¹ Musule azeezi, Jobo wakasamuna mulomo wakwe akutukila zuba ndyakazyalwa. ² Wakati, ³ ''Buzuba mbundakazyalwa ngabufwidilile, mansiku ayo aakati, 'Mulombe watumbukwa.' ⁴ Oobo buzuba ngabube mudima! Leza atabi azyakuchita pe ambubo, nuba mumuni utakabali mulindilyo. ⁵ Mudma antomwe amwenzule walufu ngaziliyande libe lyazyo. Akube kuti chiyoba chipone ajulu lyalyo; azyonse zichitya kuti izuba lisiye chakasimpe ngazilipenzye. ⁶ Kwamba busiku oobo, mayoba asiya mbii kabutola. Akube kuti litakondwi akati kamazuba amumunyaka oyo; litakasiki mumweelwe wamyeezi. ⁷ Langa, obo busiku ngiibe ngomwa; kutakazwi niliba jwi lyalukondo mulindilyo. ⁸ Ngabatukile zuba eelyo, aabo bakonzya kubusya Levitani. Akube kuti nyenyeezi zyakumabbililo zisiye. ⁹ Elyo zuba ngalikalanguule mumuni, pesi litakuujani; nekuba kuyobona zikowe zyabunsi oobo, ¹⁰ nkaambo lyakakachilwa kujala milyango yezyalilo lyabaama, alimwi telyakakonzya kundisisila mapenzi mumenso aangu. ¹¹ Nkaambonzi nindakatafwa bunsi oobo nindakazwa muzyalilo lyabaama? Nkaambonzi nindakatapeda muuya wangu buunsi obo baama nibakandizyala? ¹² Nkaamboonzi mawulu aabo nakanditambula? Nkaamboonzi inkolo zyabo nizyakandibukulusya kuti nyonke? ¹³ Nkaambo kwalino nenga ndilede zwangu chumunizi. Nekunga ndilede nkelyumuzizye antomwe ¹⁴ abaami abendelezi baanyika, aabo bakaliyakila tubanda twabo ooto twakaba mumatongo kwaino. ¹⁵ Nakuti nikunga ndilede abana babaami aabo bakali angolide, aabo bakazuzizye maanda aabo ansiliva. ¹⁶ Nakuti chimwi chindi nikunga nkeyandotumbukwa akufwa mpawo, mbuli bana bavwanda abo bakatabona mumuni wazuba. ¹⁷ Ooko basizibi nkubamana mumapenzi; ooko bakatede nkubalokulyokezya. ¹⁸ Ooko baane nkubalyiibide antoomwe zwabo; takwe pe anibamvwa ijwi lyasikwenzya bazike. ¹⁹ Bonse baniini abapati nkobabede; mulanda nkwawangunukide kuli simalelo wakwe. ²⁰ Nkaambonzi mumuni nuupegwa kulooyo ulimukuusa? Nkaamboonzi buumi nibupegwa kulooyo usululwa mumuuya, ²¹ kulooyo ulakwizya lufu kalutamusikili pe; kuli ooyo usyalufu kwinda usya lubono lusisidwe? ²² Nkaambonzi mumuni nupegwa kuli yooyo ukondwa kwindilide alimwi ulabotelwa naajana kabanda? ²³ Nkaambonzi mumuni nuupegwa kumuntu ulanzila zisisidwe, oyo muntu Leza ngwazyungulukide mulubaya? ²⁴ Nkaambo kulakwizya kwangu kulachitika kwinda kulya; kukuluma kwangu kulatilwa mbuli manzi. ²⁵ Nkaambo chintu nchindakali kuyoowa chandisikila; echo nchindakali kuyoowa chazosika alindime. ²⁶ Takwepe nenkalwa moyo, nyumwide nee, alimwi nsikwe kulyokezya pe; anukuti mapenzi ngandisikila.''