¹ Mpawo Jobbu wakasandula alimwi wakati, ² ''Amuswiilile loko kumajwi angu, alimwi eechi ngachikabe luumbulizyo ndumuyondipa. ³ Mukabe andime, alimwi mebo alubo ndiyowambuula; ndamana kwambuula, mundinonge. ⁴ Mbuli ndime, lung'ung'u lwangu luli kumumtu na? ⁵ Amulange ndime alimwi mukankamane, mubike maanza enu amilomo yenu. ⁶ Chiindi nendiyeeya aataa akupengana kwangu, ngandayowa, alimwi mubili wangu ulakankama. ⁷ Nkaambonzi bantu babi nibiinkilila kunembo kabapona, bachembaale alimwi akukomena munguzu mpati? ⁸ Lunyungu lyabo lulayimikwa ambabo kunembo lyabo, alimwi bana babo balayimikwa kumenso abo. ⁹ Maanda aabo alibambikene kuzwa kukuyowa; nekuba musako waLeza alimbabo. ¹⁰ Pule wabo ulazyalisya; takachilwi pe kuchita oobo; mpwizi yabo ilzyala alimwi tayisowi pe. ¹¹ Balatuma bana babo mbuli butanga, alimwi bana babo balazyana chakukondwa. ¹² Balayimba amatambolini atuntimbwaakukondwa anyimbo zyamutetele. ¹³ Balamana mazuba aabo mukuzwidilila, alimwi balafwa chuumunizi kabaya kuSyiyoli. ¹⁴ Bati kuliLeza, 'Kozwa kulindiswe nkaambo takwe nitulakamina kufumbwa luzibo lwanzila zyako. ¹⁵ Niinzi Singuzuzyoonse, kuti tumukombe? Nimpinduunzi njetujana na twakomba kulinguwe?' ¹⁶ Langa, lusumpuko lwabo taluli mumaanza aabo na beni? Takwe nchekonzya kuchita pe aluchenjezyo lwabantu babi. ¹⁷ Kukabe tungane aawo lampi lyabantu babi kalizimwa, na bubi ntenda zyabo kaziza aatala ambabo? Leza umwaya tungane mawuse aalimbabo mukunyema kwakwe? ¹⁸ Kuyooba tungane kuti bakabe mbuli chuungu chipupululwa aluuwo na mbuli chuungu chibwezwa akambizi? ¹⁹ Mwaamba kuti, ''Leza ulabika kuliwumwi awumwi mulanda wabana bakwe kuti bawuliye.' Amuleke alililiyile mwini kuchitila kuti azibe mulandu wakwe. ²⁰ Amuleke menso akwe abone lunyonyookolwakwe mwini, alimwi anywe bukali bwaSinguzuzyoonse. ²¹ Nkaaambo uyolela buti bana bakwe musule lyakugonkelwa myeelwe yamyeezi yakwe? ²² Kujana kwaba na naba womwe unga ulayisya Leza luzibo mbokunga ulabeteka nikuba aabo balikujulu? ²³ Umwi mwaalumi ulafwa mubuzule bwanguzu zyakwe, kawumwide lyoonse alimwi kalyiibide. ²⁴ Mubili wakwe ulizwide mukupa, alimwi mumpolyo wamafuwa aakwe muteteete. ²⁵ Umwi mwaalumi ulafwa mubuusu bwamuuya wakwe, ooyo wakatabona chintu chibotu. ²⁶ Boonse baloona ansi mulusuko; boonse imvwinyu zilabavumba. ²⁷ Bona, ndilizi miyeyo yako, anzila nzolangilila kundibisizya aazyo. ²⁸ Nkaambo mwaamba kuti, ''Lino ilikuli ng'anda yamwana waMwami? Lilikuli tente oomo mwaalumi mubi mwakali wakkala?' ²⁹ Temwakababuzya na basilweendo? Tamuzi na bukamboni mbubakonzya kwaamba, ³⁰ kuti mwaalumi mubi ulagwisigwa kuzwa kuzuba lyamapenzi, alimwi akufutulwa kuzwa kubuzuba bwabukali? ³¹ Ngwani uusula nzila yamuntu mubi kubusyu bwakwe? Ngwani uutakamuliilile kulizeezyo nzyakachita? ³² Pesi ulanyampulwa kuya kuchuumbwe; baalumi bayoolinda kabanda kakwe. ³³ Magadi aamumpati ayomunonena; bantu boonse bayomutobela, mbuli mbukwakakli bantu biingi kunembo lyakwe. ³⁴ Mpawo muyonduumbulizya biyeni azyamayabwe mukuti munsandulo zyenu takwe chiliwo pesi kubeja luzutu?''