¹ Mpawo Elifazi wakuTemani wakasandula wati, ² ''Muntu nga ulaba alugwasyo na kuli Leza? Mwalumi wabusongo nga ulaba alugwasyo kuli nguwe na? ³ Chilabotezya na kuli Singuzu kuti koli musalali? Zili kuli nguwe na kabiyo kuti wachita kuti nzila zyako zibule kampenda? ⁴ Ngazilaboobo nkaambo kakumulemeka kwako na kuti akukkalalile alimwi akutole kulubeta? ⁵ Tebubi bwako bwiingi na? Taakwe mamanino na kuzibi zyako? ⁶ Nkaambo wakayanda chijatisyo chachikwelete kumwananyokwe katakwe nchiwachitila pe alimwi mwamusamununa zizwaato wasyaala maya. ⁷ Takwepe niwakapa maanzi kubantu bakongedwe akunywa; wakiima balenzala zyakulya ⁸ nikuba lwako, mwalumi ulanguzu, wakavubide nyika, nikuba lwako, mwalulumi walikulemekwa, wakapona mulinjiyo. ⁹ Wakabatuma bamukabafu kabali chinkwamaanza; maanza abatakwe mawisi akatyololwa. ¹⁰ Nkinkaako, tukole nkotuli tulikuzyungulukide, alimwi kuyowa kulakupenzya. ¹¹ Mpuuli amudima, kuchitila kuti utakaboni; mulwi wameenda ulakuvumba lwako. ¹² Sa Leza takope mubulamfu bwamajulu? Kolanga bulamfu bwanyenyeezi, zili kulamfu buti! ¹³ Ulaamba kuti, 'Niinzi nchazi Leza? ¹⁴ Tuyoba tuche tulimusitide, zyakuti takonzyi kutubona; uleenda mubupati bwamajulu.' ¹⁵ Uyolondola na nzila zyachiindi ezyo zyakeendwa abansiku, ¹⁶ aabo bakachegwa kachitanasika chiindi chabo, aabo balentalisyo zyakakukululwa mbuli mulonga, ¹⁷ aabo bakambide kuti kuli Leza, 'Kozwa kulindiswe; aabo bakateedi, 'Niinzi nchanga ulachita kulindiswe Singuzu?' ¹⁸ Nekuba kuti wakazuzizye maanda aabo azintu zibotu; mizeezo yabasizibi ilikule andime. ¹⁹ Bantu baluleme balabona bubisyi bwabo alimwi balakondwa; batakwe bubi balabaseka chakubaninda. ²⁰ Baamba kuti, 'Nchoonzyo aabo bakatubukilide bakagonkwa; mulilo wakasyukuta buvubi bwabo.' ²¹ Lino kozuminana a Leza alimwi ukabe alumuno anguwe; munzileeyo, bubotu buyosika kulinduwe. ²² Kotambula, ndakukombelezya, malayilile kuzwa kumulomo wakwe; kolondola majwi aakwe mumoyo wako. ²³ Kuti na waboola kuli Singuzu, uyoyakululwa, kuti wagwisya wabasowela kule bataluleme mumatente aako. ²⁴ Vwikila buvubi bwako aansi mulusuko, ingolide ya Ofaya akati kamabwe akutusensa, ²⁵ alimwi Singuzu uyokubeda buvubi bwako, nsilva njebesi kuli nduwe. ²⁶ Nkaambo kaako uyokondwa muli Singuzu; uyonyampula busyu bwako kuli Leza. ²⁷ Uyochita nkombyo zyako kuli nguwe, alimwi uyokumvwa; uyobika zikonke zyako kuli nguwe. ²⁸ Alimwi uyowamba kufumbwa chintu, alimwi chiyozumininwa nkambo kako; mumuni uyomunika munzila zyako. ²⁹ Leza uselusya muntu ulikankayizya, alimwi uvuna oyo ulamenso alifwiinsya. ³⁰ Ukonzya kuyovuna muntu oyo ujisi zibi; oyo uyovunwa kwindila mubusalali bwamanza aako.''