonzya kuchinchanisigwa ambubo. ¹⁸ Takwepe bulemu bwambaanyina nikuba mabwe mayandisi nchobeni; muulo wabusongo wiinda mabwe asalala pyu. ¹⁹ Tubwe tuyandisi tatukonzyi kwelanisigwa ambubo pe; nikuba ingolide isalala tikonzyi kwelanisigwa abulemu bwabo pe. ²⁰ Kuzwa kuli, mpawo, busongo nkubuzwa? Mbubuli busena bwakumvwisisisya? ²¹ Busongo bulisisikene kuzwa kumenso azilengwa zipona zyoonse alimwi balisisidwe kuzwa kubayuni bakujulu. ²² Lunyonyooko a lufu zyamba kuti, 'Twakamvwa ntwiintwi biyo atala ambubo amatwi eesu.' ²³ Leza ulamvwisisisya inzila yambubo; ulizi busena bwabo. ²⁴ Nkambo ulalanga kumamanino anyika akubona zili ansi lyamajulu. ²⁵ Wakachita nguzu zyamuuwo akweleka maanzi miingi. ²⁶ Imvula wakibikila milawu akubamba inzila yandabi. ²⁷ Mpawo wakabona busongo akubwambilizya; wakabutalisya, nchobeni, alimwi wakabulingula. ²⁸ Kubantu wakaamba kuti, 'Boona, kuyoowa kwa Mwami - mbobubo busongo; kukuzwa kuchibi nkokumvwisisisya.'''